Тооллого

12 Мосе куш эхнэртэй байсан учраас Мириам Аарон хоёр Мосег муулав. 2 Тэр хоёрыг «Ехова зөвхөн Мосегоор л дамжуулж ярьдаг гэж үү? Биднээр ч гэсэн дамжуулж ярьдаггүй юү?» гэж хэлэхэд Ехова сонсож байлаа. 3 Мосе дэлхийн гадарга дээрх хамгийн номхон дөлгөөн* хүн байв.

4 Тэгтэл Ехова гэнэт Мосе, Аарон, Мириам нарт «Та гурав цугларалтын асар луу оч» гэв. Тэгэхэд тэр гурав явжээ. 5 Ехова үүлэн баганан дотор буун ирж асрын үүдэнд зогсоод Аарон Мириам хоёрыг дуудав. Тэр хоёр урагш гарлаа. 6 Тэгэхэд тэрбээр: «Үгийг минь сонсогтун. Хэрэв та нарын дунд Еховагийн зөнч байсан бол би түүнд өөрийгөө үзэгдлээр мэдүүлж, зүүдэнд нь ярих байсан. 7 Миний үйлчлэгч Мосегийн хувьд бол өөр. Би ард түмнээ бүгдийг нь Мосед хариуцуулсан*. 8 Би түүнтэй шууд илэн далангүй ярьдаг. Битүү утгатай үгээр ярьдаггүй. Ехова би дүр төрхөө Мосед харуулдаг. Тийм байтал та нар яагаад миний үйлчлэгч Мосегийн тухай муулахаас айсангүй вэ?» гэлээ.

9 Ехова тэдэнд уурлан хилэгнэж тэднээс салж явав. 10 Үүл асрын дээрээс нүүхэд Мириам уяман өвчин тусаж цас мэт цагаан болов. Аароныг Мириам руу эргээд хартал Мириам уяман өвчтэй болсон байлаа. 11 Тэр даруй Аарон Мосед «Эзэнтэн минь, танаас гуйя! Энэ нүглийн шийтгэлийг бидний дээр битгий буулгаач. Бид бодлогогүйгээр энэ нүглийг үйлджээ. 12 Мириамыг эхийн хэвлийгээс хамаг бие нь зулгарч гарсан амьгүй хүүхэд шиг үхсэнээс өөрцгүй битгий байлгаач» гэлээ. 13 Тэгэхэд Мосе: «Бурхан минь, Мириамыг эдгээгээч, гуйя!» хэмээн Ехова руу хашхирлаа.

14 Ехова Мосед «Хэрэв эцэг нь түүн рүү нулимбал тэрбээр долоон хоног гутамшиг болохгүй гэж үү? Мириамыг хуарангийн гадна долоон хоног тусгаарлаад буцааж оруулж ир» гэв. 15 Тэгээд Мириам хуарангийн гадна долоон хоног тусгаарлагдлаа. Мириамыг буцаж орж иртэл хуарагнасан ард олон нүүсэнгүй. 16 Тэгээд ард олон Хазеротоос хөдөлж Параны цөлд буудаллалаа.