ЗАЛУУЧУУДЫН АСУУЛТ
Аав ээжийнхээ тогтоосон дүрмийг зөрччихвөл яах вэ?
Гэртээ хэдэн цагт ирэх, электрон хэрэгсэл хэр удаан ашиглах, мөн бусадтай хэрхэн харьцах гэх мэт тал дээр мөрддөг гэрийн дэг журам айл болгонд бий.
Гэрийнхээ дэг журмыг зөрччихвөл яах вэ? Өнгөрснийг өөрчилж чадахгүй нь ойлгомжтой. Харин улам дордохоос сэргийлэх боломжтой. Ингэхийн тулд яах нь зүйтэй вэ? Энэ өгүүллээр авч үзье.
Хийж болохгүй зүйл
Тогтоосон дүрэм журмыг нь зөрчсөнийг аав ээж чинь мэдээгүй бол нуучихъя гэсэн бодол төрж магадгүй.
Харин мэдчихвэл шалтаг тоочих юм уу буруугаа өөр хүнд тохох гэж оролдож болох юм.
Аль нь ч байлаа гэсэн сайн арга биш ээ. Буруугаа нуух гэж оролдох эсвэл шалтаг тоочих нь төлөвшөөгүйн шинж. Мөн ийм хандлагатай байвал аав ээж чинь чамайг “том болох өдий байна даа” гэж бодох болно.
«Худлаа хэллээ гээд асуудал шийдэгдэхгүй. Үнэн заавал илэрдэг. Анхнаасаа л үнэнээ хэлчихвэл арай хөнгөн шийтгэл хүлээнэ шүү дээ»—Диана
Яавал дээр вэ?
Хийсэн хэргээ хүлээгээрэй. «Нүглээ нуудаг хүн амжилт олохгүй» гэж Библид байдаг (Сургаалт үгс 28:13, ШЕ). Алдаа гаргадаггүй төгс хүн гэж нэг ч байдаггүйг аав ээж чинь мэдэж байгаа. Алдлаа гэхэд үнэнээ хэлээсэй л гэж хүснэ.
«Үнэнээ хэлбэл аав ээж маань уучлахгүй байна гэж байхгүй. Харин ч шударга, итгэл даахаар болжээ гэж үнэлнэ»—Оливиа
Уучлалт гуйж байгаарай. «Даруу занг хувцас мэт өмсөж» бай гэж Библид бичсэн байдаг (1 Петр 5:5). Даруу зантай хүн янз бүрийн шалтаг тоочоод байлгүй «уучлаарай» гэж хэлж чаддаг.
«Үргэлж шалтаг хэлдэг хүмүүс буруу юм хийсэндээ аажим аажмаар санаа зовж, ичихээ больдог. Сүүлдээ бүр тоохоо ч болино»—Хиэдер
Хийсэн үйлдлийнхээ хариуцлагыг хүлээж сураарай. Зэмлэж хэлсэн үгийг сонсдог байхыг Библид зөвлөсөн байдаг (Сургаалт үгс 8:33). Аав ээж чинь сахилга батын ямар ч арга хэмжээ авсан бай гомдоллохын оронд дуулгавартай байх хэрэгтэй.
«Хүртсэн шийтгэлийнхээ талаар гомдоллоод байвал аав ээжийгээ улам л гомдооно. Тэдний шийтгэх арга таалагдахгүй байлаа ч хүлээж авсан нь дээр байдаг»—Жейсон
Аав ээжийнхээ итгэлийг эргүүлэн олж авахыг хичээгээрэй. «Та нарыг буруу зам руу хөтөлж байсан хуучин хүнээ хувцас мэт тайл» гэж Библид байдаг (Эфэс 4:22). Итгэл хүлээх хүн гэдгээ үйл хэргээрээ батлан харуулаарай.
«Аль болох зөв шийдвэр гаргаж, алдаагаа давтахгүйг хичээвэл аав ээж чинь чамд дахиад итгэдэг болно»—Карен
БЯЦХАН ЗӨВЛӨМЖ: Аав ээжийнхээ итгэлийг хөсөрдүүлэхгүйн тулд илүү их хичээх хэрэгтэй. Жишээ нь гадуур яваад нэг их оройтоогүй байсан ч тэдэн рүүгээ залган харьж яваагаа хэлэх гэх мэт. Ингэх нь “надад итгэж болно шүү” гэж хэлж байгаатай адил юм.