Хоёрдугаар хаад
13 Иудагийн хаан, Ахазиагийн хүү Иехоашийн 23 дугаар онд Иехүгийн хүү Иехоахаз Самарид Израйлын хаан болж 17 жил төр барив. 2 Тэрбээр Еховагийн бузар муу гэж үздэг зүйлсийг хийж, Израйлаар нүгэл үйлдүүлсэн Небатын хүү Иеробоамын нүглийг үйлдсээр байсан бөгөөд огт болиогүй юм. 3 Тиймээс Ехова Израйлд уурлан хилэгнэж тэднийг Сирийн хаан Хазаел болон Хазаелын хүү Бен-хададын эрхшээлд он удаан жил байлгажээ.
4 Хожим нь Иехоахаз Еховагаас таалалдаа багтаахыг гуйхад Ехова түүнийг сонсов. Учир нь тэрбээр Израйлыг Сирийн хаан яаж дарлан зовоож байгааг харсан билээ. 5 Тиймээс Ехова Израйлыг Сирийн дарлалаас чөлөөлөхийн тулд аврагч явуулсан бөгөөд израйлчууд өмнөх шигээ амар жимэр амьдрах болов. 6 (Гэсэн хэдий ч тэд Израйлаар нүгэл үйлдүүлсэн Иеробоамын гэрийнхний үйлдсэн нүглийг үйлдсээр байсан бөгөөд огт болиогүй юм. Ариун шон* Самарид хэвээр үлдэв.) 7 Сирийн хаан Иехоахазын талынхныг хөнөөж үтрэмийн тоос шороо мэт болгож орхисон тул Иехоахазад ердөө л 50 морьтон, 10 морин тэрэг, 10 000 явган цэрэг үлджээ.
8 Иехоахазын бусад түүх, түүний хүч чадал, хийж бүтээсэн бүхэн Израйлын хаадын түүхийн номд бичигдээгүй гэж үү? 9 Иехоахаз эцэг өвгөдийнхөө нэгэн адил нойрссон бөгөөд тэд түүнийг Самарид оршуулав. Түүний хүү Иехоаш оронд нь хаан болжээ.
10 Иудагийн хаан Иехоашийн 37 дугаар онд Иехоахазын хүү Иехоаш Самарид Израйлын хаан болж 16 жил төр барив. 11 Тэрбээр Еховагийн бузар муу гэж үздэг зүйлсийг хийж, Израйлаар нүгэл үйлдүүлсэн Небатын хүү Иеробоамын нүглийг үйлдсээр байсан бөгөөд огт болиогүй юм.
12 Иехоашийн бусад түүх, түүний хүч чадал, хийж бүтээсэн бүхэн, Иудагийн хаан Амазиатай хэрхэн дайтаж явсан зэрэг нь Израйлын хаадын түүхийн номд бичигдээгүй гэж үү? 13 Иехоаш эцэг өвгөдийнхөө нэгэн адил нойрссон бөгөөд Иеробоам* сэнтийд нь залрав. Иехоашийг Самарид Израйлын хаадын булшинд оршуулжээ.
14 Елишаг үхлүүт өвчтэй байхад Израйлын хаан Иехоаш түүн дээр очоод тэврэн уйлж «Эцэг минь, эцэг минь! Израйлын морин тэрэг, морьтнууд аа!» гэж хэлэв. 15 Тэгэхэд нь Елиша: «Нум сумнуудаа ав» гэлээ. Тэрбээр нум сумнуудаа авчээ. 16 Елиша Израйлын хаанд «Харвахад бэлд» гэхэд хаан харвахад бэлдэв. Елиша хааны гар дээр гараа тавиад 17 «Зүүн зүг рүү харсан цонхыг онгойлго» гэхэд онгойлгов. Елишаг «Харва!» гэхэд тэрбээр харвав. Тиймээс Елиша: «Еховагийн ялалтын сум, сиричүүдийг ялах ялалтын сум! Та Афект Сирийг бут цохиж бүрэн ялна» гэлээ.
18 Тэрбээр цааш нь «Сумнуудаа ав» гэхэд хаан сумнуудаа авав. Тэгээд Израйлын хаанд «Сумнуудаараа газар цохь» гэхэд хаан гурван удаа газар цохиод болив. 19 Жинхэнэ Бурхны хүн түүнд ихэд уурлан «Та тав юм уу зургаан удаа газар цохих ёстой байсан юм. Тэгсэн бол Сирийг бут цохиж бүрэн ялах байлаа. Гэхдээ одоо та Сирийг гурван удаа л дийлнэ» гэв.
20 Елиша нас барж, хүмүүс түүнийг оршуулжээ. Үүний дараа жил бүрийн эхээр* Моабын дээрмийн бүлгүүд Израйлд ирдэг болов. 21 Нэг удаа хэдэн хүн нэг эрэгтэйг оршуулж байгаад дээрэмчдийн бүлгийнхнийг харжээ. Тиймээс тэд цогцсыг бушуухан шиг Елишаг оршуулсан газар луу хаяад зугтав. Цогцос Елишагийн яснуудад хүрмэгц амилж, хөл дээрээ зогсжээ.
22 Иехоахазыг төр барьж байх бүхий л хугацаанд Сирийн хаан Хазаел Израйлыг дарлан зовоож байсан юм. 23 Гэсэн хэдий ч Ехова Абрахам, Исаак, Иаковтай байгуулсан гэрээгээ бодоод израйлчуудад сайхан сэтгэл гаргаж, өршөөж, санаа тавьсан билээ. Тэрбээр тэднийг устгахыг хүсээгүй бөгөөд өнөөг хүртэл оршихуйгаасаа зайлуулаагүй юм. 24 Сирийн хаан Хазаел нас барж, оронд нь хүү Бен-хадад нь хаан болжээ. 25 Хазаел Иехоахазтай дайтаад хотуудыг нь авч байсан бөгөөд Иехоахазын хүү Иехоаш Хазаелын хүү Бен-хададаас тэр хотуудыг буцааж авав. Тэгэхдээ Иехоаш Бен-хададыг гурван удаа ялж Израйлын хотуудыг эргүүлж авсан юм.