Тооллого
10 Дараа нь Ехова Мосед 2 «Чи мөнгө давтаж хоёр бүрээ хий. Тэдгээрийг чуулганыг цуглуулахад болон хуаранг нүүлгэхэд үлээгтүн. 3 Хоёуланг нь үлээвэл хамаг чуулган цугларалтын асрын үүдэнд чам дээр ирэх ёстой. 4 Харин зөвхөн нэгийг нь үлээвэл Израйлын мянгатын дарга нар буюу удирдагчид чам дээр ирнэ.
5 Чамайг бүрээгээ давтамжтай үлээхэд зүүн талын хуарангууд нүүх ёстой. 6 Чамайг хоёр дахь удаагаа давтамжтай үлээхэд өмнө талын хуарангууд нүүнэ. Бүрээг үлээх болгонд ийнхүү хэсэг хэсгээрээ нүүнэ.
7 Харин израйлчуудыг цуглуулахдаа бүрээнүүдийг давтамжгүй үлээгтүн. 8 Тахилчид буюу Аароны хөвгүүд бүрээг үлээх бөгөөд энэ нь үе уламжлан сахих ёстой зарлиг юм.
9 Дайснууд нутаг руу чинь довтлоход тэдэнтэй тулалдахын тулд бүрээг үлээж түгшүүрийн дохио өгөгтүн. Тэгэхэд Ехова Бурхан чинь та нарт анхаарлаа хандуулж, дайснуудаас чинь аварна.
10 Бас баярт үйл явдлуудаар буюу баярууд, саруудын эхэнд шатаалт тахилууд болон эвийн тахилууд өргөхдөө тахилууд руугаа чиглүүлэн бүрээнүүдийг үлээгтүн. Тэдгээр нь Бурхны чинь өмнө та нарын төлөөх сануулга болно. Би бол та нарын Бурхан Ехова» гэж айлдав.
11 Хоёр дахь жилийн хоёр дахь сарын хорины өдөр үүл гэрчлэлийн асрын дээрээс өргөгдөв. 12 Ингээд израйлчууд нүүх дарааллаараа Синаин цөлөөс хөдлөв. Үүл Параны цөлд тогтлоо. 13 Ийнхүү тэд Еховагийн Мосед тушаасан ёсоор анх удаа хөдөлсөн юм.
14 Эхлээд, гурван овгоос бүрдсэн Иудагийн хуаран бүлэг бүлгээрээ* хөдөллөө. Иуда овгийг Амминадабын хүү Нахшон хариуцаж байв. 15 Иссахар овгийг Зуарын хүү Нетанел хариуцаж байв. 16 Зебулун овгийг Хелоны хүү Елиаб хариуцаж байлаа.
17 Шүтлэгийн асрыг буулгаж хураахад гершончууд, мераричууд асрыг аваад хөдлөв.
18 Дараа нь гурван овгоос бүрдсэн Реубений хуаран бүлэг бүлгээрээ хөдөллөө. Реубен овгийг Шедеурын хүү Елизур хариуцаж байв. 19 Симеон овгийг Зуришаддаин хүү Шелумиел хариуцаж байлаа. 20 Гад овгийг Деуелийн хүү Елиасаф хариуцаж байв.
21 Дараа нь кохатчууд асрын ариун эд зүйлсийг авч явав. Тэднийг очиход асрыг босгочихсон байх ёстой байлаа.
22 Тэдний араас гурван овгоос бүрдсэн Ефраимын хуаран бүлэг бүлгээрээ хөдөллөө. Ефраим овгийг Аммихудын хүү Елишама хариуцаж байв. 23 Манассе овгийг Педахзурын хүү Гамалиел хариуцаж байлаа. 24 Бениамин овгийг Гидеонигийн хүү Абидан хариуцаж байв.
25 Сүүлд нь, гурван овгоос бүрдсэн Даны хуаран бусад хуарангаа хамгаалж араас нь бүлэг бүлгээрээ хөдөллөө. Дан овгийг Аммишаддаин хүү Ахиезер хариуцаж байлаа. 26 Ашер овгийг Охраны хүү Пагиел хариуцаж байв. 27 Нафтали овгийг Енаны хүү Ахира хариуцаж байв. 28 Энэ нь израйлчуудын бүлэг бүлгээрээ нүүх дараалал байлаа.
29 Мосе хадам эцэгтээ буюу мидиан хүн Реуелийн хүү Хобабт «Бид одоо Еховагийн өгнө гэж амласан газар нутаг руу явах гэж байна. Ехова израйлчуудын төлөө сайн сайхан амлалт өгсөн учраас хамт яваач. Бид таныг сайн сайхан байлгана» гэхэд 30 хадам эцэг нь: «Би явахгүй ээ. Би төрсөн нутаг, төрөл садан руугаа буцна» гэлээ. 31 Мосе: «Биднийг битгий орхиоч. Та цөлд хаана буудаллахыг мэднэ шүү дээ. Замчлаад яваач. 32 Таныг хамт явбал Еховагийн хүртээх сайн сайхан бүхнийг бид тантай заавал хуваалцана» гэв.
33 Ингээд тэд Еховагийн уулаас хөдөлж гурван хоногийн аянд гарлаа. Амрах газар олдтол тахилчид тэдний өмнө Еховагийн гэрээний авдрыг гурван хоног авч явав. 34 Тэднийг хуарагнасан газраасаа хөдлөхөд өдөр нь Еховагийн үүл тэдний дээр байдаг байв.
35 Авдрыг авч хөдлөх бүрд Мосе: «Даруйхан хөдлөөч, Ехова минь. Дайснууд тань тарж бутарч, таныг үзэн ядагчид өмнөөс тань зугтаг» гэж хэлдэг бөгөөд 36 харин авдрыг буулгаж тавих болгонд «Ехова минь ээ, мянга түмэн израйлчуудтайгаа хамт байгаач» гэдэг байв.