Хоёрдугаар хаад
7 Елиша: «Еховагийн үгийг сонсогтун. “Маргааш өдийд Самарийн дааман хаалган* дээр нэг сеа* сайн гурил нэг шекелээр*, хоёр сеа арвай нэг шекелээр зарагдана” гэж Ехова айлдаж байна» гэлээ. 2 Тэгэхэд нь хааны итгэлийг хүлээсэн түшмэл жинхэнэ Бурхны хүнд «Ехова тэнгэрийн цонхыг нээсэн ч ийм юм болно гэж үү?» гэхэд тэрбээр: «Чи ийм юм болохыг нүдээрээ үзэх боловч тэрнээс идэхгүй» гэжээ.
3 Хотын дааман хаалганы өмнө уяман өвчтэй дөрвөн хүн байсан бөгөөд тэд хоорондоо «Бид яагаад энд суусаар байгаад үхэх ёстой гэж? 4 Хэрвээ бид хот руу орвол өлсгөлөн болж байгаа болохоор тэнд үхнэ. Эндээ суугаад байвал бас л үхнэ. Тийм болохоор сиричүүдийн хуаран руу явцгаая. Тэд бидний амийг хэлтрүүлбэл бид амьд гарна. Харин албал үхнэ» гэж ярилцав. 5 Ингээд тэд харуй бүрийгээр сиричүүдийн хуаран руу явав. Тэднийг сиричүүдийн хуарангийн захад хүрэхэд тэнд хэн ч байсангүй.
6 Учир нь Ехова сиричүүдийн хуаранд дайны тэрэг, морьд, их цэргийн дууг сонсгосон тул тэд хоорондоо «Израйлын хаан бидэнтэй тулалдахаар хитчүүдийн хаад, египетчүүдийн хаадыг хөлсөлсөн байна» гэцгээгээд 7 тэр даруй майхан сав, унаа морьд, илжигнүүдээ орхин хуарангаа тэр чигээр нь хаяад амь зулбан үдшийн бүрийгээр зугтсан байв.
8 Уяман өвчтэй хүмүүс хуарангийн захад хүрээд нэг майхан руу орж идэж ууцгаажээ. Тэгээд тэр майхнаас алт мөнгө, хувцас хунар авч яваад нуув. Буцаж ирээд өөр майхан руу орж, тэндээсээ бас юм авч яваад нуув.
9 Сүүлд нь тэд бие биедээ «Бидний хийж байгаа юм яавч зөв биш. Энэ сайхан мэдээг бусдадаа дуулгасан нь дээр. Хэлэхгүй байсаар байгаад үүр цайлгавал бид шийтгүүлэхгүй өнгөрнө гэж байхгүй. Тиймээс явж энэ тухай хааны ордныхонд мэдэгдье» гэцгээжээ. 10 Тэгээд явж хотын хаалгачдад «Бид сиричүүдийн хуаранд очсон юм. Тэгсэн чинь нэг ч хүн алга, нэг ч хүний дуу сонссонгүй. Морьд, илжигнүүд нь уяатай, майхнууд нь хэвэндээ үлдсэн байна» гэж мэдэгдэхэд 11 хаалгачид бушуухан хааны ордныхонд мэдэгджээ.
12 Тэгтэл хаан шөнөөр босоод албатууддаа «Сиричүүдийн юу сэдсэнийг би та нарт хэлье. Тэд бидний өлсөж байгааг мэдэж байгаа болохоор бидний талаар “Тэднийг хотоосоо гарч ирэхээр нь амьдаар нь барьж аваад хот руу нь оръё” гээд хуарангаа орхиж яваад хээр нуугдсан байж таарна» гэв. 13 Тэгтэл нэг албат нь: «Хотод үлдсэн морьдоос таван морь авч, хэдэн хүн явуулъя. Тэгээд юу болсныг мэдэцгээе. Тэд тийшээ явсан ч, энд байсан ч ялгаагүй л үхнэ. Аль хэдийн үхэж үрэгдсэн израйлчуудтай адилхан л үхнэ. Бид ч бас ялгаагүй» гэлээ. 14 Тэгээд тэд хоёр морин тэрэг авав. Хаан тэднийг сиричүүдийн хуаран руу илгээж «Яваад үзээд ир» гэлээ. 15 Тэд сиричүүдийн мөрөөр Иордан хүртэл явахад замд нь сиричүүдийн сандралдан зугтахдаа хаясан хувцас хунар, эд хэрэгслүүд хаа сайгүй байлаа. Элч нар буцаж ирээд тэр тухай хаанд мэдэгдэв.
16 Тэгэхэд нь самаричууд явж, сиричүүдийн хуаранг тоножээ. Еховагийн айлдсан ёсоор нэг сеа сайн гурил нэг шекелийн үнэтэй, хоёр сеа арвай нэг шекелийн үнэтэй болов. 17 Хаан итгэл хүлээсэн түшмэлээ дааман хаалганы хариуцагчаар томилсон байв. Гэвч тэр түшмэл дааман хаалганы дэргэд олны хөлд гишгүүлэн үхжээ. Жинхэнэ Бурхны хүний хаанд хэлсэн үг ийнхүү хааныг ирэх үед биелсэн юм. 18 Жинхэнэ Бурхны хүн хаанд «Маргааш өдийд Самарийн дааман хаалган дээр хоёр сеа арвай нэг шекелээр, нэг сеа сайн гурил нэг шекелээр зарагдана» гэж хэлж байснаар болсон билээ. 19 Түшмэл жинхэнэ Бурхны хүнд «Ехова тэнгэрийн цонхыг нээсэн ч тийм юм болно гэж үү?» гэхэд Елиша: «Чи ийм юм болохыг нүдээрээ үзэх боловч тэрнээс идэхгүй» гэж хэлж байсан юм. 20 Түшмэлийг дааман хаалганы дэргэд олон хүний хөлд гишгүүлэн үхэхэд энэ үг яг таг биелсэн билээ.