Дуулал
Удирдаачид: чавхдаст хөгжимтэй дуулна. Асафын дуу.
76 Бурхан Иудад алдартай.
Нэр нь Израйлд агуу.
2 Түүний орших газар Салемд,
Амьдрах газар нь Сионд байдаг.
3 Тэрбээр тэнд галт сум,
Бамбай, илд, дайны зэвсгийг хугалсан. (Села)
4 Та хурцаар гэрэлтдэг*.
Та ан ихтэй уулсаас ч сүрлэг.
5 Хатан зоригтнууд нь тонуулж,
Үхэж үрэгдэцгээжээ.
Дайчид нь тулалдах хүчгүй байлаа.
6 Иаковын Бурхан та зэмлэхэд
Дайны тэрэг унасан дайчин морьтойгоо үрэгдсэн юм.
7 Та ганцаараа сүрдэн бишрэм.
Таны догшин хилэнг хэн сөрөн зогсох вэ?
8 Шүүх шийдвэрээ тэнгэрээс тунхаглахад тань
Дэлхий айж, дуугаа хураасан.
9 Тэгэхэд Бурхан дэлхийн бүхий л дөлгөөн хүмүүсийг аврахын тулд
Шүүлт явуулахаар боссон. (Села)
10 Хүмүүсийг уурлан хилэгнэхэд та алдаршина.
Тэдний уур хилэнгийн үлдэгдлээр та өөрийгөө чимнэ.
11 Ехова Бурхандаа тангараглаж, тангаргаа биелүүл.
Түүний эргэн тойронд байгаа бүхэн эмээх сэтгэлээр бэлэг авчраг.
12 Тэрбээр бардам удирдагчдыг шалд нь буулгана.
Дэлхийн хаадад айдас төрүүлнэ.