Бүү хойш суугаарай—Өөрийгөө голдог бол
1. Зарим хүн Библийн хичээл хийхээс хойш суудгийн учир юу вэ?
1 Үр дүнтэй зааж чадахгүй байх гэж бодоод Библийн хичээл эхлэхээс та хойш суудаг уу? Мосе Иеремиа гэх мэтийн үнэнч хүмүүс Бурхны өгсөн даалгаврыг биелүүлж чадахгүй гэж нэгэн үе бодож байжээ (Ег. 3:10, 11; 4:10; Иер. 1:4–6). Олон хүн тэгж боддог. Тэгвэл яавал өөрийгөө голохгүй байх вэ?
2. Айлаар дэлгэрүүлж, бусдад Библийн хичээл хийх хүн олж өгөх төдийхнөөр сэтгэл ханаж болохгүйн учир юу вэ?
2 Ехова хэр чадлаас маань хэтэрсэн юм шаарддаггүйг санах хэрэгтэй (Дуу. 103:14). Тийм учраас шавь бэлдэж, тэдэнд «заах» даалгавраа биелүүлж чадна (Мат. 28:19, 20). Ехова бидний дундаас хамгийн туршлагатай, хамгийн авьяастайд нь л энэ ажлыг даалгасан юм биш ээ (1 Кор. 1:26, 27). Тийм болохоор айлаар дэлгэрүүлж, бусдад Библийн хичээл хийх хүн олж өгөх төдийхнөөр сэтгэл ханаж болохгүй.
3. Библийн хичээл заах ажилд Ехова хэрхэн сургадаг вэ?
3 Ехова биднийг сургадаг: Шавь бэлдэх ажлыг Ехова зааж өгдөг (2 Кор. 3:5). Энэ ертөнцийн өндөр боловсролтой хүмүүсийн мэддэггүй Библийн үнэнийг Ехова байгууллагаараа дамжуулан зааж өгсөн (1 Кор. 2:7, 8). Дагаж дууриагаасай гэсэндээ Агуу Багш Есүсийн заах аргыг бичиж тэмдэглүүлсэн. Түүнчлэн хурлаар дамжуулан байнгын сургалт зохион байгуулдаг. Үнэнийг логик сайтай, ойлгомжтой тайлбарласан «Библийн сургаал» ном гэх мэтийн багажийг хангаж өгдөг. Библийн хичээл заах ажил бодсон шиг маань тийм хэцүү биш ээ.
4. Ехова тусална гэдэгт яагаад итгэж болох вэ?
4 Мосе Иеремиа нар Еховагийн тусламжтайгаар даалгавраа биелүүлж чадсан (Ег. 4:11, 12; Иер. 1:7, 8). Бид ч бас Еховагаас тусламж гуйх учиртай. Тэгээд ч Библийн хичээл хийж, Еховагийн тухай үнэнийг заавал түүнд таалагдана (1 Иох. 3:22). Тийм учраас хамгийн сайхан, хамгийн их ивээл хүртдэг ажил болох Библи заах ажилд оролцохыг зорилгоо болгоорой.