Зөнчдийг дууриагтун—Зефаниа
1. Зефаниаг зөнч байхад Иудад байдал ямар байсан бэ? Тэрбээр бидэнд ямар үлгэр дууриал үлдээсэн бэ?
1 МЭӨ VII зууны дундуур Иудад Баалыг өргөн дэлгэр шүтэх болжээ. Муу хаан Амон алагдаж, залуу Иосиа хаан болсон байлаа (Ш.дэд 33:21—34:1). Тэр үед Ехова шүүх мэдээгээ тунхаглуулахаар Зефаниаг сонгожээ. Тэрбээр хааны удмын хүн байсан байж болох ч Иудагийн удирдагчдыг зэмлэсэн Еховагийн үгийг хүргэхдээ тал тохой татаагүй (Зеф. 1:1; 3:1–4). Бид зоригтой байсан Зефаниаг дууриаж Еховаг шүтэх шүтлэгийг ураг төрлийн холбооноос дээгүүр тавих ёстой (Мат. 10:34–37). Зефаниа ямар мэдээ тунхагласан бэ? Ямар үр дүнд хүрсэн бэ?
2. Еховагийн уурын өдөр аврагдъя гэвэл бид яах ёстой вэ?
2 Еховаг хайх нь: Уурынх нь өдөр болоход Еховагаас өөр хэн ч биднийг аврахгүй. Тийм учраас, Зефаниа Иудагийн ард түмэнд цаг байгаа дээр Еховаг, зөв шударгыг, төлөв байдлыг хай гэж уриалжээ (Зеф. 2:2, 3). Өнөө үед ч бид Зефаниагийн адилаар Еховаг хайгаарай гэж хүмүүст уриалдаг. Гэхдээ өөрсдөө бас Еховаг хайх ёстой. «ЭЗЭНийг дагахаас эргэн бол[ихгүй]» байхаар бат шийдэх хэрэгтэй (Зеф. 1:6). Бид Библийг нямбай судалж, удирдамж заавар гуйн залбирч Еховаг хайдаг. Ёс суртахууны өндөр хэм хэмжээг баримталж зөв шударгыг хайдаг. Илүү дуулгавартай болохыг хичээн Еховагийн байгууллагаас ирдэг зааврыг дуртайяа дагаж төлөв байдлыг хайдаг.
3. Бид дэлгэрүүлэхдээ яагаад үргэлж өөдрөг байх хэрэгтэй вэ?
3 Сайн үр дүн: Зефаниаг шүүлтийн тухай тунхаглахад Иудад байсан цөөн хэдэн ч болов хүн хүлээж авчээ. Тэдний нэг нь Иосиа юм. Тэрбээр бага балчраасаа Еховаг хайдаг болсон. Хэсэг хугацааны дараа, Иосиа газар нутгаасаа хуурамч шүтээнүүдийг устгаж хаях томоохон аян өрнүүлжээ (Ш.дэд 34:2–5). Өнөө үед, Хаанчлалын үрээс зарим нь зам хавиар, чулуурхаг газар, хогийн ургамал дунд унадаг ч сайн хөрсөнд унаад жимс ургуулдаг үр ч бий (Мат. 13:18–23). Хаанчлалын үр тарин завгүй байвал Ехова үргэлж ивээнэ гэдэгт бид итгэдэг (Дуу. 126:6).
4. Бид яагаад Еховаг «хүлээх» хэрэгтэй вэ?
4 Иудад байсан зарим хүн Еховаг юу ч хийхгүй гэж бодож байлаа. Харин Ехова агуу өдөр нь удахгүй ирэхийг бүгдэд тунхагласан (Зеф. 1:12, 14). Еховад хоргоддог хүн л тэр өдөр аврагдсан (Зеф. 3:12, 17). Агуу Бурхан Еховаг «хүлээх» зуураа итгэл нэгтнүүдтэйгээ мөр зэрэгцэн баяр хөөртэй үйлчилцгээе! (Зеф. 3:8, 9)