Еховаг мэдэхэд нь хараагүй хүмүүст тусалцгаая
1. Есүс хараагүй хүмүүсийг өрөвддөгөө яаж харуулсан бэ?
1 Есүс хэдхэн өдрийн дараа нас барах гэж байлаа. Иерихо хотоос гарч явахад нь, хараагүй хоёр хүн: «Эзэн минь ээ, биднийгээ өршөөгөөч» хэмээн хашхиралдав. Ямар их зовлон туулахаа бодоод шаналж байсан ч Есүс зогсоод, тэднийг дуудаж, хараа оруулсан (Мат. 20:29–34). Хараагүй хүмүүсийг өрөвддөг байсан Есүсийг яаж дууриах вэ?
2. Хараагүй хүнтэй олон нийтийн газар таарвал яаж дэлгэрүүлэх вэ?
2 Тусч байгаарай: Хараагүй хүнтэй, олон нийтийн газар эсвэл хаа нэгтээ таарвал өөрийгөө танилцуулаад, танд тусалъя гээрэй. Хараагүй хүмүүсийг хуурч мэхлэх явдал гардаг учраас тэд эхлээд танаас болгоомжилж магадгүй. Гэхдээ чин сэтгэлээсээ санаа тавьж байгааг тань мэдрээд санаа нь амарч болох юм. Бас хараагүй хүн болгон адилгүй тул өөр өөрөөр туслах хэрэгтэй байдгийг санаарай. Тусалсныхаа дараа Библийн сургалтын байгууллагаас явж байгаагаа дурдаж болох юм. Дуулал 146:8, Исаиа 35:5, 6 зэргийг Библиэс уншиж өгөөрэй. Гадаад хэлээр брайл үсэг мэддэг бол, Библийг илүү сайн ойлгодог болоход нь туслах брайл хэвлэл санал болгоорой. Сонсох материал jw.org-оос татаж авахад нь туслаарай. Компьютер нь дэлгэцэн дээрх бичгийг чангаар уншдаг программтай бол jw.org сайтад өгүүлэл нийтэлдгийг, бас RTF (Rich Text Format) файл татаж авах боломжтойг хэлж өгөөрэй. («Хараагүй хүнд яаж туслах вэ?» гэсэн хавсралтыг үзнэ үү.)
3. Хараагүй хүмүүсийг яаж олж уулзах вэ?
3 Хараагүй хүмүүсийг олоорой: Хараагүй хүмүүст танихгүй хүнтэй ярих хэцүү байдаг болохоор айлаар дэлгэрүүлэхэд тэдэнтэй тааралдах нь ховор байдаг. Тиймээс хараагүй хүнийг «олж» дэлгэрүүлэхэд ихээхэн хүчин чармайлт гаргах хэрэгтэй (Мат. 10:11). Сургууль, ажил дээр тань хараагүй хүн байдаг уу? Санаачилга гаргаад яриарай. Танай хурлын хэсэгт харааны бэрхшээлтэй хүүхдийн сургууль байдаг бол номын санд нь гадаад хэлээрх брайл хэвлэл тавья гээрэй. Гэрийнхнээс нь хэн нэг нь харааны бэрхшээлтэй хүнийг та мэдэх үү? Танай хурлын хэсэгт хараагүй хүмүүст зориулсан тусгай байр эсвэл тэдэнд тусалдаг байгууллага байдаг уу? Еховагийн Гэрчүүд хараагүй хүмүүст туслах хүсэлтэй байдгийг гэрийнхэн, ресепшн, захиралд нь хэлж, сонсох материал, гадаад хэлээрх брайл хэвлэл авчиръя гээрэй. Бурхан харааны бэрхшээлийг бүрмөсөн арилгана гэж амласан байдгийг Библиэс уншиж өгөөрэй. Брайл Библитэй байхын үр шимийг хүртэж яваа хараагүй хүний тухай гардаг видеог jw.org сайтаас үзүүлж болно. Ийнхүү учир байдлаа тайлбарлавал, хараагүй хүмүүсийг олж уулзах боломж олдож болох юм.
4. Жанетад тохиолдсон явдал ямар сургамжтай вэ?
4 Жанет гэдэг хараагүй Гэрч эмэгтэй хараагүй хүмүүсийн оршин суудаг байраар яваад нэг залуу эмэгтэйтэй таарчээ. Жанет: «Хараагүй хүмүүст хараа оруулж байсан Есүс ирээдүйд бүх хараагүй хүнд хараа оруулна» гээд Илчлэлт 21:3, 4-ийг уншуулж, Бурхны Хаанчлал энэ амлалтыг яаж биелүүлэхийг тайлбарласан байна. Эмэгтэй хэсэг чимээгүй байснаа «Энэ зүйлийг хараагүй хүн тайлбарлахыг анх удаа сонслоо. Ер нь, хүмүүс хараагүй хүнийг өөрийнхөө юм уу эцэг өвгөдийнхөө буруугаас хараагүй болсон гэж боддог» гэсэн байна. Жанет тэр эмэгтэйд «Библийн сургаал» номын холбоосыг и-мэйлээр явуулжээ. Одоо тэд долоо хоногт хоёр удаа Библийн хичээл хийж байна.
5. Бид хараагүй хүнд хараа оруулж чадахгүй ч санаа тавивал ямар ивээл хүртэх вэ?
5 Бид хараагүй хүнд хараа оруулж чадахгүй нь үнэн. Гэхдээ энэ үеийн бурхны гайгаар бодол санаа нь сохорсон хүмүүст, тэр дундаа харааны бэрхшээлтэй хүмүүст Бурхны Үгийг ойлгоход нь тусалж чадна (2 Кор. 4:4). Есүс Иерихогийн ойролцоо хоёр хүнийг «ихэд өрөвдөж» эдгээсэн (Мат. 20:34). Есүсийн жишээг дууриан хараагүй хүмүүст санаа тавьж, харааны бэрхшээлийг бүрмөсөн арилгах Еховатай танилцахад нь тусалцгаая.