Сургаалт үгс
2 Тэнэг хүн юм ойлгохыг хүсдэггүй.
Өөрийнхөө санааг л хэлэх дуртай.
3 Хар санаатныг жигшил зэвүүцэл дагалддаг.
Ичгүүрт явдлыг доромжлол гутамшиг дагалддаг.
4 Хүний амнаас гарах үг гүн ус мэт.
Мэргэн ухааны ундарга нь хоржигнон урсах горхи мэт.
5 Муу хүнд тал засах юм уу
Зөв хүнд шударга бус хандах нь сайн биш.
6 Тэнэгийн яриа хэрүүл маргаанд хүргэдэг.
Түүний ам зодоон цохионыг урьж залдаг.
7 Тэнэг хүн амнаасаа болж сүйрнэ.
Уруулаасаа болж амь насаа урхинд оруулна.
8 Гүтгэгчийн үг амтат зууш мэт бөгөөд
Залгивал шууд ходоодонд ордог.
9 Залхуу ажилчин бол
Сүйтгэгчийн ах дүү юм.
10 Еховагийн нэр бат цамхаг.
Зөв шударга хүн тийшээ гүйж очоод хамгаалагддаг.
11 Баян хүн эд хөрөнгөө бэхлэгдсэн хот гэж боддог,
Өндөр хэрэм гэж төсөөлдөг.
12 Зүрхэн дэх бардамнал сүйрэлд хүргэдэг.
Даруу зан нэр алдарт хүргэдэг.
13 Сонсохоосоо өмнө хариулах нь
Ичгүүргүй, мунхаг явдал билээ.
14 Сэтгэлийн хаттай хүн өвчнийг тэсвэрлэдэг.
Харин цөхөрсөн сэтгэлийг хэн тэвчих вэ?
15 Ухамсарт хүний зүрх мэдлэг олж авдаг.
Мэргэн хүний чих мэдлэгийг эрж хайдаг.
16 Бэлэг сэлт өгсөн хүний өмнө үүд хаалга нээгддэг.
Хүндэт хүмүүстэй учрах боломж олддог.
17 Сөргөлдөгч талын хүн ирж асууж шалгаахаас нааш
Хэргээ мэдүүлсэн эхний хүний зөв юм шиг байдаг.
18 Хаясан шавга хэрүүлийг зогсоож,
Хүчтэй өрсөлдөгчдийн маргааныг шийдвэрлэдэг.
19 Гомдсон ах дүү бэхлэгдсэн хотоос илүү нэвтрэхийн аргагүй байдаг.
Цайзын түгжээтэй хаалга мэт хэрүүл маргаан ч бий.
20 Хүний амнаас гарсан үг гэдсийг нь дүүргэдэг хоолтой адил.
Тэрбээр хэлсэн үгийнхээ үр дүнг үзнэ.
21 Хэл бол үхүүлэх ч, амьдруулах ч хүчтэй.
Ярих дуртай хүмүүс үр дүнг нь үзнэ.
22 Сайн эхнэр олох нь эрдэнэ олохтой адил юм.
Тийм хүн Еховагийн сайшаалыг хүлээдэг.
23 Ядуу хүн гуйж ярьдаг.
Баян хүн ширүүн хариулдаг.
24 Нэгнийгээ сүйрүүлэхэд бэлэн найзууд байдаг бол,
Ах дүүгээс ч дотно андууд бий.