ХИЧЭЭЛ 55
Хурлаа дэмжээрэй
Дэлхий даяар олон мянган хуралд сая сая хүн Еховад баяр хөөртэй үйлчилж байна. Тэд хурлаасаа удирдамж заавар авдагтаа баярлаж талархаж явдаг. Тийм учраас чадлынхаа хэрээр хурлаа дэмждэг. Та бас хурлаа дэмжмээр байна уу?
1. Та хурлынхаа төлөө цаг зав, хүч чадлаа яаж зориулж болох вэ?
Хүн бүрд хурлаа дэмжих боломж байдаг. Жишээлбэл танай хуралд өндөр настай эсвэл бие муутай хүн байдаг уу? Тийм бол цуглаанд хүргэж өгч болно шүү дээ. Эсвэл дэлгүүр явж өгч, гэрийнх нь ажилд тусалж болно (Яаков 1:27-г уншина уу). Бас цуглааны танхимаа цэвэрлэж, арчилж тордож болно. Бид энэ бүхнийг албан шахалтаар хийдэггүй. Харин Бурхныг болон итгэл нэгтнүүдээ хайрладаг учраас «сайн дураараа үйлчилдэг» (Дуулал 110:3).
Баптисм хүртвэл хурлаа дэмжих олон боломж нээгддэг. Шаардлага хангасан Гэрч эрэгтэйчүүд туслах үйлчлэгч болон ахлагчаар үйлчилдэг. Бүх Гэрч эхлэгчээр үйлчилж илүү олон цаг дэлгэрүүлэх боломжтой. Зарим Гэрч байгууллагын барилгын ажилд оролцох юм уу тусламж хэрэгтэй хурал руу нүүдэг.
2. Мөнгө төгрөг, эд хөрөнгөөрөө хурлаа яаж дэмжих вэ?
«Эд хөрөнгөөрөө ЭЗЭНийг дээдлэх» боломж хүн бүхэнд бий (Сургаалт үгс 3:9). Бид «дуртайяа» хандив өргөдөг (2 Коринт 9:7-г уншина уу). Яагаад гэвэл хандивын санг хурлын зардлыг нөхөхөд, дэлхий дахины дэлгэрүүлэх ажлыг дэмжихэд болон байгалийн гамшигт нэрвэгдсэн хүмүүст туслахад зарцуулдаг. Тогтмол хандив өргөхийн тулд «боломжийнхоо хэрээр цааш нь хийдэг» хүн олон (1 Коринт 16:2-ыг уншина уу). Хандив яаж өргөх вэ? Цуглааны танхимд байдаг хандивын хайрцагт хийх юм уу donate.jw.org-оор онлайнаар өргөх боломжтой. Бид хандив өргөснөөрөө Еховад хайртайгаа харуулдаг.
УХАЖ ОЙЛГОЁ
Хурлаа ямар ямар аргаар дэмжиж болохыг дэлгэрэнгүй мэдэж аваарай.
3. Эд хөрөнгөөрөө дэмжих нь
Ехова Есүс хоёр дуртайяа өгдөг хүмүүсийг хайрладаг. Жишээ нь боломж бололцоо муутай ч чин сэтгэлээсээ хандив өргөсөн бэлэвсэн эмэгтэйг Есүс магтан сайшаасан байдаг. Лук 21:1–4-ийг уншина уу. Дараах асуултад үндэслэн ярилцаарай.
Еховаг баярлуулъя гэвэл заавал ихийг хандивлах ёстой юу?
Биднийг дуртайяа хандив өргөхөд Ехова Есүс хоёрт ямар санагддаг вэ?
Хандивыг юунд зарцуулдгийг ВИДЕОНООС хамт үзээд дараах асуултад үндэслэн ярилцаарай.
Дэлхий дахины ах дүүсийн маань тусын тулд хандивыг яаж зарцуулдаг вэ?
4. Сайн дураараа туслах нь
Эрт цагт израйлчууд Еховаг шүтдэг газраа засаж тордохын тулд сэтгэл, зүтгэл гаргажээ. Ингэхдээ зөвхөн хандив өргөсөн юм биш. Шастирын дэд 34:9–11-ийг уншина уу. Дараах асуултад үндэслэн ярилцаарай.
Израйлчууд Еховагийн өргөөг засаж тордоход дор бүрнээ яаж хувь нэмэр оруулсан бэ?
Еховагийн Гэрчүүд энэ жишээг дагадаг. ВИДЕОГ хамт үзээд дараах асуултад үндэслэн ярилцаарай.
Цуглааны танхимаа тогтмол цэвэрлэж, засаж тордох нь яагаад чухал вэ?
Та ямар ямар аргаар тусалж болох вэ?
5. Гэрч эрэгтэйчүүд юу хийж болох вэ?
Библид Христийн дагалдагч эрэгтэйчүүдэд хурлаа дэмжихийн төлөө бүх хүчээ дайчлахыг уриалсан байдаг. Хурлаа яаж дэмжиж болохыг ВИДЕОНООС хамт үзээд дараах асуултад үндэслэн ярилцаарай.
Раян хурлынхныхаа төлөө илүү ихийг хийхийн тулд яаж хичээсэн бэ?
Библид туслах үйлчлэгч, ахлагчийн хангах ёстой шаардлагыг жагсааж бичсэн байдаг. 1 Тимот 3:1–13-ыг уншина уу. Дараах асуултад үндэслэн ярилцаарай.
Туслах үйлчлэгч, ахлагч болохыг зорьдог хүн ямар шаардлага хангах ёстой вэ?
Гэр бүлд нь ямар шаардлага тавьдаг вэ? (4, 11-р зүйлийг үзнэ үү).
Гэрч эрэгтэйчүүд эдгээр шаардлагыг хангахыг зорьдог бол хурлынхан нь ямар ач тус хүртэх вэ?
ЗАРИМ ХҮН: «Еховагийн Гэрчүүд үйл ажиллагаагаа яаж санхүүжүүлдэг вэ?» гэж асууж болох юм.
Та юу гэж хариулах вэ?
ДҮГНЭЛТ
Хурлаа дэмжихийн тулд цаг зав, хүч чадал, хөрөнгө мөнгөө зориулахад маань Ехова их баярладаг.
Давтах асуулт
Хурлаа дэмжихийн тулд цаг зав, хүч чадлаа яаж зориулах вэ?
Хөрөнгө мөнгөөрөө хурлаа яаж дэмжих вэ?
Та хурлаа яаж дэмжмээр байна вэ?
МЭДЛЭГЭЭ ТЭЛЬЕ
Баптисм хүртсэн эрчүүдэд Бурхны оноосон үүрэг даалгаврыг баптисм хүртсэн эмэгтэй хүн биелүүлэх хэрэг гарвал яах вэ?
«Хурал дахь тэргүүллийн зарчмыг ойлгох нь» («Харуулын цамхаг», 2021 оны 2-р сар)
Саадыг үл тоон итгэл нэгтнүүддээ хэвлэл хүргэдэг зоригт Гэрчүүдтэй танилцаарай.
Манай байгууллагын санхүүжилт бусад шашны байгууллагынхаас юугаараа эрс ялгаатайг мэдэж аваарай.
«Еховагийн Гэрчүүдийн үйл ажиллагаа яаж санхүүждэг вэ?» (Веб өгүүлэл)