Сургаалт үгс
26 Зун цас, ургацын үеэр бороо орох нь зохимжгүйн адил
Мунхаг хүнд хүндэтгэл зохихгүй.
2 Шувуу зүгээр байж байгаад зугтдаггүй. Хараацай шалтгаангүй нисдэггүй.
Хараал ч бас шалтгаангүйгээр гардаггүй*.
3 Моринд ташуур, илжгэнд хазаар зохидог бол,
Мунхгуудын нуруунд саваа зохино.
4 Мунхаг хүнд мунхгаар нь бүү хариул.
Эс тэгвэл чи түүн шиг болно шүү.
5 Мунхаг хүнд мунхгаар нь хариул.
Тэгвэл тэр өөрийгөө мэргэн цэцэн гэж бодохгүй.
6 Мунхаг хүнд ажил даалгах нь
Хөлөө зэрэмдэглэж, өөрийгөө хохироохтой адил юм.
7 Мунхгуудын амнаас гарах сургаал үг
Доголон хүний муу хөлтэй адил юм.
8 Мунхаг хүнийг алдаршуулах нь
Дүүгүүрт чулуу уяж бөхлөхтэй агаар нэг.
9 Мунхгуудын амнаас гарах сургаал үг
Согтуугийн гар дахь өргөст ургамалтай адил.
10 Тэнэгийг ажилд авах юм уу хажуугаар өнгөрөгчдийг хөлсөлдөг хүн
Хаа хамаагүй харваж байгаад хүмүүсийг* шархдуулдаг харваач лугаа адил.
11 Нохой бөөлжис дээрээ буцаж очдог шиг
Мунхаг хүн мунхаглалаа давтдаг.
12 Өөрийгөө мэргэн гэж боддог хүнийг чи харсан уу?
Мунхаг хүнд түүнээс ч илүү засрах найдвар бий.
13 Залхуу хүн: «Зам дээр залуу арслан байна.
Гудамж талбайд арслан байна!» гэдэг.
14 Хаалга нугасаараа эргэдэг шиг
Лазан хүн орон дээрээ хөрвөөдөг.
15 Лазан хүн тогоотой хоол руу гараа сунгадаг ч
Амандаа хийхээс залхуурдаг.
16 Залхуу хүн өөрийгөө
Мэргэн хариу өгдөг долоон хүнээс ч мэргэн гэж боддог.
17 Замаар явж байгаад бусдын хэрүүлээс болж уурлах нь*
Нохойн чихнээс зуурч авахтай адил.
18 Галт сум харваж, үхлийн жад шиддэг галзуу хүн байдаг.
19 Бусдыг хуурчхаад «Тоглосон юм!» гэж хэлдэг хүн түүнтэй адил.
20 Мод байхгүй бол гал унтарна.
Гүтгэгч байхгүй бол хэрүүл зогсоно.
21 Цог дээр нүүрс, гал дээр мод нэмж өрддөгийн адил
Хэрүүлч хүн хэрүүлийг дэвэргэдэг.
22 Гүтгэгчийн үг амтат зууш мэт бөгөөд
Залгивал шууд ходоодонд ордог.
23 Хар санаа өвөрлөгч энхрий ялдам үг хэлэх нь
Шавар ваарын хэлтэрхийг мөнгөөр бүрэхтэй агаар нэг.
24 Бусдыг үзэн яддаг хүн үзэн ядалтаа үг яриагаараа нуудаг ч
Дотроо бол заль мэхийг агуулж байдаг.
25 Эелдэг найрсаг ярьсан ч түүнд бүү итгэ.
Учир нь түүний зүрх сэтгэлд жигшүүртэй долоон зүйл бий*.
26 Үзэн ядалт нь заль мэхээр далдлагдсан ч
Хорон санаа нь олон түмэнд илчлэгдэнэ.
27 Нүх ухсан хүн нүхэндээ унана.
Чулуу өнхрүүлсэн хүн чулуундаа дарагдана.
28 Худалч хүн өөрт нь хууртсан хүмүүсийг үзэн яддаг.
Зусарч хүн сүйрэл учруулдаг.