Дуулал
ХОЁРДУГААР БОТЬ
(Дуулал 42–72)
Удирдаачид зориулав. Корагийн хөвгүүдийн маскил*.
42 Буга голын ус руу тэмүүлдэг шиг,
Би тан руу тэмүүлж байна, Бурхан минь.
2 Би Бурхнаар, амьд Бурхнаар цангаж байна.
Би хэзээ Бурханд бараалхах вэ?
3 Нулимс минь өдөр шөнөгүй миний хоол болсон.
Хүмүүс өдөржин намайг дооглон «Бурхан чинь хаана байна?» гэдэг.
4 Нэгэн цагт би олон түмэнтэй хамт явж байлаа.
Баяр наадмаа ёслон тэмдэглэж
Баясал хөөр, талархал магтаалыг цуурайтуулан алхах
Олон түмний өмнө Бурхны өргөө рүү би ёслол төгөлдөр* явж байлаа.
Энэ бүхнийг санаад сэтгэлээ уудлан сууна.
5 Би юунд цөхөрнө вэ?
Сэтгэл минь яагаад үймнэ вэ?
Бурхныг хүлээ.
Би түүнийг Агуу Аврагч гэж магтана.
6 Бурхан минь, би цөхөрч байна.
7 Таны хүрхрээнүүдийн дуунд
Гүн ус нь гүн усаа дууддаг.
Таны хүчит давлагаанууд намайг нөмөрлөө.
8 Өдөр нь Ехова намайг үнэнчээр хайрлана.
Шөнө нь би Бурхныхаа тухай дуулж, надад амь өгөгч түүнд залбирна.
9 Би Бурхандаа, хаддаа
«Та намайг яагаад мартав?
Би яагаад дайсанд дарлуулж гуниглан явах ёстой юм бэ?» гэж хэлнэ.
10 Өширхөн хорсдог дайснууд* надаар даажигнаж,
Өдөржин намайг дооглон «Бурхан чинь хаана байна?» гэдэг.
11 Би юунд цөхөрнө вэ?
Сэтгэл минь яагаад үймнэ вэ?
Бурхныг хүлээ.
Би түүнийг Агуу Аврагч, Бурхан минь гэж магтана.