Эцэг эхчүүд ээ, та бүхний үлгэр жишээ юунд сургадаг вэ?
«Онцгой хайрлагдсан хүүхдүүд адил Бурхныг дууриагчид болцгоо» (ЭФЭС 5:1, 2).
1. Ехова анхны хүмүүст ямар удирдлага өгсөн бэ?
ЕХОВА бол гэр бүлийг Үндэслэгч билээ. Тэрбээр анхны гэр бүлийг үндэслэж, үр хүүхэд төрүүлэх чадвартайгаар хүнийг бүтээсэн болохоор Еховагийн ачаар гэр бүл оршдог (Эфэс 3:14, 15). Тэрбээр, Адам Ева хоёрт оногдох үүргийн талаар ерөнхий заавар өгсөн ба үүргээ биелүүлэхдээ санаачлага гаргах боломжийг тэдэнд олгосон (Эхлэл 1:28–30; 2:6, 15–22). Адам Ева хоёр нүгэл үйлдснээс хойш хүч хүрэхэд бэрхтэй бэрхшээлүүд гэр бүлд тулгарах болсон. Гэвч, эдгээр бэрхшээлийг даван туулахад албатуудад нь тус нэмэр болох удирдамжийн талаар Ехова санаа тавьжээ.
2. а) Ехова бичгээр өгсөн заавраа яаж аман сургаалаар нэмэн дэлгэрүүлсэн бэ? б) Эцэг эхчүүд ямар асуултыг өөртөө тавих ёстой вэ?
2 Агуу их Багш болохынхоо хувьд Ехова юу хийх, юунаас зайлсхийх тухай зааврыг зүгээр нэг бичгээр өгөөд зогсоогүй өөр их зүйлийг хийсэн. Эрт цагт Бурхан бичгээр өгсөн заавраар төдийгүй тахилчид, зөнчид, цаашлаад гэр бүлийн тэргүүн нарын дамжуулдаг байсан аман сургаалаар сургадаг байсан. Тэгвэл өнөөдөр ингэж сургахын тулд Ехова хэнийг ашигладаг вэ? Христос шашинтны хурлын ахлагч нар болоод эцэг эхчүүдийг ашигладаг. Хэрэв та хүүхэдтэй бол үүргээ биелүүлж, гэр бүлийнхнийгээ Еховагийн замаар явахыг сургадаг уу? (Сургаалт үгс 6:20–23).
3. Амжилттай сурган хүмүүжүүлэхийн тухайд гэр бүлийн тэргүүнүүд Еховагаас юу сурч болох вэ?
3 Гэр бүлээ хэрхэн сургах вэ? Ехова жишээ үзүүлдэг. Тэрбээр сайн гэж юу болохыг, мөн юу нь муу гэдгийг тодорхой тайлбарладаг бөгөөд дахин давтахаасаа залхдаггүй (Египетээс гарсан нь 20:4, 5; Дэд хууль 4:23, 24; 5:8, 9; 6:14, 15; Иошуа 24:19, 20). Тэрбээр эргэцүүлэн бодоход өдөөх асуултууд ашигладаг (Иоб 38:4, 8, 31). Алив дүрслэл болон амьдралын жишээний тусламжтайгаар тэр бидний сэтгэл мэдрэмжид хандан, зүрх сэтгэлийг маань хүмүүжүүлдэг (Эхлэл 15:5; Даниел 3:1–29). Эцэг эхчүүд ээ, та бүхэн үр хүүхдээ сурган хүмүүжүүлэхдээ энэхүү жишээг даган дууриахыг хичээдэг үү?
4. Шийтгэлийн талаар бид Еховагаас юу сурдаг ба ямар учраас шийтгэл чухал вэ?
4 Ехова үнэн зөвийг нарийн чанд баримталдаг хэдий ч, төгс бус байдал хүмүүст хэрхэн нөлөөлдгийг ойлгодог. Иймээс ямар нэгэн аргаар шийтгэхээсээ өмнө тэрбээр юуны өмнө төгс бус хүмүүсийг сургаж, олон удаа анхаааруулдаг ба сануулдаг (Эхлэл 19:15, 16; Иеремиа 7:23–26). Тэр шийтгэхдээ ч хэмжээг нь мэддэг (Дуулал 103:10, 11; Исаиа 28:26–29). Хэрэв бид хүүхдүүддээ ийм байдлаар хандвал энэ нь бид Еховаг мэддэг гэдгийн илрэл мөн бөгөөд хүүхдүүд маань Бурхныг таньж мэдэхэд нь хялбар дөхөм болно (Иеремиа 22:16; 1 Иохан 4:8).
5. Үр хүүхдээ хэрхэн сонсох талаар эцэг эхчүүд Еховагаас юу сурч болох вэ?
5 Ехова хайрт тэнгэр Эцэгийн адилаар биднийг сонсдог нь үнэхээрийн гайхамшигтай. Тэрбээр дандаа захирч тушаагаад байдаггүй. Зүрх сэтгэлээ түүнд нээхийг урамшуулдаг (Дуулал 62:8). Хэрэв бидний илэрхийлж буй сэтгэгдэл бүрэн зөв биш байлаа ч гэсэн тэр биднийг зэмлэн, тэнгэрээс хилэгнэдэггүй билээ. Тэрбээр тэвчээртэйгээр биднийг сургадаг. Учир иймээс, элч Паулын өгсөн «Онцгой хайрлагдсан хүүхдүүд адил Бурхныг дууриагчид болцгоо» гэсэн зөвлөгөө юутай тохирном бэ! (Эфэс 4:31–5:1). Үр хүүхдээ зөв хүмүүжүүлэхийг зорьж буй эцэг эхчүүдэд Ехова ямар сайхан жишээ үзүүлнэ вэ! Энэхүү жишээ нь бидний зүрх сэтгэлд хүрч, Бурхны амьдралын замаар явах хүслийг төрүүлдэг билээ.
Үлгэр жишээнээс тусах нөлөө
6. Эцэг эхчүүдийн хандлага хийгээд үйл хэрэг хүүхдүүдэд хэрхэн нөлөөлдөг вэ?
6 Үг яриагаар сургамжлахаас гадна үзүүлэх үлгэр жишээ хүүхдүүдэд хүчтэй нөлөөлдөг. Эцэг эхчүүд хүссэн ч хүсээгүй ч үр хүүхдүүд нь тэднийг дууриадаг. Өөрсдийнх нь хэлж ярьдаг үг хэллэгийг хүүхдүүд нь хэрхэн давтан хэлж буйг сонсоход эцэг эхчүүдэд таатай үе байх ч заримдаа айдас төрүүлэх нь ч бий. Эцэг эхчүүдийн сүнслэг асуудалд хандах хандлага, үйл хэрэгт хүндэтгэл илэрдэг бол энэ нь хүүхдүүдэд эерэгээр нөлөөлдөг (Сургаалт үгс 20:7).
7. Иефта охиныхоо хувьд ямар жишээ болсон ба энэ нь түүний охинд хэрхэн нөлөөлсөн бэ?
7 Эцэг эхчүүдийн үлгэр жишээний нөлөөний тухай Библид тодорхой үзүүлдэг. Ехова, аммончуудад ялагдал, харин израилчуудад ялалт өгөхдөө Иефтаг ашигласан билээ. Иефта ч гэсэн эцэг хүн байсан. Түүний аммоны хаанд өгсөн хариултаас үзвэл, Ехова Израилчуудтай хэрхэн харьцаж байсан талаарх түүхэн мэдээллийг байнга уншдаг байсан нь илэрхий. Тэрбээр эдгээр мэдээллийг ямар ч төвөггүйгээр иш татаж, Еховад бат итгэдэг байв. Түүний энэхүү үлгэр жишээ нь гүн итгэл хийгээд өөрийгөө золиослох чанар бий болгоход охинд нь тус нэмэр болсон нь гарцаагүй. Охин нь амьдралынхаа туршид ганц бие үлдэж, Еховад үйлчилнэ хэмээн шийдэхдээ эдгээр чанаруудыг илэрхийлсэн юм (Шүүгчид 11:14–27, 34–40; Иошуа 1:8 харьцуул).
8. а) Самуелын эцэг эх ямар сайхан жишээ үзүүлсэн бэ? б) Энэ нь Самуелд хэрхэн тус болсон бэ?
8 Самуел үлгэр жишээ болохуйц хүүхэд байсан төдийгүй бүх насааараа Бурхны үнэнч зөнч байсан билээ. Үр хүүхдүүд тань ч гэсэн тийм л хүн болж өсөж торниосой гэж та хүсдэг үү? Самуелын эцэг эх болох Елкана Ханна нарын жишээг авч үзье. Тэдний гэр бүлийн нөхцөл бололцоо тийм ч бүрэн төгс байгаагүй боловч мөргөл үйлдэхийн тулд майхан байсан Шило хэмээх газар уруу тогтмол явдаг байлаа (1 Самуел 1:3–8, 21). Ханна хэрхэн чин сэтгэлийн угаас залбирч байсныг анхаарч үз (1 Самуел 1:9–13). Самуелын эцэг эх Бурханд өгсөн аль ч амлалтаа биелүүлэхдээ яаж чухалчлан үздэг байсныг ажигла (1 Самуел 1:22–28). Тэдний энэ сайхан үлгэр жишээ нь Самуелыг үнэн замаар явахад, тэр ч байтугай, түүний дэргэд байсан буюу Еховад үнэнчээр үйлчлэх ёстой байсан хүмүүс Бурхны замыг үл хүндэтгэх болсон тэр үед ч зөв үйл хэргээ үргэлжлүүлэхэд нь тус болсон чанаруудыг бий болгоход дөхөм болсон нь эргэлзээгүй. Хожим нь Ехова Самуелыг зөнчөө болгосон юм (1 Самуел 2:11, 12; 3:1–21).
9. а) Тимотод ямар жишээ сайнаар нөлөөлсөн бэ? б) Тимот ямар хүн болж хүмүүжсэн бэ?
9 Таны хүү, идэр залуу насандаа Паулын хамтран зүтгэгч болсон Тимот шиг болоосой гэж та хүсэхгүй гэж үү? Тимотын эцэг нь үл итгэгч байсан боловч ээж эмээ хоёр нь сүнслэг зүйлийг үнэлж хүндэтгэх нь чухал гэдгийн тод жишээг үзүүлсэн билээ. Энэ бүхэн Тимотын христосын шашинтны амьдралын сайн үндэс суурийг тавихад тусалсан нь гарцаагүй. Тимотын ээж Юник, эмээ Лойд нарт «чин сэтгэлийн итгэл» байсныг бид мэднэ. Тэдний христос шашинтны амьдрал худал хуурмаг байгаагүй бөгөөд тэд итгэл үнэмшлийнхээ дагуу амьдарч, Тимотыг бага балчираас нь мөн адил сургасан юм. Тимот бусдын сайн сайхны төлөө санаа тавин халамжилдаг найдвартай хүн болохоо харуулсан (2 Тимот 1:5; Филиппой 2:20–22).
10. а) Үр хүүхдүүдэд өөр хэн нөлөөлдөг вэ? Хүүхдүүдийн маань үг яриа болоод үзэл санаанд тийм нөлөө илэрвэл бид яах вэ?
10 Хүүхдүүдэд маань зөвхөн гэртээ хардаг, сонсдог юм нөлөөлдөггүй. Эрдэм ном заадаг багш нар, хамт сурдаг хүүхдүүд гээд тухайн орон нутгийн болоод тогтсон ёс заншилын дагуу амьдрах ёстой гэж үздэг хүмүүс хийгээд амжилтыг нь газар сайгүй магтан сайшаадаг спортын одод, эсвэл ямагт сонин хэвлэлд гарч байдаг улс төрийн зүтгэлтнүүд нөлөөлж болно. Түүнчлэн, олон сая хүүхэд дайн самууны зэрлэг балмад явдлыг үзсэн билээ. Энэ бүхэн хүүхдүүдийн маань үг яриа болоод үзэл санаанд илэрч байвал гайхах хэрэгтэй юу? Ийм илрэлд бид хэрхэн хандах вэ? Бид огцом ширүүн сануулж, зэмлэснээр уг асуудлыг шийдвэрлэх үү? Хүүхдүүд маань зүггүй зан гаргахад эрс огцом хариулахынхаа оронд өөрөөсөө дараах асуулт буюу Еховагийн хүмүүстэй харьцдаг харьцааны аль нэг жишээ тухайн нөхцөл байдлыг зөв шийдэхэд минь тус болох уу гэж асуувал дээргүй юу? (Ром 2:4 харьцуул).
11. Эцэг эхийн алдаа хүүхдүүдэд хэрхэн нөлөөлж болох вэ?
11 Төгс бус эцэг эхчүүд аливаа бэрхшээл бүрийг үргэлж хамгийн зөвөөр шийдэж чадахгүй нь ойлгомжтой. Тэд ч гэсэн алдаа гаргана. Эцэг эхийн алдаанаас болоод үр хүүхэд нь тэднийг хүндлэхээ больж болох уу? Тийм ээ, ялангуяа, эцэг эхчүүд өөрсдийн эрх мэдлийг хурцаар дөвийлгөн, алдаагаа нуун далдлахыг оролдвол хүүхдүүдийн хүндэтгэл үгүй болно. Харин, эцэг эхчүүд алдаа эндэгдлээ илэн далангүй бөгөөд номхон хүлцэнгүйгээр хүлээдэг бол хүүхдүүд хүндэлсээр байх болно. Үүгээрээ тэд үр хүүхдүүдийнхээ сурах хэрэгтэй зүйлийн сайн үлгэр жишээ үзүүлнэ (Иакоов 4:6).
Үлгэр жишээ маань юунд сургадаг
12, 13. а) Хүүхдүүд хайрын тухай юу мэдэх хэрэгтэй ба үүнд сургах хамгийн сайн арга юу вэ? б) Хүүхдүүд хайрын тухай мэдэх нь ямар учраас чухал вэ?
12 Хэрэв аман сургаалууд нь сайн үлгэр жишээгээр батлагддаг бол хүүхдүүд үнэ цэнэтэй олон хичээлийг элдэв төвөггүйгээр өөрийн болгож чадна. Үүнээс заримыг авч үзье.
13 Амин хувиа хичээгээгүй хайрын илрэл. Үлгэр жишээгээр батлагдах ёстой чухал хичээлүүдийн нэг бол хайрын хичээл билээ. «Эхлээд Тэр биднийг хайрласан тул бид хайрладаг юм» (1 Иохан 4:19). Тэрбээр хайрын Эх булаг төдийгүй хамгийн сод гарамгай жишээг үзүүлсэн бөлгөө. Зарчим дээр тулгуурладаг агапе хайрын талаар Библид 100 гаруй удаа байдаг. Энэ бол жинхэнэ христосын шашинтнуудын ялгарах онцлог чанар мөн (Иохан 13:35). Ийм л хайраар Бурхныг, Есүс Христийг, тэр ч бүү хэл бидэнд таалагддаггүй хүмүүсийг хайрлах хэрэгтэй (Матай 5:44, 45; 1 Иохан 5:3). Энэхүү хайр нь бидний зүрх сэтгэлд байж, амьдралд маань илрэх ёстой бөгөөд чухам өөрсдөө энэ чанаргүйгээр үр хүүхдүүдээ энэ чанарт сургаж чадахгүй. Аливаа чанар нь үг ярианаас илүү үйл хэргээр тод илэрдэг. Хүүхдүүд гэр бүлийнхээ дотор хайр болоод түүнтэй холбоотой бусад чанарууд тухайлбал түүнтэй дотно байгааг харах, мэдрэх хэрэгтэй. Үүнгүйгээр хүүхэд бие махбодь, оюун ухаан болоод сэтгэл санааны хувьд бүрэн дүүрэн хөгжиж чадахгүй. Тэрчлэн, гэр бүлийн гишүүн биш христосын шашинтныг хэрхэн зөв хайрлаж, дотно хандах вэ гэдгийг харах хэрэгтэй (1 Пэтр 3:8; Ром 12:10).
14. а) Хүүхдүүдийг яаж ажил сайн хийдэг мөн ажил хөдөлмөртөө сэтгэл хангалуун байж сургах вэ? б) Үүнийг танай гэр бүлд хэрхэн хийж болох вэ?
14 Хөдөлмөрт сургах. Ажил хөдөлмөр хүний амьдралд чухал үүрэг гүйцэтгэдэг. Хүн өөрийгөө хүндэлдэг байхын тулд ажил сайн хийж чаддаг байх ёстой (Номлогчийн үгс 2:24; 2 Тэсалоник 3:10). Хэрэв хүүхдэд үүрэг даалгавар өгөхдөө хэрхэн яаж хийхийг тайлбарлаагүй атлаа дараа нь муу хийсэн байна гэж загнаж аашлавал хүүхэд ажил хийж сурахгүй. Харин эцэг эхтэйгээ хамт ажил хийж сурахдаа магтаал сайшаалын үг сонсдог бол тэд ажил сайн хийдэг, хийсэн ажил хөдөлмөртөө сэтгэл хангалуун байх болно гэдэг магадлал их юм. Хэрэв эцэг эхчүүд жишээ үзүүлж, яаж хийхийг тайлбарладаг бол хүүхдүүд тэр ажлыг зөвхөн хийж сураад зогсохгүй, хүндрэл бэрхшээлийг даван туулж, эхэлсэн зүйлээ эцэст нь хүргэдэг ба аливааг эргэцүүлэн бодож, шийдвэр гаргаж чаддаг болно. Ийм нөхцөлд Ехова ч гэсэн хөдөлмөрлөдөг гэдгийг ухамсарлан ойлгоход нь, Ехова ажлаа хэрхэн сайн гүйцэтгэдгийг үнэлэхэд нь, мөн Есүс, Эцгээ дууриадаг гэдгийг ойлгоход нь тусалж болно (Эхлэл 1:31, Сургаалт үгс 8:27–31; Иохан 5:17). Хэрэв гэр бүлээрээ ямар нэг аж ахуй эсвэл бизнес эрхэлдэг бол гэр бүлийн зарим гишүүд хамтран ажилладаг байж болох юм. Эсвэл ээж нь хоол унд хэрхэн бэлтгэхийг, ширээ засахыг, сав суулгаа яаж угааж цэвэрлэхийг заадаг байлаа гэвэл, гэрийнхнээсээ хол ажилладаг аав нь гэр орныхоо аль нэг ажлыг хүүхдүүдтэйгээ хамтран хийхээр төлөвлөж болно. Хэрэв эцэг эхчүүд зөвхөн ойр зуурын ажил хэрэгт бус харин хүүхдүүдээ ирээдүйн бие даасан амьдралд сургадаг бол ямар сайн хэрэг вэ!
15. Итгэлд хэрхэн сургаж болох вэ? Жишээ татна уу
15 Сорилтод ороход итгэлээ хадгалах. Итгэл бол бидний амьдралын амин чухал асуудлын нэг билээ. Гэр бүлээрээ Библи судлахдаа итгэлийн талаар ярих нь хүүхдүүдэд итгэл гэж чухам юу гэдгийг ойлгоход тустай. Зүрх сэтгэлд итгэл хэрхэн соёолон бий болдгийг хүүхдүүд ойлгож чадна. Гэхдээ хүнд бэрх сорилтын үед ч эцэг эх нь гуйвшгүй итгэлтэй байхыг хүүхдүүд харвал энэ нь тэдний бүхий л амьдралын туршид нөлөөлж болно. Панамын нэгэн эмэгтэй Библи судалдаг байжээ. Хэрэв Еховад үйлчилэхээ болихгүй бол гэрээсээ хөөнө хэмээн нөхөр нь сүрдүүлжээ. Гэсэн ч тэр эмэгтэй энэ бүхнийг үл хайхран, балчир дөрвөн хүүхэдтэйгээ хамт 16 километр замыг явганаар, дараа нь автобусаар 30 километр явж байж хамгийн ойр Хаанчлалын Танхимд байнга очдог байв. Энэхүү үлгэр жишээг харсан гэр бүлийнх нь 20 гишүүн үнэнийг замыг сонгосон юм.
Библийг өдөр бүр уншихдаа үлгэр жишээ үзүүлэгтүн
16. Ямар учраас гэр бүлээрээ Библийг өдөр бүр уншихийг зөвлөдөг вэ?
16 Аль ч гэр бүл үүсгэж болох, зөвхөн эцэг эхчүүд төдийгүй үр хүүхдүүдэд ч ашигтай хамгийн үнэт уламжлалын нэг бол Библийг байнга унших явдал юм. Хэрэв боломжтой бол Библийг өдөр бүр уншаарай. Ингэхдээ уншсан зүйлийн хэмжээ биш харин хэр зэрэг тогтмол уншдаг вэ гэдэг нь хамаагүй чухал юм. Хэрэв төрөлх хэл дээр тань «Библийн өгүүллэгтэй миний ном»-ын аудио хуурцаг байдаг аваас хүүхдээ Библи уншуулахдаа сонсгож болно. Библийг өдөр бүр унших нь юуны өмнө Бурхны санаа бодлыг удирдлагаа болгоход тусалдаг. Хэрэв Библийг зөвхөн ганцаараа биш бүх гэр бүлээрээ уншдаг бол гэр бүлээрээ хамтдаа Еховагийн замаар явахад тус болно. «Бурхны амьдралын зам» чуулганы «Гэр бүлүүд ээ, Библийг өдөр бүр унших нь гэр бүлийн тань хэвшил болог!» гэсэн жүжигчилсэн тоглолт чухам энэ л тухай өгүүлсэн билээ (Дуулал 1:1–3).
17. Библийг гэр бүлээрээ унших хийгээд библийн зүйлүүдийг тогтоох нь Эфэс 6:4 зөвлөгөөг хэрэгжүүлэхэд хэрхэн тусалдаг вэ?
17 Гэр бүлийнхэн бүгдээрээ Библийг өдөр бүр уншина гэдэг нь элч Паулын Эфэст байсан христосын шашинтнуудад бичсэнтэй, тодруулбал: «Эцгүүд ээ, та нар хүүхдүүдээ бүү уурлуул. Харин тэднийг Еховагийн дэг журам болоод оюун ухааныг төлөвшүүлэх дотор хүмүүжүүл» гэсэнтэй тохирдог (Эфэс 6:4, ШЕ). Энэ юу гэсэн үг вэ? «Төлөвшүүлэх» гэдэг нь үгчилбэл «оюун ухаанд оруулах» гэх утгатай бөгөөд иймээс христосын шашинтан эцгүүд хүүхдүүдийнхээ оюун санаанд Ехова Бурхны санаа бодлыг оруулах гэсэн үг юм. Энэ нь Бурхны санаа бодолтой танилцахад хүүхдүүдэд тустай. Эдгээр боломжийн нэг нь хүүхдүүдээ библийн зүйл цээжлэхийг урамшуулах явдал мөн. Үүний зорилго нь хүүхдүүд эрэгцүүлэн бодохдоо Еховагийн үзэл бодлыг удирдлагаа болгож, эцэг эх нь хажууд нь байгаа эсэхээс үл хамааран тэдний хүсэл эрмэлзлэл, зан байдалд Бурханд тааламжтай зарчмууд аажмаар илэрч эхлэхэд оршиж байгаа юм (Дэд хууль 6:6, 7).
18. Библийг унших явцдаа а) түүнийг ойлгохийн тулд б) өгөгдсөн зөвлөгөөнөөс ашиг тус гаргахийн тулд в) Еховагийн санаа зорилгийн талаар илэрч байгаа зүйлийг хүлээн авахын тулд юу шаардлагатай байж болох вэ?
18 Библи бидний амьдралд нөлөөлөөсөй гэж хүсдэг бол түүнийг ойлгох шаардлагатай гэдэг нь мэдээж. Үүний тулд олон хүний хувьд нэг уншснаа дахин дахин унших хэрэгтэй болдог. Заримдаа аль нэг үг хэллэгийн утга учрыг бүрэн дүүрэн ойлгохийн тулд толь бичиг эсвэл «Бичээсийг Ойлгох нь» (англи) нэвтэрхий толийг хүртэл харах хэрэгтэй болдог. Хэрэв библийн зүйлд ямар нэг зөвлөгөө эсвэл зарлиг өгөгдсөн байвал энэ нь өнөө цагт ямар нөхцөлд хэрэгждэгийг ойлгохийн тулд цаг зав гаргаарай. Дараа нь, уг зөвлөгөөг хэрэгжүүлэх нь бидэнд ямар ашиг тустай вэ гэж асууж болно (Исаиа 48:17, 18). Хэрэв зүйлд Еховагийн санаа зорилгийн зарим нэг талыг хөндсөн байвал энэ бидний амьдралд хэрхэн нөлөөлдөг вэ гэж асуугаарай. Магадгүй та хүмүүсийн үзэл бодол хийгээд үйл хэргийн тухай өгүүлсэн зүйлүүдийг уншиж байж болох юм. Тэд ямар хүндрэл бэрхшээлтэй тулгарсан бэ? Тэд хэрхэн даван туулав? Тэдний үлгэр жишээ ямар тустай вэ? Бичээсийн зүйлүүдийн утга санаа бидний амьдралд ямар учиртайг хэлэлцэн ярилцах цаг зав ямагт гаргаарай (Ром 15:4; 1 Коринт 10:11).
19. Бурхныг дууриаснаар хүүхдүүддээ ямар жишээ үзүүлж чадах вэ?
19 Бурхны санаа бодлыг оюун ухаан хийгээд зүрх сэтгэлдээ хоногшуулан үлдээх ямар сайхан арга вэ! Энэ бол «онцгой хайрлагдсан хүүхдүүд адил Бурхныг дууриагчид болцгооход» маань үнэхээр тустай юм (Эфэс 5:1). Түүнчлэн, энэ нь дууриалал болоход зохистой үлгэр жишээг хүүхдүүддээ үзүүлэхэд маань тус болно.
Та санаж байна уу?
◻ Еховагийн жишээнээс эцэг эхчүүд юу сурч болох вэ?
◻ Хүүхдүүдийг аман сургаалаар сургахдаа ямар учраас эцэг эхчүүд өөрсдөө сайн үлгэр жишээ үзүүлэх ёстой вэ?
◻ Эцэг эхийн үлгэр жишээнээс хүүхдүүд юу сурч болох вэ?
◻ Гэр бүлээрээ Библийг унших нь хамгийн ашиг тустай байхын тулд яах хэрэгтэй вэ?