Еховаг хайрладаг хүнийг «бүдрүүлэх зүйл ч байдаггүй»

1. Христианууд бид бууж өгөх ёсгүйг нэг тамирчны жишээгээр тайлбарлана уу.

МЭРИ ДЕКЕР бүр арван хэдтэй байхаасаа л дэлхийн хэмжээний тамирчин хэмээн алдаршжээ. 1984 оны зуны олимпын наадамд 3 000 метрийн гүйлтийн төрөлд хурд хүчээ сориход нь алтан медаль авна гэж олон хүн бодож байлаа. Харамсалтай нь өөр тамирчны хөлд тээглэж унаад түрүүлж чадсангүй. Гэхдээ бэртэж гэмтээд өвчиндөө шаналж байсан ч уралдааны замаас гараагүй юм. Тэрбээр жил шахмын дараа гүйлтийн спортдоо эргэн ирж 1985 оны эмэгтэйчүүдийн гүйлтийн төрөлд дэлхийн шинэ дээд амжилт тогтоожээ.

2. Христиан хүн ямар уралдаанд оролцдог вэ? Юуг голлон анхаарах ёстой вэ?

² Христиан хүн бэлгэдлийн утгаар гүйлтийн тэмцээнд оролцдог. Ингэхдээ барианд орж шагнал авахыг л голлон анхаардаг. Энэ уралдаанд оролцож байгаа хүн хар эрчээрээ гүйж болохгүй, хааяа нэг зогсосхийгээд тааваараа шогшиж болохгүй. Марафон гүйлтийн тамирчин шиг тэвчээртэй гүйсээр зорьсондоо хүрэх учиртай. Эртний Коринт хот хөнгөн атлетикийн тэмцээн зохиодгоороо алдартай байжээ. Тийм ч учраас элч Паул тэндхийн христиануудад захидал бичихдээ гүйлтийн тэмцээнд оролцож буй тамирчныг жишээ болгон татсан аж. Тэрбээр: «Уралдаанд оролцон гүйгчид бүгд гүйдэг ч нэг нь л шагнал хүртдэгийг та нар мэдэхгүй гэж үү? Та нар ялахын тулд ийнхүү гүйцгээ» хэмээн бичсэн байдаг (1 Кор. 9:24).

3. Яавал мөнх амийн шагнал авах вэ?

³ Энэхүү бэлгэдлийн тэмцээнд оролцохыг Библи бидэнд уриалдаг (1 Коринт 9:25–27-г уншина уу). Тэнгэрт юм уу дэлхий дээр мөнх амьдрах шагнал биднийг хүлээж байгаа. Энэ тэмцээнд оролцоод эцсээ хүртэл тэвчээртэй гүйсэн бүх хүн шагнал авна. Үүгээрээ ихэнх тэмцээн уралдаанаас ялгаатай (Мат. 24:13). Оролцогчид нь дүрмийн дагуу гүйгээгүй бол эсвэл замаасаа гарвал ялагдсанд тооцогдоно. Мөнх амийн шагнал хүртэх боломжтой цорын ганц тэмцээн энэ юм.

4. Мөнх амийн төлөөх уралдаанд гүйх нь яагаад амаргүй вэ?

⁴ Мөнх амийн төлөөх уралдааны замаар зогсолтгүй гүйх амаргүй. Сахилга баттай, тууштай байх шаардлагатай. Ямар ч саадыг бүдрэлгүй давж барианд орсон цорын ганц хүн бол Есүс Христ юм. Харин дагалдагчдынх нь тухайд юу хэлж болох вэ? «Бүгд олон юман дээр бүдэрдэг» гэж шавь Иаков бичжээ (Иак. 3:2). Юутай үнэн үг вэ! Бид бүгдээрээ төгс бус учраас өөрсдөөсөө эсвэл бусдаас болоод хурдаа сааруулдаг. Заримдаа бүдрээд уначихдаг. Гэлээ ч гэсэн бууж өгөлгүй үргэлжлүүлэн гүйдэг. Унаад хүнд бэртэх нь ч бий. Тийм хүн тусламж авбал тэмцээнд дахин оролцох боломжтой. Тэгэхлээр үе үе бүдрэх юм уу унах нь гайхах зүйл биш юм (Х.дээд 8:46).

БҮДЭРСЭН Ч ЗАМААСАА БҮҮ ГАР

5, 6. а) Христиан хүнийг «бүдрүүлэх зүйл ч байдаггүй» гэсэн нь ямар учиртай вэ? Бүдэрлээ ч «сэхэж» босдогийн учир юу вэ? б) Зарим хүн бүдэрч унаад сэхэж босдоггүйн учир юу вэ?

⁵ Бүдэрлээ гэхэд юу хийхээс тухайн хүний сүнслэг байдал харагдана. Зарим хүн бүдэрсэн ч гэмшээд, Бурхандаа үйлчилсээр байдаг. Харин зарим нь уралдааны замаас гардаг. Сургаалт үгс 24:16-д «Зөв шударга хүн долоо бүдрэвч сэхнэ. Харин хар санаатай хүн гай тохиох цагт нэгмөсөн бүдэрнэ» гэж байдаг.

⁶ Бид бэрхшээл зовлон амсах, алдаа дутагдал гаргаснаасаа болоод бүдрэх юм уу унасан ч босож чадна. Учир нь Ехова өөрт нь найддаг, өөрийг нь чин зүрхнээсээ хайрладаг хүмүүсээ «сэхээж» босгохоо амласан. «Хар санаатай хүн» «сэхэхийг» хүсдэггүй. Тэд Бурхны ариун сүнс болон ард түмнээр нь туслуулж дэмжүүлэх нь бүү хэл, тусламж үзүүлэх гэхэд үл тоомсорлодог. Харин Еховагийн «хуулийг хайрлагчийг» бүдрүүлж мөнх амийн төлөөх уралдаанаас бүрмөсөн гаргаж чадах зүйл байдаггүй (Дуулал 119:165-ыг уншина уу).

7, 8. Бүдэрч унасан ч Бурхны сайшаалыг алдахгүйн тулд яах хэрэгтэй вэ?

⁷ Хүн төгс бусаасаа болоод алдаа гаргачихдаг. Бүр дахин дахин давтах нь ч бий. Гэлээ ч «сэхэх» буюу чин сэтгэлээсээ гэмшээд, үнэнч хэвээрээ байвал Ехова тэр хүнийг зөв хүн гэж үзнэ. Үүнийг эртний израильчуудтай хэрхэн харьцаж байснаас нь мэдэж болно (Ис. 41:9, 10). Дээр иш татсан Сургаалт үгс 24:16-д хүн бүдэрч унаад алдаа дутагдал гаргадгийг бус, харин Ехова Бурхан тийм хүнд энэрэнгүй хандан, өргөж босгодгийг онцолсон байдаг (Исаиа 55:7-г уншина уу). Ехова Есүс хоёр биднийг чадах бүхнээ хийнэ гэж итгэдэг учраас «сэхэхийг» уриалдаг (Дуу. 86:5; Иох. 5:19).

⁸ Марафон гүйлтэд оролцож буй тамирчин бүдрээд унасан ч шалавхан босоод үргэлжлүүлэн гүйвэл барианд орж чадна. Мөнх амийн төлөөх уралдаанд гүйж байгаа бид барианд орох «өдөр, цагийг» мэдэхгүй (Мат. 24:36). Гэхдээ хэдийчинээ цөөн бүдэрнэ, төдийчинээ хурдаа сааруулалгүй гүйсээр барианд орж амжина. Тэгвэл бүдрэхгүйн тулд яах вэ?

«БҮДРҮҮЛЭХ ЗҮЙЛС»

9. Бүдрүүлж болзошгүй ямар таван зүйлийн талаар авч үзэх вэ?

⁹ Бүдрүүлж болзошгүй таван зүйлийг авч үзье. Тухайн хүний өөрийнх нь гэм дутагдал, махан биеийн хүсэл тачаал, хурал доторх шударга бус явдал, хавчлага зовлон, бусдын алдаа дутагдлын аль нэгнээс болж бүдэрлээ гэхэд Ехова таныг үнэнч биш гэж яаран дүгнэлгүй тэвчээртэй ханддагийг бүү мартаарай.

10, 11. Давид ямар дутагдалтай хүн байсан бэ?

¹⁰ Тухайн хүний өөрийнх нь гэм дутагдлыг зам дээр хэвтэх чулуутай адилтгаж болно. Давид хаан, элч Петрийн амьдралд тохиолдсон явдлаас харвал нэг нь биеэ барьж чадаагүй, нөгөө нь хүнээс айдаг байжээ.

¹¹ Давид хаан заримдаа биеэ барьж чаддаггүй байв. Тиймээс Батшебатай завхайрсан. Бас Набалд доромжлуулсандаа хорсож тэднийхнийг хүйс тэмтрэх шахжээ. Үе үе биеэ захирч чадалгүй алдаа гаргадаг ч бууж өгөлгүй, Еховад таалагдах гэж хамаг чадлаараа хичээсэн. Давид бусдын тус дэмээр алдаагаа ухаарчээ (1 Сам. 25:5–13, 32, 33; 2 Сам. 12:1–13).

12. Петр бүдэрсэн ч замаасаа яагаад гараагүй вэ?

¹² Петр, Ехова Есүс хоёрт чин үнэнч хэдий ч хүнээс айдгаасаа болоод заримдаа бүдэрдэг байжээ. Жишээ нь, Есүсийг мэдэхгүй гэж нэг ч биш, бүр гурван удаа мэлздэг (Лук 22:54–62). Бас харь үндэстэн итгэгчдийг хөвч хөндүүлсэн еврей христиануудаас ямар нэг байдлаар дорд үзсэн. Христиан хуралд ялгаварлан гадуурхах явдал байх ёсгүй байв. Энэ буруу хандлага нь бусад христианд муугаар нөлөөлөх аюултай байсан тул элч Паул түүнийг хатуу зэмлэсэн (Гал. 2:11–14). Ингэлээ гээд Петр гомдож, бардам зандаа дийлдэн амийн төлөөх уралдааны замаас гарсан уу? Үгүй. Харин ч Паулын өгсөн зөвлөгөөг хүлээн авч, буруу хандлагаа засан, замаасаа гаралгүй тууштай гүйсэн.

13. Хүн юунаас болж бүдэрч болзошгүй вэ?

¹³ Хүн өвдөж зовохлоороо бүдэрч замаасаа гарчих гээд байдаг гэмтэй. Жишээ нь, нэг япон эмэгтэй баптисм хүртээд 17 жил өнгөрсний дараа хүнд өвчинд нэрвэгджээ. Түүнээсээ болоод сүнслэгээр сулран, яваандаа идэвхгүй болжээ. Тэгэхэд нь хоёр ахлагч эргэж очин, сэтгэл тайвшруулам үг хэлж, урамшуулан зоригжуулсан байна. Ингээд мөнөөх эмэгтэй цуглаандаа явдаг болжээ. Тэрбээр: «Намайг халуун дотноор угтаж авахад өөрийн эрхгүй сэтгэл хөдлөөд уйлж билээ» хэмээн дурссан. Одоо энэ Гэрч амийн төлөөх уралдааны замаар үргэлжлүүлэн гүйж байна.

14, 15. Гаж хүсэл төрвөл ямар арга хэмжээ авах хэрэгтэй вэ? Жишээ хэлнэ үү.

¹⁴ Махан биеийн хүсэл тачаалдаа дийлдэж бүдэрдэг хүн олон байдаг. Ийм сорилтод орвол ухаан санаа, сүнслэг байдлаа хамгаалж, ёс суртахууны хувьд цэвэр ариун байхын төлөө шийдэмгий алхам хийх хэрэгтэй. Бүдрүүлж болзошгүй аливаа зүйлийг, тухайлбал нүд, гараа бэлгэдлийн утгаар «тастаж хая» гэсэн Есүсийн зөвлөгөөг санах нь чухал. Энэ нь гүйхэд саад болдог бузар булай юм бодохгүй, хийхгүй байна гэсэн үг (Матай 5:29, 30-ийг уншина уу).

¹⁵ Бараг ухаан орсон цагаасаа л ижил хүйстнээ сонирхдог байсан тухайгаа нэг эрэгтэй бичжээ. Гэрч айлд өссөн тэрбээр: «Би их этгээд зантай хүү байсан. Хаана ч очсон миний байх ёстой газар биш юм шиг санагддаг байлаа» гэсэн байна. Хорьтойдоо туслах үйлчлэгч, байнгын эхлэгч болчихсон байлаа. Гэвч ноцтой нүгэл үйлдэн сахилга батын арга хэмжээ авахуулжээ. Ахлагчдаас тусламж авахын зэрэгцээ залбирч, Бурхны Үгийг судлан, бусдад санаа тавьдаг болов. Энэ бүхний ачаар уралдааныхаа зам дээр дахин гарсан юм. Түүнээс хойш нэлээд олон жил өнгөрчээ. Гэсэн хэдий ч дутагдлаа бүрэн засаж чадаагүйгээ хүлээн зөвшөөрч: «Одоо ч заримдаа гаж хүсэл төрдөг. Гэхдээ би хүслээ дардаг. Ехова хэрээс минь хэтэрсэн сорилт учруулахыг зөвшөөрөхгүй гэдгийг би ойлгосон. Энэ сорилтыг давж чадна гэж Бурхан надад итгэж байгаа» хэмээн бичсэн юм. Тэгээд цааш нь «Хүсэл тачаалдаа дийлдэхгүй байх гэсэн бүхий л хичээл зүтгэлийнхээ үр шимийг шинэ ертөнцөд амсана. Би үүнийг үнэхээр их хүсэж байна. Тэр болтол тэмцсээр байх болно» гэжээ. Энэ хүн уралдааны замаас гарахгүй байхаар эргэлт буцалтгүй шийдсэн байна.

16, 17. а) Итгэл нэгтнээ шударга бус хандлаа гэж бодсон Гэрч уралдааны замдаа хэрхэн эргэж орсон бэ? б) Бүдрэхгүйн тулд юу санах хэрэгтэй вэ?

¹⁶ Хурал дотор шударга бус явдал гарсан гэж бодоод бүдэрч мэдэх юм. Урьд нь ахлагч байсан франц эрэгтэйд тийм явдал тохиолдсон гэдэг. Гомдсондоо цуглаандаа явахаа больж, бүр идэвхгүй болоход нь хоёр ахлагч очиж уулзжээ. Мөнөөх Гэрч ч болсон явдлыг юу гэж үзэж байгаагаа илэн далангүй ярьсан аж. Ахлагчид яриаг нь таслалгүй анхааралтай сонсоод, ачаагаа Еховад даатгахыг зөвлөж, хамгийн чухал юм бол Бурханд таалагдах явдал гэдгийг сануулжээ. Өнөөх эрэгтэй зөвлөгөөг нь хүлээн авч, хурлын үйл ажиллагаанд урьдын адил идэвхтэй оролцдог болсон байна. Ийнхүү мөнх амийн төлөө дахин гүйж эхэлсэн юм.

¹⁷ Бурхан хурлын Тэргүүнээр төгс бус хүмүүсийг биш, харин Есүс Христийг томилсон гэдгийг санаж явах учиртай. «Галын дөл мэт» нүдтэй Есүс хурал дотор болж буй бүх юмыг нэгд нэгэнгүй хардаг. Тийм учраас биднээс илүү сайн ойлгодог (Илч. 1:13–16). Жишээ нь, бид итгэл нэгтнээ шударга бус юм хийлээ гэж бодож мэдэх юм. Чухам юу болсон, яагаад ийм юм болсныг буруу ойлгосон байж магадгүй шүү дээ. Есүс итгэл нэгтнүүдийн хоорондох аливаа асуудлыг цаг тухайд нь тохирсон аргаар шийднэ. Тиймээс итгэл нэгтнээсээ болоод бүдэрч унахгүй байцгаая.

18. Яавал сорилт бэрхшээлийг даван туулах вэ?

¹⁸ Биднийг бүдрүүлж болзошгүй өөр хоёр зүйл нь хавчлага зовлон ба бусдын алдаа дутагдал юм. Есүс тариачны тухай ёгт үлгэр ярихдаа үгнээс болж «хавчлага, эсвэл зовлон» тохиолдоход зарим хүн бүдэрнэ гэжээ. Ялангуяа, «өөрт нь бат үндэс байхгүй», итгэлээр сул бол гэрийнхэн, хөршүүд, эрх баригчид эсэргүүцэж хавчихад бүдэрдэг (Мат. 13:21). Гэхдээ Еховатай ойр дотно байвал Хаанчлалын үр бидний зүрхэнд гүн үндэслэх болно. Тиймээс сорилт тулгарахад «магтууштай» юмыг эргэцүүлэн бодож байгаарай (Филиппой 4:6–9-ийг уншина уу). Ехова биднийг уралдааны замаас гаргахаас хамгаалж хавчлага зовлонг давах хүч тэнхээ өгнө.

19. Хүнд гомдлоо гэхэд яавал бүдрэхгүй вэ?

¹⁹ Зарим хүн бусдын алдаа дутагдлаас болоод Еховад үйлчлэхээ больдог нь харамсалтай. Мөс чанараараа шийдэх асуудалд хүн бүр өөр өөрөөр ханддаг нь бүдрэх шалтгаан болдог байна (1 Кор. 8:12, 13). Хүнд гомдлоо гээд та үнэний замыг орхих уу? Библид бусдыг уучил, шүүхээ боль, өөрийн эрх ашгийг хойш тавь гэсэн зөвлөгөө байдаг (Лук 6:37). Бүдрүүлж болзошгүй «чулуу» гарч ирвэл дараах асуултыг өөртөө тавиарай. «Өөрийнхөө бодсоноор бусдыг шүүж байгаа юм биш биз? Ах дүүсийнхээ төгс бусаас болоод би амийн төлөө гүйхээ болих юм гэж үү?». Еховаг хайрладаг хүн бусдыг юу ч хийж байсан бүдрэлгүй гүйсээр байдаг.

ТЭВЧЭЭРТЭЙ ГҮЙ, БҮҮ БҮДЭР

20, 21. Амийн төлөөх уралдаанд оролцож буй та яахаар шийдсэн бэ?

²⁰ Та «замаа дуусгахаар» бат шийдсэн үү? (2 Тим. 4:7, 8). Тэгвэл бие даан судлах хэрэгтэй. Библи болон Библид үндэслэсэн ном хэвлэлийг уншиж судлан, эргэцүүлэн бодож, юун дээр бүдэрч болзошгүйгээ мэдэж аваарай. Хүч тэнхээтэй болохын тулд ариун сүнс гуйгаарай. Бүдэрч уналаа гэхэд босоод, бариа хүртэл гүйж болдгийг бүү мартаарай. Тэр байтугай тээр болж байсан чулуу шавар шалбаагтай үед хэрэг болдог шиг, гаргасан алдаа хожим нь сургамж болдог.

²¹ Нийтийн унаагаар зорчиж буй хүн зүгээр сууж байгаад зорьсон газраа хүрдэг бол, амийн төлөөх уралдаанд оролцож буй хүн гүйх буюу идэвх зүтгэл гаргаж байж л барианд орно. Зогсолтгүй гүйгээд байвал Ехова «агуу амар амгаланг» өгнө (Дуу. 119:165). Ехова амийн төлөөх уралдаанд оролцож байгаа биднийг одоо ч ивээдэг. Барианд орсны дараа ч мөнхөд ивээнэ (Иак. 1:12).