СОНОР СЭРЭМЖТЭЙ БАЙГТУН!
Дэлхий дахинд юмны үнэ тэнгэрт хадаж байна. Библид юу гэж байдаг вэ?
Дэлхийн Банкны ерөнхийлөгч 2022 оны 6-р сарын тайландаа «Дэлхийн эдийн засагт дахин аюул нүүрлэж байна. Бараа, үйлчилгээний үнэ тэнгэрт хадаж, хүмүүсийн худалдан авах чадвар буурч байна» хэмээн мэдээлж анхаарууллаа.
«Хоол хүнс, шатахууны үнэ асар хурдан өссөн нь ядуу буурай орны эмзэг бүлгийн ард иргэдэд хүндээр тусаж байна» хэмээн Олон Улсын Валютын Сангаас мэдээлжээ.
Библи бидэнд яагаад эдийн засгийн хүндрэл бэрхшээл учирч байгааг тайлбарлахаас гадна үүнийг хэрхэн даван туулах, эдийн засгийн асуудал бүрмөсөн шийдэгдэнэ гэсэн найдвар байгааг хэлж өгдөг.
«Эцсийн өдрүүдэд» юмны үнэ нэмэгдэнэ
Библид бидний амьдарч байгаа цаг үеийг «эцсийн өдрүүд» гэдэг (2 Тимот 3:1).
Есүс энэхүү эцсийн өдрүүдэд «аймшигтай явдлууд болно» гэж зөгнөсөн (Лук 21:11). Юмны үнэ нэмэгдсэнээс болж хүмүүс айдаст автдаг. Тэд «Цаашдаа яаж амьдарна аа?», «Би гэр бүлээ тэжээж чадах болов уу?» гэж санаа зовдог.
«Илчлэл» номд эцсийн энэ өдрүүдэд хоол хүнсний үнэ өснө гэж зөгнөсөн байдаг. «Нэг дуу гарч, “Нэг өдрийн ажлын хөлсөөр нэг кварт (ойролцоогоор 500 гр) буудай, нэг өдрийн ажлын хөлсөөр гурван кварт (ойролцоогоор 1,5 кг) арвай ...” гэхийг би сонссон юм» гэсэн байдаг (Илчлэл 6:6, зүүлт).
«Илчлэл» номд гардаг зөгнөлийн тухай илүү ихийг мэдье гэвэл «1914 оноос дэлхийн нөхцөл байдал өөрчлөгдсөн» гэсэн видеог үзэж, «Дөрвөн морьтон гэж хэн бэ?» гэсэн өгүүллийг уншаарай.
Эдийн засгийн бүх асуудал шийдэгдэнэ
«Тэд гэр барьж, түүн дотроо сууна. Тэд бас усан үзэм тариалж, үр жимсийг нь иднэ» (Исаиа 65:21, 22).
«Уулсын оргил дээрх газарт үр тариа элбэг дэлбэг байх болтугай» (Дуулал 72:16).
«ЭЗЭН “Сул доройн дарлагдал, гачигдагсдын ёолох дуунаас болж Би бос[но]” гэдэг» (Дуулал 12:5).
Бурхан зөвхөн нэг улсад биш, дэлхий даяар эдийн засгийн тэгш бус байдлыг арилгана. Яаж тэр вэ? Энэ талаар «Шударга ёс ноёлсон эдийн засгийн тогтолцоог бий болгох боломжтой юу?» гэсэн өгүүллээс уншаарай.
Бас юмны үнэ өсөж байгаа өнөөгийн энэ үед яах ёстойг Библи бидэнд хэлж өгдөг. Мөнгөө зөв зүйтэй зарцуулах талаар олон сайхан зөвлөгөө бий (Сургаалт үгс 23:4, 5; Номлогчийн үгс 7:12). Илүү ихийг мэдэхийг хүсвэл «Амьдрах ухаантай байгаарай», «Бага орлогоор амь зуух арга» (англи) гэсэн өгүүллийг уншаарай.