Дэлхий нийтийг цочирдуулсан буут халдлага—Библид юу гэж байдаг вэ?

2022 оны 7 дугаар сард л гэхэд дэлхий нийтийг цочирдуулсан буут халдлага олон удаа гарсныг дурдвал:

• «Японы алдартай улс төрч [ерөнхий сайд асан Шинзо Абэгийн] амийг хөнөөсөн хэрэг тус улсыг төдийгүй дэлхий нийтийг цочирдууллаа. Япон улсад зэвсэгт халдлага ховор гардаг, галт зэвсгийн тухай хууль нь хатуу чанд байдаг» («Жапан таймс», 2022 оны 7-р сарын 10).

• «Копенхаген дахь худалдааны төвд буутай этгээд гурван хүний аминд хүрч Данийн ард иргэдийг цочирдуулав» («Ройтерс», 2022 оны 7-р сарын 4).

• «Өмнөд Африк: Совето хорооллын нэгэн бааранд буутай этгээдүүд гал нээж 15 хүний амийг хөнөөжээ» («Гардиан», 2022 оны 7-р сарын 10).

• «АНУ-ын тусгаар тогтнолын баярын өдрүүдээр 220 гаруй хүн буудуулан амиа алджээ» («Си-Би-Эс ньюс», 2022 оны 7-р сарын 5).

Ийм аймшигт хэрэг гарахгүй болох цаг ирэх болов уу? Библид юу гэж байдаг вэ?

Гэмт хэрэг үгүй болно

Библид бидний амьдарч байгаа цаг үеийг «эцсийн өдрүүд» гэж нэрлэдэг бөгөөд хүмүүс харгис хэрцгий хэрэг хийдэг болно гэж зөгнөсөн (2 Тимот 3:1, 3). Ийм гэмт хэрэг их гарч байгаа учраас хүмүүс айдас түгшүүртэй амьдарч байна (Лук 21:11). Гэхдээ харгислал хүчирхийлэл үгүй болж, «ард түмэн энх амгалан орчинд, аюулгүй гэрүүдэд, анир чимээгүй газарт амьдарна» гэсэн амлалт Библид бий (Исаиа 32:18). Гэмт хэрэг хэрхэн үгүй болох вэ?

Бурхан хорон муу хүмүүсийг үгүй хийж, бүх зэвсгийг устгана.

• «Хар санаатан газраас тастагдана» (Сургаалт үгс 2:22).

• «[Бурхан] дэлхийн хязгаарт хүртэл дайныг зогсоодог. Тэр нумыг хугалан, жадыг хоёр хэсэгт хуваадаг. Тэрээр тэрэгнүүдийг галдан шатаадаг» (Дуулал 46:9).

Бурхан хүн төрөлхтөнд эв нэгдэлтэй, амар тайван амьдрах аргыг зааж, харгислал хүчирхийллийг үндсээр нь тасална.

• «Тэд Миний бүх ариун ууланд хорлохгүй, устгахгүй. Учир нь далай усаар дүүрдэг шиг дэлхий ЭЗЭНий мэдлэгээр бялхана» (Исаиа 11:9).

• Бурхан одоо ч гэсэн хүмүүст «илдээ анжисны хошуу, жадаа хадуур болгон давтаж», зэвсэг хэрэглэхгүй, гэмт хэрэг үйлдэхгүй байхыг зааж байна (Мика 4:3).

Дэлхий даяар айх аюулгүй амьдрах цаг ирнэ гэсэн Библийн амлалтын талаар илүү ихийг мэдэхийг хүсвэл «Айдас хүйдэсгүй амьдрах боломжтой юу?» (англи) өгүүллийг уншина уу.

Гэмт хэрэг, хүчирхийлэл үүрд үгүй болох тухай илүү ихийг мэдье гэвэл «Дэлхий дээр амар тайвныг хэрхэн тогтоох вэ?» өгүүллийг уншина уу.