«Энэ тулалдаан бол [Еховагийнх]»

1999 онд Францын засгийн газар 1993–1996 оны хооронд итгэл нэгтнүүдийн маань өргөсөн хандиваас татвар төлөхийг Франц салбараас шаардсан нь шударга бус байв. Францын шүүх энэ хэргийг шударгаар шийднэ гэж найдсан ч тэгээгүй. Биднийг давж заалдах шатны шүүхээр ороод ялагдсаны дараа засгийн газар салбарын банкны данснаас 4,5 сая гаруй еврог (16 тэрбум төгрөг) татаж авсан байв. ЕХЭШ-д найдах л үлдлээ. Гэвч ЕХЭШ хэргийг маань шүүхэд шилжүүлэхээс өмнө төлөөлөгчийг нь байлцуулан тохиролцоонд хүрэх үүднээс хоорондоо ярилцахыг Францын засгийн газрын хуульчид болон биднээс шаардав.

Төлөөлөгч биднийг Францын засгийн газрын нэхсэн мөнгөн дүнгээс тодорхой хэмжээний мөнгө төлж асуудлыг шийд гэж шаардах байх хэмээн бид таамагласан. Гэхдээ хэрэв бид нэг евро л төлбөл Библийн зарчмыг зөрчсөн хэрэг болно гэдгийг сайн ойлгож байв. Хаант төрийн үйл хэргийг дэмжихэд зориулсан ах дүүсийн маань хандив засгийн газарт огт хамаагүй (Мат. 22:21). Гэсэн ч бид Европын шүүхийн дүрэм журмыг хүндэтгээд тэр хуралд оролцсон.

Шүүхийн газрын нэг гоёмсог танхимд цугларав. Төлөөлөгч бидэнд шууд л Францын шаардсан мөнгөнөөс тодорхой хэмжээг төлөх нь зүйтэй гэж хэлэв. Бид тэр даруй «Засгийн газар манай банкны данснаас 4,5 сая гаруй евро аль хэдийн татаад авчихсаныг та мэдээгүй юү?» гээд асуучхав.

Тэрбээр шоконд орсон нь илт байлаа. Үнэхээр ийм юм болсныг засгийн газрын хуульчид хүлээн зөвшөөрсөн. Төлөөлөгчийн хандлага эрс өөрчлөгдөж тэднийг буруутган загнаад хурлыг даруй өндөрлүүлсэн. Ехова энэ явдалд оролцож бидний огт таамаглаагүйгээр нөхцөл байдлыг эргүүлсэн. Бид болсон явдалд итгэж ядан баяр хөөр болсоор хурлын танхимаас гарсан.

2011 оны 6-р сарын 30-нд ЕХЭШ санал нэгтэйгээр бидний талд шийдвэр гаргалаа. Манай байгууллагаас шаардаж байсан татварыг хууль бус гэж үзэн хүчингүй болгож, татаж авсан мөнгийг хүүтэй нь буцааж төлөхийг засгийн газарт тушаасан! Энэ түүхэн шийдвэрийн ачаар Франц дахь ах дүүсийн маань Бурхнаа шүтэх эрх өнөөг хүртэл хамгаалагдаж байна. Бидний бэлдээгүй ганц асуулт Голиатын духыг оносон ганц чулуу шиг тулааныг эргүүлсэн. Бид яагаад ялсан бэ? Давидын Голиатад хэлснээр «Энэ тулалдаан бол [Еховагийнх]» байсан юм (1 Сам. 17:45–47).

Бидний ялалт ганц үүгээр тогтохгүй. Хүчирхэг засгийн газрууд, шашны байгууллагууд биднийг эсэргүүцдэг ч, одоогийн байдлаар 70 орны Дээд шүүх болон олон улсын хэд хэдэн шүүх 1 225 хэргийг бидний талд шийдвэрлэсэн. Хууль зүйн эдгээр ялалт нь бидний үндсэн эрхийг хамгаалж байгаа бөгөөд үүнд шашны хувьд хууль ёсны статустай байх эрх, олон нийтэд номлох эрх, үндсэрхэг үзлийн утга агуулга бүхий ёслолуудад оролцохоос татгалзах болон цус сэлбүүлэхээс татгалзах эрх багтдаг.

Хэдийгээр би АНУ-ын Нью-Йорк дахь Еховагийн Гэрчүүдийн байгууллагын төвд ажилладаг ч Европ дахь хуулийн хэрэгт яагаад оролцох болсон бэ?

ИДЭВХ ЗҮТГЭЛТЭЙ ЭЦЭГ ЭХИЙН ГАР ДЭЭР ХҮМҮҮЖСЭН

Миний эцэг эх Жорж, Люсиль хоёр Гилеад сургуулийн 12-р ангийг төгссөн бөгөөд 1956 онд намайг төрөхөд Этиопт үйлчилж байв. Тэд надад I зууны сайн мэдээ тунхаглагч Филипийн нэрийг өгсөн (Үйлс 21:8). Дараагийн жил нь засгийн газар манай үйл ажиллагааг хориглосон юм. Би хэдийгээр балчир байсан ч гэр бүлээрээ нууцаар Бурхнаа шүтэж байсныг тодорхой санадаг. Энэ нь хүүхэд надад их гоё санагддаг байв! Харамсалтай нь 1960 онд албаны хүмүүс биднийг тус улсаас албадан гаргасан.

Бид АНУ-ын Канзас мужийн Вичита руу нүүв. Аав ээж хоёр минь миссионер байсан шигээ хэзээд дэлгэрүүлэх дуртай байлаа. Тэд надад төдийгүй эгч Жүди, эрэгтэй дүү Леслид ч Еховаг хайрлахыг, түүнд бүхий л зүрхээрээ үйлчлэхийг заасан. Би 13 настайдаа баптисм хүртсэн. 3 жилийн дараа манайхан хэрэгцээ ихтэй Перугийн Арекипа руу нүүв.

1974 онд 18-тай байхад минь Перу салбар намайг 4 Гэрч эрэгтэйн хамт тусгай эхлэгчээр томиллоо. Өмнө нь хэн ч дэлгэрүүлж байгаагүй Андын нурууны төв хэсэгт үйлчилсэн. Бас тэндхийн уугуул кечуа, аймара хэлтэй хүмүүст ч дэлгэрүүлсэн. Бид гэр машинаараа явдаг байлаа. Том хайрцаг шиг харагддаг тул «Хөвөгч авдар» гэж нэрлэсэн. Ехова удахгүй ядуурал, өвчин, үхлийг арилгахыг нутгийн иргэдэд Библиэс үзүүлэн дэлгэрүүлдэг байсан тэр л дурсамжаа би их нандигнадаг (Илч. 21:3, 4). Олон хүн Хаант төрийн тухай мэдээг хүлээж авсан.

БАЙГУУЛЛАГЫН ТӨВД

Еховагийн Гэрчүүдийн Удирдах Зөвлөлийн гишүүн Альберт Шрөдер 1977 онд Перуд эргэлтээр ирэв. Байгууллагын төвийн Бетелд үйлчлэх анкет бөглөхийг надад зөвлөсөн юм. Би ч бөглөлөө. Удалгүй 1977 оны 6-р сарын 17-ноос Бруклины Бетелд үйлчилж эхэлсэн. Эхний 4 жил цэвэрлэгээ, засвар үйлчилгээний хэлтэст ажиллав.

Би 1978 оны 6-р сард Луизиана мужийн Шинэ Орлеанд болсон олон улсын чуулганаар Элизабет Авалонтой танилцлаа. Тэрбээр надтай адилаар, үнэний дагуу амьдардаг эцэг эхийн гар дээр өсөж хүмүүжсэн. Байнгын эхлэгчээр үйлчлээд 4 жил болж байсан бөгөөд цаашид ч бүрэн цагаар үйлчлэхэд амьдралаа зориулах хүсэлтэй байв. Бид холбоотой байж нэг нэгнээ сайн мэддэг болсон. Тэгээд маш их хайртай болж, 1979 оны 10-р сарын 20-нд гэрлээд Бетелд хамтдаа үйлчилж эхэлсэн.

Бруклин дэх испани хэлний хурал бид хоёрын анхны хурал байв. Итгэл нэгтнүүд маань биднийг хайрын сэтгэлээр хүлээж авсан. Мөн хайр бялхсан өөр 3 хуралд үйлчилсэн. Тэд ч бас Бетелд үйлчилдэг биднийг их дэмжсэн. Өндөр настай эцэг эх нартаа санаа тавихад маань тусалсан найзууд болон гэрийнхэндээ ч их талархаж явдаг.

ХУУЛИЙН ХЭЛТЭСТ

1982 оны 1-р сард намайг Бетелийн Хуулийн хэлтэст томилоход үнэхээр гайхаж билээ. 3 жилийн дараа надад их сургуульд сурч, мэргэжлийн өмгөөлөгч болох санал тавив. Сурч байхдаа, АНУ-д ч, өөр олон улсад ч хүмүүсийн эдэлдэг үндсэн эрх чөлөө шүүх дээр Еховагийн Гэрчүүдийн байгуулсан ялалтын ачаар батажсаныг мэдээд үнэхээр бахархсан. Энэ чухал хэргүүдийг бид ангидаа дэлгэрэнгүй хэлэлцдэг байв.

1986 онд 30-тай байхад минь Хуулийн хэлтсийн хариуцагчаар томилов. Залуу хүн гэлгүй надад ийм ажил даалгасанд их баярласан. Гэхдээ энэ ажил амаргүй бөгөөд мэдэхгүй юм их гэдгээ ойлгож байсан учраас санаа зовж байлаа.

Би 1988 онд өмгөөлөгч болсон. Гэвч сургуульд сурч байсан он жилүүд Еховатай тогтоосон харьцаанд минь хэр их нөлөөлснийг анзаараагүй юм. Дээд боловсрол нэр алдартай болох хүслийг өөгшүүлдэг, ийм боловсрол эзэмшээгүй хүнээс өөрийгөө дээгүүр үзэх үзэлтэй болгодог. Харин Элизабет минь тусалсан учраас Еховатай дотно байхад тустай сайн зуршлаа сэргээсэн. Хугацаа хэрэгтэй байсан ч би Еховатай дахин маш дотно болсон. Их мэдлэгтэй байх нь амьдралын хамгийн чухал зүйл биш гэдгийг би одоо баттай хэлнэ. Үнэндээ Еховатай тогтоосон харьцаа, түүнийг болон үйлчлэгчдийг нь гэсэн чин сэтгэлийн хайр амьдралыг жинхэнээсээ утга учиртай болгодог.

САЙН МЭДЭЭГ ХАМГААЛЖ, ТУНХАГЛАХ ЭРХЭЭ ХУУЛЬ ЁСНЫХ ГЭЖ БАТЛАХ НЬ

Би сургуулиа төгссөний дараа Бетелд хууль зүйн асуудлаар шаардлагатай тусламж үзүүлэх болон шүүх дээр Хаант төрийн үйл хэргийг хамгаалахыг анхаарч ажилласан. Байгууллага хурдацтай урагшилж, өргөжин тэлж, шинэчлэгдэж байсан тул миний хийж буй ажил сонирхолтой ч, бас амаргүй байв. Жишээ нь бид хэвлэл өгөхдөө тодорхой хэмжээний мөнгө авдаг байсныг өөрчлөх, зохицуулах ажлыг 1990 онд Хуулийн хэлтэст даалгав. Ингээд Еховагийн Гэрчүүд ном хэвлэлээ хүмүүст үнэгүй өгдөг болсноор Бетелийн болон дэлгэрүүлэх ажлыг хөнгөвчилж, үндэслэлгүй татвар нэхэх асуудал гарахаа больсон. Зарим маань энэ өөрчлөлтөөс болж байгууллагын нөөц бололцоо шавхагдаж, ном хэвлэл дутагдаж, улмаар олон хүн Еховагийн тухай мэдэх боломжоо алдах вий гэж эмээж байлаа. Гэхдээ ердөө ч ийм юм болоогүй. Харин ч 1990 оноос Еховад үйлчлэх хүний тоо хоёр дахин нэмэгдэж, өнөөдөр хүмүүс амь аврах бэлгэдлийн хоол ундыг үнэ төлбөргүй авч байна. Зөвхөн Еховагийн агуу хүч, итгэмжит боолоороо өгүүлдэг удирдлага зааврын ачаар байгууллагын ийм том том өөрчлөлт амжилттай хэрэгждэгийг би нүдээрээ харсан (Ег. 15:2; Мат. 24:45).

Бид сайн өмгөөлөгчтэй учраас л шүүх дээр ялдаг байсан юм биш. Ихэнхдээ Еховагийн ард түмний биеэ зөв авч явах байдал эрх мэдэлтнүүдийн сэтгэлийг хөдөлгөдөг. Үүний нэг жишээг би 1998 онд Кубад болсон тусгай чуулганд Удирдах Зөвлөлийн 3 гишүүн эхнэрүүдийнхээ хамтаар оролцох үед харсан. Албан ёсны уулзалтууд дээр бидний хэлж ярьснаас илүүтэй, тэдний бусдыг гэсэн сайхан сэтгэл, хүндэтгэлтэй зан байдал нь улс төрийн асуудлаар Гэрчүүд төвийг сахидаг гэдгийг засгийн газрынханд илүү сайн ойлгуулсан.

Гэхдээ заримдаа хууль зүйн асуудлыг шийдэхийн тулд шүүх дээр л «сайн мэдээг хамгаал[ж] ..., тунхаглах эрхээ хууль ёсных гэж батлах» хэрэгтэй болдог (Флп. 1:7). Жишээлбэл Европ болон Өмнөд Солонгост эрх мэдэлтнүүд хэдэн арван жилийн турш Гэрчүүдийг цэргийн алба хаахаас татгалзахыг хүлээн зөвшөөрдөггүй байв. Европт 18 000 орчим, Өмнөд Солонгост 19 000 гаруй Гэрч эрэгтэй мөс чанарынхаа улмаас цэргийн алба хаахаас татгалзаж шоронд суусан.

Эцэст нь, Баяатанаас Арменийн засгийн газарт холбогдуулан үүсгүүлсэн хэргээр 2011 оны 7-р сарын 7-нд ЕХЭШ-ээс шийдвэр гаргасан нь Европын бүх улсад цэргийн дүйцүүлэх алба хаах боломжийг бүрдүүлсэн. Үүнээс хойш мөн адил шийдвэрийг Өмнөд Солонгос улсын Үндсэн хуулийн шүүхээс 2018 оны 6-р сарын 28-нд гаргасан. Хэрэв ах дүүсээс маань бүр цөөхөн нь ч бууж өгсөн бол дээрх хоёр ялалтын алийг нь ч байгуулж чадахгүй байв.

Байгууллагын төв болон дэлхий дахины салбарууд дахь Хуулийн хэлтсийн ах дүү нар маань Хаант төрийн үйл хэргийг хамгаалахын тулд эцэж цуцахаа үл мэдэн ажилладаг. Засгийн газрын эсэргүүцэлтэй тулгарч байгаа итгэл нэгтнүүдийнхээ эрхийг хамгаалж байгаагаа бид нэр төрийн хэрэг гэж үздэг. Шүүх дээр ялсан ч бай, ялаагүй ч бай бидний хэрэг захирагчид, хаад, үндэстнүүдэд гэрчлэл болдог (Мат. 10:18). Шүүгчид, засгийн газрынхан, хэвлэл мэдээллийнхэн, олон нийт бидний хууль ёсны бичиг баримт болон шүүх дээр эш татаж хэлсэн Библийн зүйлүүдийг анхааран үздэг л байх ёстой. Чин сэтгэлтэй хүмүүс Еховагийн Гэрчүүд гэж хэн болохыг, итгэл үнэмшил нь юунд үндэслэдгийг мэдэж авдаг. Тэдний зарим нь итгэл нэгтэн маань болсон.

БАЯРЛАЛАА, ЕХОВА!

Өнгөрсөн 40 гаруй жилийн хугацаанд би хуулийн асуудлаар дэлхий дахины ахан дүүстэйгээ хамтран ажиллаж, маш олон Дээд шүүх, албаны чухал хүмүүсийн өмнө зогсож явлаа. Байгууллагын төв болон дэлхий дахины Хуулийн хэлтсийн хамтран зүтгэгч нараа хайрлан хүндэлж, тэднээрээ бахархдаг. Амьдрал минь ивээлээр дүүрэн, утга учиртай байсан.

Элизабет минь намайг сүүлийн 45 жилийн турш хүнд үед ч, сайхан үед ч үнэнчээр, хайрын сэтгэлээр дэмжиж байна. Хүч тэнхээг нь бардаг хүнд өвчинтэйгөө тэмцэнгээ намайг дэмждэг түүнийгээ их биширдэг.

Хүч чадал, ялалт нь бидний авьяас чадвараас хамаардаггүй гэдгийг бид биеэрээ гэрчилнэ. Давид: «Ехова бол ард түмнийхээ хүч чадал нь юм» гэж хэлсэн (Дуу. 28:8, ШЕ). Үнэхээр ч «Тулалдаан бол [Еховагийнх] юм».