Сургаалт үгс
17 Хэрүүлтэй гэрт тансаг хоол идсэнээс,
Тайван амгалан* газар хатсан талх мэрсэн нь дээр.
2 Хэрсүү зарц гутамшигт хүүг захирна.
Тэрбээр эзнийхээ хөвгүүдтэй хамт өв хүртэнэ.
3 Мөнгийг тогоонд, алтыг зууханд цэвэршүүлдэг бол,
Хүмүүсийн зүрхийг Ехова шалгадаг.
4 Муу хүн хорлонтой яриаг анхаардаг.
Зальт этгээд хорон үгийг чагнадаг.
5 Ядуу хүнийг элэглэдэг хүн Бүтээгчийг нь доромжилж буй хэрэг.
Бусдын зовлонд баярладаг хүн шийтгэлээс мултрахгүй.
6 Ач зээ нь өтгөсийн титэм,
Аав ээж нь үр хүүхдийнхээ алдар.
7 Шулуун шударга үг мунхгуудад тохирохгүй.
Худал үг захирагчдад бүр ч зохихгүй!
8 Бэлэг авч яваа хүнд энэ нь үнэт чулуу мэт юм.
Тэрбээр хаана ч очсон үүнийхээ ачаар амжилт олдог.
9 Гэм нүглийг хэлтрүүлдэг хүн бусдыг хайрлаж буй хэрэг.
Харин тэр тухай байнга яривал дотнын найзуудыг салгана.
10 Ухаантай хүнийг нэг удаа зэмлэх нь
Мунхаг хүнийг зуун удаа цохихоос илүү үр дүнтэй.
11 Муу хүн тэрслэхийг л боддог.
Харин харгис элч ирж түүнийг шийтгэнэ.
12 Мунхаг явдалдаа автсан тэнэгтэй учирснаас
Бамбаруушнаасаа хагацсан баавгайтай таарсан нь дээр.
13 Сайныг саараар хариулдаг хүний гэрээс
Муу юм салахгүй.
14 Арцалдаж эхлэх нь усны хаалтыг нээхтэй адил.
Хэрүүл гарахаас өмнө холдон яв.
15 Муу хүнийг зөвтгөх, зөв хүнийг буруутгахын аль аль нь
Еховад жигшүүртэй.
16 Тэнэг хүн мэргэн ухааныг олж авах чадалтай байлаа ч
Хүсэлгүй бол ямар хэрэг байх вэ?
17 Жинхэнэ найз ямар ч үед хайраа илэрхийлдэг бөгөөд
Зовох цагт дэм болох гэж төрсөн ах дүү юм.
18 Ухаан муутай хүн батлан даагч болохын тулд
Хөршийнхөө нүдэн дээр гар барин тохиролцдог.
19 Хэрүүлд дурлагч нь нүгэлд дурлаж буй хэрэг.
Үүд хаалгаа томсгодог хүн гай зовлон дуудаж буй хэрэг.
20 Зүрх сэтгэл нь гажуудсан хүн амжилт олохгүй.
Худал ярьдаг хүн сүйрнэ.
21 Мунхгийн эцэг гуниглана.
Мулгуугийн эцэг жаргал үзэхгүй.
22 Баяр хөөртэй зүрх сайн эм.
Гутарсан сэтгэл хүч бардаг.
23 Хар санаатан нууцаар хахууль авч
Шударга ёсыг гажуудуулдаг.
24 Ухааран ялгах чадвартай хүн мэргэн ухаантай болохыг зорьдог.
Харин тэнэгийн нүд дэлхийн хязгаар хүртэл тэнүүчилдэг.
25 Тэнэг хүү эцгээ гуниглуулж,
Эхдээ сэтгэлийн зовлон болдог.
26 Зөв шударга хүнийг шийтгэх* нь сайн биш.
Хүндэт хүмүүсийг ташуурдах нь зөв биш.
27 Мэдлэгтэй хүн үгэндээ хянуур.
Ухааран ялгах чадвартай хүн тайван.
28 Дуугүй байвал мунхаг хүн ч мэргэнд тооцогдоно.
Амаа хамхивал ямар ч хүн ухаантайд тооцогдоно.