«Ямар тушаал нь бүхний эхэнд байх вэ?»

Бурхны тааллыг олохын тулд яах хэрэгтэй вэ? Олон хууль тушаал сахиж мөрдөх ёстой юу? Үгүй ээ, тэгэх шаардлагагүй. Бурхны Хүү Есүс Христийн хэлснийг үзвэл Бурхан ямар шаардлага тавьдгийг ганц үгээр хэлж болно (Марк 12:28–31-ийг уншина уу).

Есүс энэ үгийг хэзээ хэлсэн бэ? Нисан сарын 11-нд буюу үхэхээсээ хэдхэн хоногийн өмнө сүмд сургаал айлдаж байхдаа хэлжээ. Дайснууд нь Есүсийг ээдрээтэй асуултаар унагахыг оролдож байлаа. Есүс асуусан болгонд нь хариулахад тэд хэлэх үггүй болж байв. Гэхдээ «Ямар тушаал нь бүхний эхэнд байх вэ?» гэж түүнээс асуув (28-р зүйл).

Энэ асуултад хариулах тун амаргүй байлаа. Учир нь Мосегийн хуулийн 600 гаруй заалтын аль нь хамгийн чухал бэ гэж маргадаг хүмүүс байхад хуулийн бүх заалт чухал, аль нэгийг нь нөгөөгөөс нь чухалд үзэх нь буруу гэж тайлбарладаг хүмүүс ч байв. Тэгвэл Есүс юу гэж хариулах бол?

Тэрбээр нэг биш, хоёр тушаал хэлжээ. Эхлээд «Чи өөрийн Бурхан Эзэнийг бүх зүрх, бүх сэтгэл, бүх оюун ухаан, бүх хүчээрээ хайрлагтун» гэж хэлдэг (30-р зүйл; Дэд хууль 6:5). Энэ нь Ехова Бурханд ур чадвар, хүч тэнхээ, эд хөрөнгөө харамгүй зориулан, байгаа бүхнээрээ хайрлах ёстой гэсэн үг. Энэ тухай нэгэн бүтээлд «Бурхныг хайрлахад хүн өөрийгөө тэр чигээр нь зориулах учиртай» гэж тайлбарлажээ. Бурхныг ингэж хайрладаг хүн өдөр бүр таалалд нь нийцүүлж амьдрахыг хамаг чадлаараа хичээдэг (1 Иохан 5:3).

Дараа нь Есүс: «Чи хөршөө өөр шигээ хайрла» хэмээсэн (31-р зүйл; Левит 19:18). Бурхныг хайрлах, хөршөө буюу бусдыг хайрлах гэдэг нь салшгүй холбоотой ойлголт юм. Бусдыг хайрлах сэтгэл Бурхныг хайрлах сэтгэлээс урган гардаг (1 Иохан 4:20, 21). Бусдыг өөрийн адил хайрладаг хүн хүмүүсийг өөрт нь яаж хандаасай гэж хүснэ, хүмүүст тэгж л ханддаг (Матай 7:12). Ингэх нь хүнийг дүр төрхөөрөө бүтээсэн Бурхныг хайрлаж байгаа хэрэг (Эхлэл 1:26).

Бурхныг болон бусдыг хайрла хэмээсэн тушаалыг сахих нь хэр зэрэг чухал бэ? «Эдгээрээс илүү өөр агуу тушаал байхгүй» гэж Есүс хэлсэн (31-р зүйл). Библийн өөр нэг номд тэмдэглэснээр, Есүс энэ хоёр тушаалыг бусад бүх тушаалын тулгуур гэжээ (Матай 22:40).

Тэгэхлээр, Бурхны тааллыг олох нь хүний хэрээс хэтэрсэн юм биш ээ. Бурхны бүх шаардлагыг «хайр» гэдэг ганц үгээр илэрхийлж болно. Цэвэр шүтлэгийн мөн чанар нь хайр байсан, байх ч болно. Гэхдээ хайр гэдэг нь үг яриа, сэтгэл мэдрэмж төдий юм биш. Хайр үйл хэргээр илэрдэг (1 Иохан 3:18). Ехова «Бурхан бол хайр билээ». Еховаг хэрхэн хайрлаж, хайраа хэрхэн илэрхийлж болохыг мэдмээр байна уу? (1 Иохан 4:8).