Хайраа илэрхийлээрэй

Асуудал юунд байна вэ?

Алагчлах үзэл тийм амар арилж, алга болдоггүй. Вирусыг биеэс арилгахад нэлээн хугацаа хэрэгтэй байдаг шиг алагчлах үзлээ таягдан хаяхад бас хугацаа хэрэгтэй. Сэтгэл дотроо ч хүнийг алаг үзэхгүйн тулд яах вэ?

Библийн зарчим

Зургууд: 1. Ази эрэгтэй кофе барьсан хар арьстай хүнд хаалга нээж өгч байна. 2. Нөгөө хар арьстай хүн ажлынхнаа кофегоор дайлж байна. Дунд нь нөгөө энэтхэг эмэгтэй сууж байна.

«Хайрыг өмс. Хайр бол эв нэгдлийн төгс холбоос юм» (КОЛОСАЙ 3:14).

Юу гэсэн үг вэ? Нэг нэгэндээ сайхан сэтгэл гаргах нь хүмүүсийг дотно болгодог. Бусдад хайраа илэрхийлэх тусам алагчлах үзэл арилна. Хайрын сэтгэлээ илэрхийлэхийн хэрээр үзэн ядах, дорд үзэх сэтгэл төрөхөө болино.

Яах хэрэгтэй вэ?

Зургууд: 1. Настай кавказ эмэгтэй шатаар гарахдаа тортой юмаа энэтхэг эмэгтэйд бариулаад туслуулж байна. 2. Настай кавказ эмэгтэй хөрш болох нөгөө ази эрэгтэйд жигнэмэг авчирч өгч байна.

Дургүйцэж явдаг бүлгийн хүндээ хайраа илэрхийлэх хэдэн аргыг бодож үзээрэй. Заавал төвөгтэй, сүртэй юм хийх албагүй. Дараахаас ганц хоёрыг нь хийгээд үзээрэй.

Хайрын сэтгэлээр хийсэн багахан үйлс алагчлах үзлийг арилгадаг

Нийтийн тээврээр явж байхдаа тэдэнд суудал тавьж өгөх юм уу хаалга онгойлгож өгөх гэх мэтээр соёлтой байгаарай.
Танай хэлээр чөлөөтэй ярьдаггүй байлаа ч энгийн юм ярих гэж оролдоорой.
Ойлгомжгүй үйлдэл гаргасан ч тэвчээртэй байгаарай.
Тулгарч буй бэрхшээлээ ярихад нь хүнлэг сэтгэлээр сонсоорой.

Бодит амьдрал дээрх жишээ: Назаре (Гвиней-Бисау)

«Би цагаачдыг алаг үздэг байлаа. Тэднийг нийгмийн халамж үйлчилгээ авахын тулд заль зохиодог, ихэнх нь гэмт хэрэгт орооцолдсон хүмүүс гэж сонсож байсан. Тийм болохоор тэднийг хүлээн зөвшөөрч чаддаггүй байв. Ихэнх хүн цагаачдад дургүй байдаг болохоор ч тэр үү, би өөрийгөө тэднийг алаг үзэж байна гэж бодоогүй.

Тэгээд цагаачдад таагүй ханддаг маань ялгаварлан гадуурхах хандлага юм байна гэж ойлгосон. Библийн мэргэн зөвлөгөө тэднийг илүү хайрлахад надад тусалсан. Одоо би тэднээс зугтаж, зай барьдаггүй. Харин ч тэдэнтэй мэндэлж ярьдаг болсон. Тэднийг хувь хүн талаас нь мэдэхийг хичээж байна. Би одоо тэр хүмүүсийн тухай өөдрөг бодолтой явдаг. Тэдэнтэй харьцахад амар болсон».