Египетээс гарсан нь

21 Дараах хуулийг ард түмэнд дамжуулагтун.

2 Та нар еврей боол худалдаж авбал мөнөөх боол зургаан жил зарцлагдаад долоо дахь жилдээ юу ч төлөхгүйгээр чөлөөлөгдөнө. 3 Тэр боол ганцаараа ирсэн бол ганцаараа явна. Харин эхнэртэйгээ ирсэн бол эхнэр нь бас хамт явах ёстой. 4 Хэрэв эзэн нь түүнд эхнэр өгч, тэр эмэгтэй охид хөвгүүдийг төрүүлсэн бол эхнэр хүүхдүүд нь эзнийх нь мэдэлд үлдэж, мөнөөх боол ганцаараа явна. 5 Харин тэр боол: “Би эзэндээ, эхнэр хүүхдүүддээ хайртай. Би чөлөөлөгдмөөргүй байна” гэж хэлбэл 6 эзэн нь түүнийг хаалга юм уу хатавчных нь дэргэд аваачаад чихийг нь шөвгөөр цоолно. Жинхэнэ Бурхан үүний гэрч мөн. Ингээд тэр хүн насан туршдаа түүний боол байна.

7 Хэрэв хүн охиноо боол болгон зарвал охин нь эрэгтэй боол шиг чөлөөлөгдөхгүй. 8 Хэрэв тэр эмэгтэй эзэндээ таалагдахгүй, эзэн нь түүнийг татвар эмээ болголгүй өөр хүнд зарахаар болбол харь хүнд зарах эрхгүй. Учир нь эзэн нь түүнд шударга бус хандсан юм. 9 Хэрэв хүүдээ эхнэр болгож авахаар бол охин шигээ үзэх ёстой. 10 Тэрбээр* өөр эхнэр авахаар бол анхны эхнэрээ хоол хүнс, хувцас хунараар хангах ёстой бөгөөд эр нөхрийн үүргээ биелүүлэх ёстой. 11 Хэрэв энэ гурвыг биелүүлэхгүй бол тэр эмэгтэй ямар ч мөнгө өгөхгүйгээр чөлөөлөгдөнө.

12 Хүн цохиж алсан хүнийг хөнөөх ёстой. 13 Харин зориудаар алаагүй бөгөөд жинхэнэ Бурхан би тийм юм болохыг зөвшөөрсөн байвал тэр хүн миний зааж өгөх газар луу зугтаж болно. 14 Хэрэв уурлаж хорсоод санаатайгаар хүний аминд хүрсэн бол тэр хүнийг хөнөөх ёстой. Тэр хүн хамгаалуулахыг хүсээд миний тахилын ширээ рүү ирсэн байлаа ч хөнөөгтүн. 15 Эцэг эхээ цохисон хүнийг хөнөөх ёстой.

16 Хүн хулгайлаад зарах юм уу барьцаалсан хүнийг хөнөөх ёстой.

17 Эцэг эхээ хараадаг хүнийг хөнөөх ёстой.

18 Хүмүүс хоорондоо маргалдаж байгаад нэгнийгээ чулуу юм уу гараараа* цохиход тэр хүн үхээгүй ч хэвтэрт орсон бол ингэх ёстой. 19 Тэр хүн босоод таяг тулаад гадуур явж чадаж байвал цохисон хүн нь үхэх ялаас чөлөөлөгдөнө. Харин бүрэн эдгэтэл нь ажилгүй байх хугацааных нь хохирлыг барагдуулах ёстой.

20 Хэрэв эрэгтэй юм уу эмэгтэй боолоо саваагаар цохисноос болж тэр боол эзнийхээ гарт амиа алдвал боолынх нь өшөөг заавал авах ёстой. 21 Харин нэг хоёр өдөр амьд байвал өшөөг нь авах ёсгүй. Учир нь эзэн нь түүнийг мөнгөөрөө худалдаж авсан юм.

22 Хэрэв эрчүүд хоорондоо зодолдож байгаад жирэмсэн эмэгтэйг цохиход хугацаанаасаа өмнө төрсөн хэдий ч эх үрийн хэн хэн нь эндээгүй бол* түүнийг мөнөөх эмэгтэйн нөхрийн шаардсанаар торгож, шүүгчдийн шийдсэнээр төлбөр төлүүлнэ. 23 Харин эндсэн бол амийг амиар төлнө. 24 Нүдийг нүдээр, шүдийг шүдээр, гарыг гараар, хөлийг хөлөөр, 25 түлэгдлийг түлэгдлээр, шархыг шархаар, бэртлийг бэртлээр төлөх ёстой.

26 Хэрэв хүн боол юм уу шивэгчнийхээ нүдийг цохиж гэмтээвэл нүдийг нь гэмтээснийхээ төлөө тэр хүнийг чөлөөлж явуулах ёстой. 27 Боол юм уу шивэгчнээ цохиод шүдийг нь унагавал шүдийг нь унагасныхаа төлөө түүнийг чөлөөлж явуулах ёстой.

28 Бух эрэгтэй юм уу эмэгтэй хүнийг мөргөж албал тэр бух руу чулуу шидэж алах ёстой. Махыг нь идэж болохгүй. Бухын эзэн шийтгүүлэхгүй. 29 Харин мөргөдөг бух байгаад эзэнд нь сануулсан ч хашиж хориогүйгээс болж эрэгтэй юм уу эмэгтэй хүнийг мөргөөд алчихвал тэр бух руу чулуу шидэж алах ёстой. Эзнийг нь ч хөнөөх ёстой. 30 Хэрэв түүнээс нөхөн төлбөр шаардвал, хэд ч бай, шаардсан ёсоор бүгдийг нь төлөөд амиа аварч болно. 31 Бух эрэгтэй юм уу эмэгтэй хүүхдийг мөргөж алсан байлаа ч энэ хуулийн дагуу бухын эзэнд арга хэмжээ авна. 32 Бух эрэгтэй эсвэл эмэгтэй боолыг мөргөж албал бухын эзэн боолын эзэнд 30 шекел* мөнгө өгөх ёстой. Бухыг чулуугаар шидэж алагтун.

33 Хэрэв хүн нүхний тагийг авах юм уу нүх ухаад онгорхой орхисноос болж бух эсвэл илжиг тэр нүхэнд унавал 34 тэр хүн* нөхөн төлбөр өгөх ёстой. Тэрбээр малын эзэнд нөхөн төлбөр өгөх бөгөөд үхсэн мал түүнийх болно. 35 Нэг хүний бух нөгөө хүний бухыг мөргөж бэртээгээд тэр бух үхвэл тэд амьд бухыг зараад мөнгийг нь хувааж авах бөгөөд үхсэн бухыг ч хувааж авна. 36 Харин уг бух мөргөдөг байгаад эзэн нь түүнийг хашиж хориогүй бол үхсэн бухын төлөөсөнд амьд бух өгч, үхсэн бухыг өөртөө авна.