Сургаалт үгс
13 Ухаант хүү эцгийнхээ сургаалыг* дагадаг.
Басамжлагч нь зэмлэж хэлсэн үгийг үл сонсдог.
2 Амнаасаа сайн үг гаргагчид сайныг иднэ.
Урвагчид хүчирхийлэлд дурлана.
3 Амаа захирдаг хүн амиа хамгаалдаг.
Ам хуурай байдаггүй хүн сүйрэлд хүрнэ.
4 Залхуу хүн олон юм хүсдэг ч юу ч үгүй хоцордог.
Хичээнгүй хүний сэтгэл бүрэн ханана.
5 Зөв хүн худал хуурмагийг үзэн яддаг.
Муу хүн бузар булай, ичгүүр сонжуургүй үйл хийдэг.
6 Зөв шударга байдал гэмгүй хүнийг хамгаалдаг.
Бузар муу үйл нүгэлтнийг сүйрүүлдэг.
7 Баян мэт дүр эсгэвч юмгүй хүн байхад,
Ядуу мэт харагдавч их хөрөнгөтэй нэгэн бий.
8 Баян хүн амиа аврахын тулд эд хөрөнгөөсөө өгдөг.
Харин ядуу хүн сүрдүүлэгт өртдөг ч үгүй.
9 Зөв хүний гэрэл тод гэрэлтдэг бол,
Муу хүний дэнлүү бөхнө.
10 Их зан маргаан дагуулна.
Зөвлөгөө хайдаг* хүмүүс мэргэн ухаантай.
11 Хялбар аргаар олсон баялаг* хорогдоно.
Бага багаар хуримтлуулсан хөрөнгө арвижна.
12 Хүсэн хүлээсэн* зүйл биелэхгүй удахад урам хугардаг.
Хүсэл биелэхэд хүч тэнхээтэй болдог*.
13 Зааврыг* басамжлагч горыг нь амсана.
Зарлигийг хүндэтгэгч шагнал хүртэнэ.
14 Мэргэн нэгний сургаал* нь
Үхлийн урхинаас холдуулдаг амийн булаг юм.
15 Хэрсүү хүн сайшаал хүлээнэ.
Итгэл эвдэгч бэрх замаар явна.
16 Хашир хүн мэдлэгийн дагуу үйлддэг.
Харин мунхаг хүн мунхгаа харуулдаг.
17 Хар санаат элч гай зовлонд унана.
Итгэмжит зарлагын үг эдгээнэ.
18 Сахилгын арга хэмжээг* үл тоодог хүн ядуурч гутамшиг болно.
Алдааг нь хэлэхэд* хүлээж авдаг хүн алдар хүндийг олно.
19 Хүсэл нь биелэхэд хүн баярладаг.
Харин мунхаг хүн бузар муу явдлаа орхихыг хүсдэггүй.
20 Ухаант хүнтэй хамт явагч нь мэргэн ухаантай болно.
Мунхаг хүнтэй нөхөрлөгч нь хохирол амсана.
21 Нүгэлтнүүдийг гамшиг дагадаг бол,
Зөв хүмүүс дээр их ивээл буудаг.
22 Сайн хүн үр ачдаа өв хөрөнгө үлдээдэг.
Нүгэлтний эд баялаг зөв хүний төлөө хуримтлагддаг.
23 Ядуу хүний талбайгаас арвин ургац гаравч
Шударга бус явдал түүнийг нь булааж* мэднэ.
24 Хүүгээ шийтгэдэггүй* бол үзэн ядаж байгаагаас өөрцгүй.
Харин хүүдээ хайртай бол хичээнгүйлэн* хүмүүжүүлнэ*.
25 Зөв хүн цадталаа иднэ.
Муу хүний ходоод хонхолзоно.