Сургаалт үгс
20 Дарс бол даапаалагч, архи бол агсамнагч.
Эдгээрээс болж замаасаа хазайдаг хэн боловч мунхаг.
2 Хаан ард олныг айлгадаг нь арслан архирах мэт.
Хилэнг нь хөдөлгөсөн хэн боловч амь насандаа аюул учруулдаг.
3 Маргаанаас зайлсхийдэг хүн хүндэтгэл хүлээдэг.
Харин мунхаг хүн бүр хэрүүл маргаанд оролцоно.
4 Залхуу хүн тэнгэр муу байна гээд газраа хагалдаггүй.
Ургац хураах үед юу ч үгүй хоцорсноосоо болж гуйлга гуйдаг*.
5 Хүний санаа бодол гүн ус мэт ажээ.
Ухаантай хүн түүнийг нь гадагш гаргана.
6 Үнэнчээр хайрладаг гэж ярьдаг хүн олон ч
Итгэл даадаг нь ховор.
7 Зөв хүн үнэнч шударга амьдардаг.
Тийм хүний үр хүүхэд жаргалтай.
8 Хаан шүүх ажиллагаа явуулахаар сэнтийдээ залрахдаа
Харцаараа хамаг л муу муухайг ялгаж салгадаг*.
9 «Би сэтгэл зүрхээ ариусгасан.
Би нүгэлгүй, цэвэр» гэж хэн хэлж чадах вэ?
10 Хуурамч туухай, хуудуутай хэмжүүрийн*
Аль алийг Ехова жигшдэг.
11 Балчир хүүхэд хүртэл цэвэр ариун, зөв шударга эсэхээ
Үйлсээрээ таниулдаг.
12 Сонсох чих, харах нүдний
Аль алийг Ехова бүтээсэн.
13 Нойронд бүү дурла. Үгүй бол чи ядуурна шүү.
Нүдээ нээ. Тэгвэл чи хоол хүнсээр элбэг дэлбэг байна.
14 Худалдан авагч: «Энэ ч муу, тэр ч муу!» гэдэг.
Авсныхаа дараа өөрөөрөө сайрхдаг.
15 Мэдлэгтэй хүний яриа
Их алт, элбэг шүрнээс* ч үнэтэй.
16 Танихгүй хүний батлан даагч болсон хүнээс хувцсыг нь ав.
Харь эмэгтэйн* батлан даагч болсон хүнээс барьцаа ав.
17 Худал хэлж олсон талх амттай санагдавч
Эцэст нь тэр хүний ам хайргаар дүүрнэ.
18 Зөвлөлдвөл төлөвлөгөө бүтнэ.
Мэргэн удирдамжийн* дагуу тулалд.
19 Гүтгэгч хаа сайгүй явж нууцыг задруулдаг.
Хов жив ярих дуртай* хүнтэй бүү нөхөрлө.
20 Эцэг эхээ хараадаг хүний дэнлүү
Харанхуй нөмрөхөд бөхнө.
21 Шунахай хүн эхэндээ эд хөрөнгө оловч
Эцэстээ ивээл хүртэхгүй.
22 «Мууг муугаар хариулна даа» гэж бүү хэл.
Еховад найд. Тэрбээр чамайг аварна.
23 Хуурамч туухайг* Ехова жигшдэг.
Хуудуутай дэнс сайн биш.
24 Ехова хүний зам мөрийг удирдан чиглүүлдэг.
Хүн ямар замаар явахаа хэрхэн мэдэх билээ?
25 Бурханд яаран тангараглачхаад*
Дараа нь тангаргаа бодох нь урхи юм.
26 Мэргэн хаан муу хүмүүсийг шигшиж,
Тариа цайруулдаг дугуйг дээгүүр нь өнхрүүлнэ.
27 Хүний үг яриа* Еховагийн дэнлүү адил бөгөөд
Зүрх сэтгэлийнх нь гүнд юу нуугдсаныг илчилдэг.
28 Үнэнч хайр, итгэмжит байдал хааныг хамгаалдаг.
Түүний үнэнч хайраар сэнтий нь бат тогтдог.
29 Бяр чадал залуусын суу алдар.
Буурал үс өтгөсийн сүр жавхлан.
30 Шийтгэл* бузар мууг зайлуулдаг.
Зодуур зүрх сэтгэлийг ариусгадаг.