Библиэс тайвшралыг олох боломжтой юу?
Библид юу гэж байдаг вэ?
Тийм ээ, боломжтой (Ром 15:4). Хүнд нөхцөлийн улмаас сэтгэлээр унасан олон хүнд тайвшрал өгсөн Библийн дараах зүйлсийг эргэцүүлээрэй.
Энэ өгүүлэлд:
Зовлон, бэрхшээл
Дуулал 23:4: «Үхлийн харанхуйн хөндийгөөр туулавч би хор хөнөөлөөс айхгүй. Учир нь Та надтай хамт байна».
Юу гэж ойлгох вэ? Бурханд залбирч, Үг нь болох Библийн удирдамжийг дагавал зоригтой байж чадна.
Филиппой 4:13: «Намайг хүчирхэгжүүлдэг нэгний ачаар би бүхнийг давна».
Юу гэж ойлгох вэ? Ямар ч зовлон, бэрхшээлийг давах хүчийг Бурхан өгнө.
Үхэл хагацал
Номлогчийн үгс 9:10: «Үхэгсдийн оронд мэргэн ухаан, ажил үйлс, бодох сэтгэх гэдэг нь байхгүй».
Юу гэж ойлгох вэ? Нас барагсад юу ч мэдэхгүй, мэдэрдэггүй. Тиймээс тэд зовдоггүй, биднийг ч зовоодоггүй.
Үйлс 24:15: «Хэн хэн нь амилна».
Юу гэж ойлгох вэ? Ехова нас барсан хайртай хүмүүсийг маань амилуулна.
Өөрийгөө хэт буруутгах сэтгэл
Дуулал 86:5: «Учир нь ЭЗЭНa Та сайн бөгөөд уучлахад бэлэн, Таныг дуудагч бүгдэд хайр энэрлээр элбэг баян».
Юу гэж ойлгох вэ? Алдаа гаргасандаа үнэн голоосоо гэмшдэг, дахин гаргахгүй байхаар шийдсэн хүнийг Бурхан уучилдаг.
Дуулал 103:12: «Өрнө дорноос хол байдаг шиг Тэр бидний алдаа зөрчлийг биднээс тийн холдуулсан».
Юу гэж ойлгох вэ? Бурхан уучилсан л бол нүглийг маань бидний төсөөлж чадахааргүй тийм хол хаяна. Өөрөөр хэлбэл нүглийг маань дахин дахин сануулж, буруутгая, шийтгэе гэж боддоггүй.
Уйтгар гуниг
Дуулал 31:7: «Та миний зүдгүүрийг харсан. Та сэтгэлийн минь зовлонг мэдсэн».
Юу гэж ойлгох вэ? Сэтгэл тань ямар их зовж шаналж байгааг Бурхан ойлгодог. Хэний ч харж чадахгүй сэтгэлийн угт байгаа бүхнийг тань хардаг.
Дуулал 34:18: «ЭЗЭН эмтэрсэн зүрхтэй хүнд ойртон байдаг бөгөөд сүнсээрээ гэмшигчдийг авардаг».
Юу гэж ойлгох вэ? Бурхан уйтгар гунигт автсан танд тусалж дэмжихээ амладаг. Сэтгэлийн шаналлаа давах хүч тэнхээ хайрлана.
Өвчин
Дуулал 41:3: «ЭЗЭН түүнийг өвчтөний оронд хэвтэж байхад нь тэтгэнэ».
Юу гэж ойлгох вэ? Хүнд өвчин туссан үед тайван байхад тань Бурхан тусалж, зөв шийдвэр гаргахад хэрэгтэй хүч тэнхээ, тэсвэр тэвчээр, мэргэн ухаан өгнө.
Исаиа 33:24: «“Би өвчтэй байна” гэж нэг ч оршин суугч өгүүлэхгүй».
Юу гэж ойлгох вэ? Бүх хүн эрүүл саруул болох цаг ирнэ гэж Бурхан амладаг.
Сэтгэлийн хямрал
Дуулал 94:19: «Миний дотор санаа зовсон бодлууд олшироход Таны тайтгарлууд миний сэтгэлийг баясгадаг».
Юу гэж ойлгох вэ? Сэтгэл санаа хямарсан үед Бурханд хандан тусламж гуйвал, тайван байхад маань тусална.
1 Петр 5:7: «Бүх зовнилоо Бурханд даатга. Яагаад гэвэл тэр та нарт санаа тавьдаг».
Юу гэж ойлгох вэ? Зовлон туулж яваа биднийг Бурхан хайхрахгүй орхидоггүй. Санаа зовоосон асуудлаа өөрт нь хэлж залбираасай гэдэг.
Дайн
Дуулал 46:9: «Тэрээр дэлхийн хязгаарт хүртэл дайныг зогсоодог».
Юу гэж ойлгох вэ? Бурхны Хаант төр удахгүй бүх дайныг цэглэнэ.
Дуулал 37:11, 29: «Даруу хүн газар нутгийг өвлөж, элбэг амар амгалангаар баярлана. ... Зөв шударга хүн газар нутгийг өвлөж, түүнд мөнхөд оршин суух болно».
Юу гэж ойлгох вэ? Сайн хүмүүс дэлхий дээр үүрд мөнхөд амар амгалан амьдарна.
Ирээдүйн тухай санаа зовнил
Иеремиа 29:11: «“Та нарт зориулж байгаа төлөвлөгөөнүүдийг Би мэдэх бөгөөд тэдгээр нь та нарт ирээдүй ба найдварыг өгөхийн тулд гай гамшгийн бус, сайн сайхны төлөөх төлөвлөгөөнүүд юм” гэж ЭЗЭН тунхаглаж байна».
Юу гэж ойлгох вэ? Бурхан ард түмэндээ гайхалтай ирээдүй хүлээж байгааг батлан хэлдэг.
Илчлэл 21:4: «Тэрээр тэдний нүднээс нулимс бүрийг нь арчина. Цаашид үхэл байхгүй болно. Цаашид гашуудах, уйлах, өвдөх гэж үгүй болно. Өмнөх юмс өнгөрөн одлоо».
Юу гэж ойлгох вэ? Одоо бидний эргэн тойронд болж буй муу муухай бүхнийг Бурхан ор мөргүй арилгахаа амладаг.
a Бурхны оноосон нэр бол Ехова (Дуулал 83:18, ШЕ). «Ехова гэж хэн бэ?» өгүүллийг уншаарай.