Бурхны үйлчлэгчийн амьдрал, үйл хэрэг цуглааны заавар

Гарчиг

1. Энэхүү заавар нь Амьдрал, үйл хэрэг цуглаан дээр даалгавар биелүүлэх бүх хүнд тустай. Даалгавраа бэлдэхээсээ өмнө «Амьдрал, үйл хэрэг цуглаанаар үзэх материал» болон энэ зааврыг сайн уншиж, сайтар танилцаарай. Оноосон даалгаврыг биечлэн биелүүлэхийг бүх дэлгэрүүлэгчид уриалах ёстой. Цуглаанд ирдэг идэвхтэй сонирхогчид Библийн сургаалыг хүлээн зөвшөөрч, Христийн дагалдагчдын баримталдаг зарчмын дагуу амьдарч байгаа бол даалгавар биелүүлж болно. Дэлгэрүүлэгч биш мөртлөө даалгавар биелүүлэх хүсэлтэй тийм хүнтэй Амьдрал, үйл хэрэг цуглааны хариуцагч уулзаж ямар шаардлага тавигддаг талаар ярилцаад шаардлагыг хангаж байгаа эсэхийг хэлж өгнө. Энэ ярилцлагыг библийн хичээл явуулдаг багшийнх нь хамт (эсвэл итгэгч эцэг/эхийн хамт) хийнэ. Тэгээд тухайн хүн цаашдаа баптисм хүртээгүй дэлгэрүүлэгч болохыг хүсвэл дээрхийн адил шаардлага хангасан эсэх талаар ярилцлага хийнэ.—еб 8-р бүлэг д/м 8.

ЭХНИЙ ҮГ

2. Нэг минут. 7 хоног бүр Амьдрал, үйл хэрэг цуглааны хөтлөгч эхний дуу болон залбирлын дараа тухайн цуглааны хөтөлбөрөөр үзэх зүйлсийг онцлон хүргэнэ. Хөтлөгч хуралд хамгийн хэрэгтэй гэсэн санааг онцолно.

БУРХНЫ ҮГЭН ДЭХ ЭРДЭНЭС

3. Илтгэл: Арван минут. «Амьдрал, үйл хэрэг цуглаанаар үзэх материал»-д тодорхой сэдэв бүхий хоёроос гурван гол санааг багтаасан тойм бий. Энэ илтгэлийг ахлагч юм уу чадварлаг туслах үйлчлэгч тавина. Тухайн 7 хоногт Библиэс шинэ ном уншиж эхэлсэн бол тэр номыг танилцуулах видеог үзүүлнэ. Илтгэгч уг видеоноос илтгэлийн сэдэвтэй холбоотой зүйлийг хэлж болох юм. Гэхдээ цуглаанаар үзэх материалд буй тоймын гол санааг илтгэлдээ заавал оруулах ёстой. Мөн цагтаа багтахаар бол, үзэж байгаа материалтай холбоотой зургаас тайлбарлана. Тоймын гол санааг тодруулахад хэрэгтэй зарим судалгааны нэмэлт материалаас бас тайлбарлаж болох юм.

4. Эрдэнэс хайх нь: Арван минут. Энэ хэсгийг ахлагч юм уу чадварлаг туслах үйлчлэгч оршил, дүгнэлт хэлэхгүйгээр асуулт хариултын журмаар хөтөлнө. Хөтлөгч хоёр асуултыг хоёуланг нь асуух ёстой. Библийн зүйлийг уншуулах эсэхээ өөрөө шийдэж болно. Сонсогчид 30 секундэд багтааж хариулах хэрэгтэй.

5. Библиэс унших: Дөрвөн минут. Энэ даалгаврыг эрэгтэй сурагч биелүүлнэ. Уншихдаа оршил, дүгнэлт хэлэхгүй. Цуглааны хөтлөгч даалгавар биелүүлж буй хүнд материалаа ойлгож, алдаагүй, түгдрэхгүй, утгын өргөлт, зогсцыг зөв тавьж, аялгаа зөв өөрчлөн, яруу тод уншиж сурахад нь туслахыг анхаарна. Библийн унших хэсэг зарим нь урт, зарим нь богино байдаг учраас Амьдрал, үйл хэрэг цуглааны хариуцагч сурагчдад даалгавар өгөхдөө тэдний чадварыг харгалзан үзэх хэрэгтэй.

ДЭЛГЭРҮҮЛЭХ ЧАДВАРАА САЙЖРУУЛАХ НЬ

6. Арван таван минут. Цуглааны энэ хэсгээр бүх хүн дэлгэрүүлэх ажлын дадлага хийж, дэлгэрүүлэх болон заах чадвараа сайжруулах боломжтой. Шаардлагатай бол ахлагчид даалгавар биелүүлнэ. Сурагч бүр «Амьдрал, үйл хэрэг цуглаанаар үзэх материал»-д заасан «Зааж сургах» товхимол аль эсвэл «Хүмүүсийг хайрла» товхимлоос ажиллах хэсгийг сайн уншиж түүний дагуу даалгавраа биелүүлнэ. Зарим үед энэ хэсгийг хэлэлцүүлэг хэлбэрээр явуулна. Үүнийг ахлагч эсвэл шаардлага хангасан туслах үйлчлэгч удирдан явуулна.—Хэлэлцүүлгийг хэрхэн явуулах талаар 15-р догол мөрд тайлбарласан байгаа.

7. Яриа эхлэх: Энэ даалгаврыг эрэгтэй, эмэгтэй сурагчдын хэн нь ч биелүүлж болно. Туслах нь эсрэг хүйсийн хүн байж болохгүй. Гэхдээ гэр бүлийнх нь гишүүн бол туслагч нь байж болно. Даалгавар биелүүлэхдээ суух юм уу зогсох эсэхээ өөрөө шийднэ.—Даалгавраа ямар агуулгаар ямар нөхцөлд биелүүлэх талаарх мэдээллийг 12, 13-р догол мөрөөс аваарай.

8. Давтан уулзах: Энэ даалгаврыг эрэгтэй эмэгтэй сурагчдын хэн нь ч биелүүлж болно. Туслах нь эсрэг хүйсийн хүн байж болохгүй (km 5/97 p. 2). Даалгавар биелүүлэхдээ суух юм уу зогсох эсэхээ өөрөө шийднэ. Анх уулзахад сонирхсон хүнтэй дахин уулзаж байгаагаар үзүүлэх ёстой.—Даалгавраа ямар агуулгаар ямар нөхцөлд биелүүлэх талаарх илүү дэлгэрэнгүй мэдээллийг 12, 13-р догол мөрөөс аваарай.

9. Шавь бэлдэх: Энэ даалгаврыг эрэгтэй эмэгтэй сурагчдын хэн нь ч биелүүлж болно. Туслах нь эсрэг хүйсийн хүн байж болохгүй (km 5/97 p. 2). Даалгавар биелүүлэхдээ суух юм уу зогсох эсэхээ өөрөө шийднэ. Энэ даалгавраар тогтмол хийдэг Библийн хичээлийг үзүүлэх ёстой. Оршил үг юм уу дүгнэлттэй холбоотой хичээл дээр ажиллаагүй бол оршил, дүгнэлт хэлэх шаардлагагүй. Даалгавар биелүүлэхдээ үндсэн материалыг бүгдийг нь уншуулж болох ч ингэх шаардлагагүй.

10. Итгэл үнэмшлээ тайлбарлах: Илтгэл тавих бол энэ даалгаврыг эрэгтэй сурагч биелүүлнэ. Хэрвээ дэлгэрүүлж байгаагаар үзүүлбэр үзүүлэх бол эрэгтэй, эмэгтэй сурагчдын хэн нь ч биелүүлж болно. Туслах нь эсрэг хүйсийн хүн байж болохгүй, харин гэр бүлийн гишүүн нь байж болно. Тайлбарт байгаа мэдээллийг ашиглаад гол санааг тодорхой, ойлгомжтой тайлбарлах хэрэгтэй. Даалгавраа биелүүлэхдээ байгууллагын хэвлэлээс эш татсан тайлбарыг ашиглах эсэхээ өөрөө шийдэнэ.

11. Илтгэл: Энэхүү даалгаврыг эрэгтэй сурагч биелүүлэх бөгөөд илтгэл тавина. Илтгэлийг «Хүмүүсийг хайрла» товхимлын Хавсралт A-д байгаа нэг санаанд үндэслэн тавих бол библийн зүйл(үүд)ийг дэлгэрүүлэх ажилд хэрхэн ашиглаж болохыг онцолно. Жишээлбэл: тухайн Библийн зүйлийг хэдийд ашиглаж болох, ямар утга санаа илэрхийлж байгааг, айлын хүнтэй яаж тэр талаар яриа өрнүүлэх гэх мэтийг онцолж болно. Харин илтгэлдээ «Хүмүүсийг хайрла» товхимлын аль нэг хичээлээс нэг санааг онцлох бол тэр санааг дэлгэрүүлэх ажилд хэрхэн хэрэгжүүлж болохыг анхаарах ёстой. Ингэхдээ тэр санааг тайлбарласан жишээг ярих юм уу тэр хичээл дээр эш татаагүй библийн зүйлүүдээс сонгоод ярьж болно.

12. Агуулга: Энэ догол мөр болон дараагийн догол мөрд байгаа материал «Яриа эхлэх», «Давтан уулзах» даалгавартай холбоотой. Сурагчид ярилцаж байгаа хүндээ библийн үнэнийг мэдүүлэх, дахин уулзах үндэс тавих зорилготой. Тиймээс нутгийнхаа хэрэгцээнд тохирсон цагаа олсон, үр дүнтэй сэдвийг сонгох шаардлагатай. Заах ажлын багажны хайрцгаас ямар хэвлэл өгөх эсвэл ямар видео үзүүлэх эсэхээ өөрөө шийднэ. Цээжилсэн юмаа л хэлэхийн оронд ярилцаж буй хүндээ санаа тавьж, сэтгэлээсээ хандах зэргээр яриа эхлэх чадвараа дадлагажуулах хэрэгтэй.

13. Нөхцөл: Заасан нөхцөлийг нутгийнхаа хэрэгцээнд тохируулан үзүүлнэ. Жишээ нь:

(1) Айлаар: Айлаар дэлгэрүүлэх гэдэгт дараах нөхцөлүүд орно—айлаар явах, утсаар, захиагаар дэлгэрүүлэх—бас айлаар дэлгэрүүлээд ярилцсан хүнтэй давтан уулзах.
(2) Албан бусаар дэлгэрүүлэх: Энгийн зүйл ярилцаж байгаад яриагаа Библи рүү хандуулан гэрчлэх нөхцөл юм. Үүнд ажил, сургууль дээр, амьдардаг газартаа, нийтийн тээврийн хэрэгслээр зорчих үедээ, эсвэл хаа ч явсан тааралдсан хүнтэйгээ Библиэс ярилцах орно.
(3) Нийтэд дэлгэрүүлэх: Үүнд дугуйтай тавиуртай дэлгэрүүлэх, бизнесийн байгууллагад ажилладаг хүмүүст дэлгэрүүлэх, гудамжаар, цэцэрлэгт хүрээлэн, машины зогсоол гэх мэт ер нь хүмүүстэй үүлзах боломжтой газрууд орно.

14. Видео болон ном хэвлэлийг ашиглах: Нөхцөл байдлаас шалтгаалаад сурагч видео үзүүлэх үү, ном хэвлэл өгөх үү гэдгээ өөрөө шийднэ. Хэрвээ даалгаврын нөхцөл видео үзүүлэх бол эсвэл өөрөө видео үзүүлэхээр шийдвэл эхлээд ямар видео үзүүлэх гэж байгаагаа хэлээд ярилцаж болно. Үзүүлэх хэрэггүй.

БУРХНЫ ҮЙЛЧЛЭГЧИЙН ЁСООР АМЬДРАХ НЬ

15. Дуу дуулсны дараах 15 минутад, Бурхны Үгийг хэрэгжүүлэхэд сонсогчдод туслах зорилгоор бэлтгэсэн нэг юм уу хоёр хөтөлбөр явуулна. Өөрөөр заагаагүй бол эдгээр хөтөлбөрийг ахлагч юм уу чадварлаг туслах үйлчлэгчид даалгана. Гэхдээ хурлын хэрэгцээг зөвхөн ахлагч хөтөлнө. Хэрвээ энэ хэсэгт Амьдрал үйл хэрэг цуглаанаар үзэх материалд гарсан өгүүллийг хэлэлцэх бол хөтлөгч өгөгдсөн асуултаас гадна нэмэлт асуултууд асууж болно. Товчхон оршил үг хэлээд гол санааг онцлох болон сонсогчдод хариулахад хангалттай цаг гаргаарай. Хэрвээ ярилцлага авах бол суудлаас биш тайзан дээр энэ хэсгийг явуулбал илүү сайн.

16. Библи судлал: Гучин минут. Чадварлаг ахлагч хөтөлнө (Шаардлагатай бол, ахлагч цөөтэй хуралд чадварлаг туслах үйлчлэгчээр хөтлүүлж болно). Хурлын ахлагчдын зөвлөл Библи судлалыг удирдаж явуулах хүнийг томилохдоо шаардлага хангасан эсэхийг нь харгалзаж үзнэ. Томилогдсон хүмүүс үр өгөөжтэй хөтлөх буюу судлалыг цагт нь багтааж, гол Библийн зүйлүүдийг онцолж, сурч буй зүйл ямар ач тустайг бүх хүнд ойлгуулж чаддаг байх ёстой. Хөтлөгчид асуулт хариултын журмаар явуулдаг хэсгийг хэрхэн хөтлөн явуулах талаар гаргасан зааврыг уншиж, хэрэгтэй зүйлээ мэдэж аваарай (хц23.04 х. 24, хавсралт). Тухайн 7 хоногт үзэх материалаа сайтар хэлэлцсэн бол сунжруулаад байх шаардлагагүй. Боломжтой бол, 7 хоног бүр өөр хүн хөтөлж, өөр хүн уншвал сайн. Амьдрал, үйл хэрэг цуглааны хөтлөгч, Библи судлалыг ердийнхөөс богино хугацаанд явуулахыг хүсвэл Библи судлалын удирдагч яаж богиносгохоо шийдэх хэрэгтэй. Зарим догол мөрийг уншуулахгүй байж болох юм.

ДҮГНЭЛТ

17. Гурван минут. Амьдрал, үйл хэрэг цуглааны хөтлөгч цуглаанаар үзсэн ач тустай санааг онцлон давтана. Мөн дараа 7 хоногт үзэх материалыг танилцуулна. Цагтаа багтахаар бол тэр 7 хоногт даалгавар биелүүлэх сурагчдын нэрийг хэлж болно. Өөрөөр заагаагүй бол цуглааны хөтлөгч шаардлагатай зарлалыг хэлж, захидлыг уншина. Дэлгэрүүлэх, цэвэрлэгээ хийх гэх мэт хуваарьт ажлын талаар тайзнаас зарлахгүй. Харин мэдээллийн самбарт хадах ёстой. Цуглааны хөтлөгч өгөгдсөн цагт зарлал хэлэх юм уу захидал уншиж амжихааргүй бол Бурхны үйлчлэгчийн ёсоор амьдрах нь хэсгийн хөтөлбөрийг удирдах хүмүүсээс хөтөлбөрөө богиносгохыг хүсэх хэрэгтэй (16 болон 19-р догол мөрийг үзээрэй). Цуглааны төгсгөлд дуу дуулж, залбирна.

МАГТАХ БА ЗӨВЛӨГӨӨ ӨГӨХ

18. Даалгавар болгоны дараа Амьдрал, үйл хэрэг цуглааны хөтлөгч ойролцоогоор нэг минутад багтааж «Зааж сургах» товхимолд үндэслэн магтаж, зөвлөгөө өгнө. Сурагчийн даалгаврыг танилцуулахдаа аль хичээл дээр ажиллахыг нь хэлэхгүй. Харин даалгавар биелүүлснийх нь дараа сурагчийг магтаж, аль хичээл дээр ажилласныг нь хэлж болно. Хичээлд байгаа зөвлөгөөг хэр сайн хэрэгжүүлснийг нь тодорхой хэлнэ. Эсвэл товхимолд байгаа тодорхой нэг зөвлөгөөг яавал илүү сайн хэрэгжүүлж болох байсныг, ингэвэл яагаад сайн гэдгийг эвтэйхэн тайлбарлана. Бас даалгаврыг хэрхэн биелүүлэхийг ажиглаж байгаад сурагч юм уу сонсогчдод хэрэгтэй гэж санагдсан бусад зүйлийг хэлж болно. Түүнчлэн цуглааны дараа юм уу өөр үед, ажилласан хичээлтэй нь эсвэл өөр хичээлтэй холбогдуулж «Зааж сургах», «Хүмүүсийг хайрла» эсвэл «Үйлчлэлийн сургууль» номд үндэслэж нэмэлт зөвлөгөөг ганцаарчлан өгч болно.—(Амьдрал, үйл хэрэг цуглааны хөтлөгч ба дэд зөвлөхийн үүргийн тухай мэдье гэвэл 19, 24 болон 25-р догол мөрийг үзнэ үү)

ЦАГ БАРИХ

19. Амьдрал, үйл хэрэг цуглааны ямар ч хэсэг, бас хөтлөгчийн хэлэх үг цагаасаа хэтрэх ёсгүй. Хөтөлбөр болгонд «тэдэн минутаас хэтрэхгүй» гэж бичээгүй ч гэсэн үндсэн материалд агуулсан санааг гүйцэд ярьсан бол цагаа бүрэн ашиглах гээд нэмж ярих хэрэггүй, заасан хугацаанаас өмнө дуусгаж болно. Цуглааны бусад хэсгийг хөтөлсөн хүмүүс цагаа хэтрүүлбэл дэд зөвлөх ганцаарчлан зөвлөгөө өгөх хэрэгтэй (24 болон 25-р догол мөрийг үзнэ үү). Дуу, залбирлыг оруулаад цуглааны хөтөлбөрийг нийт 1 цаг 45 минутад багтаах ёстой.

ДҮҮРЭГ ХАРИУЦАГЧИЙН ЭРГЭЛТ

20. Дүүрэг хариуцагчийн эргэлтийн үед цуглааныг «Амьдрал, үйл хэрэг цуглаанаар үзэх материал»-д үндэслэн явуулна. Гэхдээ дараах өөрчлөлтийг хийнэ. Бурхны үйлчлэгчийн ёсоор амьдрах нь хэсгийн Библи судлалын оронд дүүрэг хариуцагч 30 минут илтгэл тавина. Уг илтгэлийн өмнө Амьдрал, үйл хэрэг цуглааны хөтлөгч цуглааны хөтөлбөрийг тоймлож, дараа 7 хоногийн хөтөлбөрийг танилцуулж, зарлал юм уу захидал байвал уншиж сонсгоно. Дараа нь дүүрэг хариуцагчийг тайзнаа урина. Дүүрэг хариуцагчийн сонгосон дууг илтгэлийн дараа дуулж, цуглааныг дуусгана. Төгсгөлд нь өөр хүнээр залбируулж болно. Дүүрэг хариуцагчийн эргэлтийн 7 хоногт даалгавар биелүүлэх нэмэлт анги бүрдүүлэх шаардлагагүй. Хуралд дүүрэг хариуцагч эргэлт хийж байхад тус хуралд харьяалагддаг бүлэг цуглаанаа тусдаа явуулж болох юм. Гэхдээ дүүрэг хариуцагчийг илтгэл тавих үед бүлгийн хүмүүс хурлынхантайгаа хамт сонсох ёстой.

ЧУУЛГАНЫ 7 ХОНОГ

21. Дүүргийн юм уу бүсийн чуулган болох 7 хоногт цуглаан явуулахгүй. Тухайн 7 хоногт үзэх ёстой материалыг хувиараа эсвэл гэр бүлээрээ үзэх ёстойг сануулаарай.

ДУРСАХ ЦУГЛААНЫ 7 ХОНОГ

22. Дурсах цуглаан ажлын өдөр таарч байвал тухайн 7 хоногт Амьдрал, үйл хэрэг цуглааныг явуулахгүй.

АМЬДРАЛ, ҮЙЛ ХЭРЭГ ЦУГЛААНЫ ХАРИУЦАГЧ

23. Ахлагчдын зөвлөл нэг ахлагчийг Амьдрал, үйл хэрэг цуглааны хариуцагчаар томилно. Томилогдсон ахлагч цуглааныг энэ зааврын дагуу, сайн зохион байгуулалттай явуулахыг анхаарна. Дэд зөвлөхтэй сайн ярилцаж байх хэрэгтэй. «Амьдрал, үйл хэрэг цуглаанаар үзэх материал»-ын шинэ дугаар гармагц тухайн хоёр сарын ажлын өдрийн цуглааны хөтөлбөрийн хэсэг бүрийг хэн хэн хөтөлж явуулахыг оноож, хуваарь гаргана. Үүнд ахлагчдын зөвлөлөөс батлан шийдсэн хүмүүсийн дотроос цуглааны хөтлөгч хийх болон хөтөлбөр явуулах хүмүүсийг, бас сурагчийн биелүүлдэг даалгаврыг хийх хүмүүсийг сонгох ч орно (3-16 ба 24-р догол мөрийг үзнэ үү). Сурагчийн даалгаврыг оноохдоо тухайн хүний нас, туршлага, өгөгдсөн сэдвээр ярих чадварыг нь харгалзан үзнэ. Даалгаврыг биелүүлэх өдрөөс дор хаяж гурван 7 хоногийн өмнө биелүүлэх хүнд өгөх ёстой. Ингэхдээ «Бурхны үйлчлэгчийн амьдрал, үйл хэрэг цуглааны даалгавар» (S-89) гэсэн маягтыг ашиглана. Хариуцагч Амьдрал, үйл хэрэг цуглааны хуваарийг хурлын мэдээллийн самбарт хадсан байх ёстой. Энэ ажилд туслах ахлагч эсвэл туслах үйлчлэгчийг хурлын ахлагчдын зөвлөл сонгоно. Гэхдээ сурагчид биелүүлдэггүй цуглааны хэсгийг зөвхөн ахлагчид хөтөлж явуулна.

АМЬДРАЛ, ҮЙЛ ХЭРЭГ ЦУГЛААНЫ ХӨТЛӨГЧ

24. 7 хоног бүр нэг ахлагч Амьдрал, үйл хэрэг цуглааныг хөтөлнө (Шаардлагатай бол, ахлагч цөөтэй хуралд чадварлаг туслах үйлчлэгчээр хөтлүүлж болно). Хөтлөгч эхний үг ба дүгнэлтийг бэлдэж, ярианы жишээний видео болон «Зааж сургах» товхимлын хичээлийн видеог хэлэлцүүлнэ. Үүнээс гадна, бүх хөтөлбөрийг танилцуулж, ахлагчдын зөвлөлийн бүрэлдэхүүнээс хамааран цуглааны зарим хөтөлбөрийг, жишээлбэл хэлэлцүүлэхгүйгээр зөвхөн видео үзүүлэх хөтөлбөрийг ч явуулж болно. Хөтөлбөрүүдийн хооронд аль болох бага ярих хэрэгтэй. Ахлагчдын зөвлөл ийм чадварлаг ахлагчдыг тодорхойлон сонгоно. Сонгогдсон ахлагчид цуглааныг ээлжээр хөтөлнө. Хурлын нөхцөл байдлаас шалтгаалан Амьдрал, үйл хэрэг цуглааны хариуцагч бусад ахлагчаас арай олон удаа уг цуглааныг хөтлөн явуулж болно. Ер нь, Библи судлалыг хөтлөх шаардлагыг хангасан ахлагчийг Амьдрал, үйл хэрэг цуглааны хөтлөгч болгох нь илүү тохиромжтой. Гэхдээ цуглаан хөтлөх ахлагч даалгавар биелүүлсэн хүмүүст тустай зөвлөгөөг эвтэйхэн өгч, магтах хэрэгтэй байдаг. Бас цуглааны хөтөлбөрийг цагт нь дуусгахыг анхаарч байх үүрэгтэй (17 болон 19-р догол мөрийг үзнэ үү). Хэрэв хөтлөгч хүсвэл, бас зай талбай байвал туслах микрофон байрлуулж, хөтөлбөр хариуцсан хүнийг индэр лүү явах зуур туслах микрофоноор тухайн хөтөлбөрийг танилцуулж болох юм. Түүнчлэн, «Библиэс унших» болон «Дэлгэрүүлэх чадвараа сайжруулах нь» хэсгийн үеэр тайзан дээрх ширээн дээр сууж болох юм. Ингэвэл цаг хэмнэнэ.

ДЭД ЗӨВЛӨХ

25. Боломжтой бол, илтгэл сайн тавьдаг туршлагатай ахлагчийг томилох нь сайн. Дэд зөвлөх нь Амьдрал, үйл хэрэг цуглааны хөтөлбөр явуулдаг, нийтийн илтгэл тавьдаг, «Харуулын цамхаг», Библи судлалыг хөтөлдөг юм уу уг судлал дээр уншдаг ахлагчид болон туслах үйлчлэгчдэд, шаардлагатай бол, ганцаарчлан зөвлөгөө өгнө (19-р догол мөрийг үзнэ үү). Хэрвээ танай хуралд илтгэл сайн тавьдаг, сайн заадаг ахлагч олон байдаг бол жил бүр ээлжлүүлэн томилж болно. Даалгавар биелүүлэх бүрд зөвлөгөө өгөх шаардлагагүй.

НЭМЭЛТ АНГИ

26. Даалгавар биелүүлэх хүний тооноос хамаарч нэмэлт анги бүрдүүлж болно. Нэмэлт анги болгонд чадварлаг зөвлөх байх хэрэгтэй бөгөөд болж өгвөл ахлагчийг зөвлөхөөр томилох нь зүйтэй. Шаардлагатай бол, чадварлаг туслах үйлчлэгчийг зөвлөхөөр томилж болох юм. Энэ үүргийг биелүүлэх шаардлагыг хэн хангаж байгаа, бас ахлагчид ээлжээр биелүүлж болох эсэхийг ахлагчдын зөвлөл шийднэ. Зөвлөх 18-р догол мөрд заасан зааврыг дагана. Нэмэлт ангитай бол Бурхны Үгэн дэх эрдэнэс хэсгийн Эрдэнэс хайх нь хөтөлбөрийн дараа, даалгавар биелүүлэх сурагчдыг туслах танхим руу явуулна. Сурагчид хамгийн сүүлийн хүн даалгавраа биелүүлсний дараа гол танхимд буцаж ирнэ.

ВИДЕО

27. Ажлын өдөр болдог цуглаан дээр видео үзүүлдэг. Эдгээр видеог JW Library® апп-д тавьсан байдаг бөгөөд янз янзын хэрэгслээр үзэж болно.

S-38-KHA 11/23