БҮЛЭГ ДОЛОО
Танайх хэцүү хүүхэдтэй юү?
1, 2. а) Есүс ямар жишээ татаж иудейн шашны удирдагчдын үнэнч бусыг илчилсэн бэ? б) Есүсийн ярьсан жишээнээс өсвөр насныхны талаар юу мэдэж болох вэ?
ЕСҮС үхэхээсээ хэдэн өдрийн өмнө иудейн шашны удирдагчдаас нэгийг бодогдуулам асуулт асуужээ. Тэрбээр: «Та нар юу гэж бодож байна? Нэгэн хүн хоёр хүүтэй байжээ. Тэр ууган хүү уруугаа очиж “Хүү минь, өнөөдөр явж, усан үзмийн тариалан дээр ажилла“ гэсэнд, хүү нь “За“ гэсэн атлаа явсангүй. Мөнөөх хүн удаах хүүдээ мөн тэгж хэлэхэд, хүү нь “Үгүй“ гэжээ. Гэвч дараа нь гэмшиж, ажиллахаар явав. Тэр хоёрын аль нь эцгийнхээ хүслийг биелүүлсэн бэ?» гэж асуухад тэд: «Сүүлчийнх нь» гэж хариулдаг (Матай 21:28–31).
2 Есүс ийм жишээ татаж иудейн шашны удирдагчдын үнэнч бусыг илчилжээ. Тэд эхний хүүтэй адил байв. Бурхны хүслийг биелүүлнэ гэж амласан ч хэлсэндээ хүрээгүй. Энэ жишээ эцэг эхчүүдэд ойлгомжтой байдаг. Хүүхдийн юу бодож явдаг, юу хийх гэж байгааг нь таах аргагүйг үнэхээр оновчтой дүрсэлжээ. Шилжилтийн насандаа болчимгүй юм хийж явсан хүүхэд өсөж томроод хариуцлагатай, хүндэтгэл хүлээсэн хүн болох нь ч бий. Үүнийг санангаа хэцүү хүүхдийн талаар ярилцъя.
ХЭЦҮҮ ХҮҮХЭД ГЭЖ ХЭН БЭ?
3. Хэцүү хүүхэд гэж яаран дүгнэж болохгүйн учир юу вэ?
3 Эцэг эхээ илт эсэргүүцдэг хүүхдийн тухай сонсдох нь бий. Та өөрөө ч үгэнд огт ордоггүй хүүхдийг мэддэг байж болох юм. Ер нь хэцүү хүүхэд үнэхээр мөн эсэхийг ялгаж таних тэр бүр амаргүй. Нэг эцэг эхийн гар дээр өссөн хэр нь зарим нь төлөв томоотой, зарим нь зөрүүд, тэрсүү болдог нь хачирхалтай. Хэцүү хүүхэдтэй болж байна даа гэж бодогдвол эцэг эх яах нь зүйтэй вэ? Энэ асуултад хариулахын өмнө хэцүү хүүхэд гэж хэн бэ гэдгийг ярилцъя.
4–6. а) Тэрсүү хүн яадаг вэ? б) Хүүхэд заримдаа дуулгаваргүй загнадаг бол эцэг эх юу санах хэрэгтэй вэ?
4 Товчхон хэлбэл, өөрөөсөө илүү эрх мэдэлтэй нэгнийг үл тоомсорлодог, дуулгаваргүй загнаж, бүр эсэргүүцдэг хүнийг тэрсүү гэж хэлж болно. «Мунхаг байдал хүүхдийн зүрхэнд уяастай байдаг» (Сургаалт үгс 22:15). Тэгэхлээр хүүхэд болгон л хааяа дуулгаваргүй загнадаг байх нь. Ялангуяа, бие нь өсөж, сэтгэл санаа нь тогтворгүй байдаг шилжилтийн насандаа ийм зан гаргадаг. Амьдрал өөрчлөгдөхөд хүний сэтгэл хямардаг. Хүүхэд насаа үдэж, том хүн болж яваа шилжилтийн насныханд их олон өөрчлөлт гардаг. Үүнээс болоод өсвөр насныхан болон эцэг эхчүүд бие биеэ ойлгож чадахгүйд хүрдэг. Хүүхэд том хүн болохсон гээд яарч байхад эцэг эх нь хүүхдээрээ л байна гэж бодож явдаг.
5 Тэрсүү хүүхэд эцэг эхийнхээ итгэл үнэмшил, үзэл бодол, баримталдаг хэм хэмжээг үл тоомсорлодог. Гэхдээ хэдэн удаа дуулгаваргүй загнахад нь тэрсүү хүүхэд гэж битгий бодоорой. Библийг бага зэрэг сонирхдог эсвэл огт сонирхдоггүй байлаа ч хэцүү хүүхэд биш байж болох шүү дээ. Эцэг эхчүүд ээ, хүүхдээ дүгнэх гэж бүү яараарай.
6 Өсвөр насны бүх хүүхэд эцэг эхээ эсэргүүцдэг гэсэн үг үү? Үгүй ээ. Өсвөр насандаа дураараа аашилж, ноцтой хэрэг тарьдаг хүүхэд цөөхөн байдаг. Тэгвэл тэрслээд байгаа хэцүү хүүхдийг яах нь зүйтэй вэ? Хүүхэд юунаас болж тэрсэлдэг вэ?
ЯАГААД ТЭРСЭЛДЭГ ВЭ?
7. Сатаны ертөнцийн нөлөөгөөр хүүхэд тэрсэлдэг гэхийн учир юу вэ?
7 Тэрслэх явдал газар авсны гол шалтгаан нь энэ ертөнцөд Сатаны хандлага тархсантай холбоотой. «Бүх ертөнц нь муу нэгний дотор байдаг» (1 Иохан 5:19). Христиан хүн Сатаны захиргаанд буй ертөнцийн энэ хандлагад автахгүйн тулд тэмцэх учиртай (Иохан 17:15). Энэ хандлага урьдынхаас илүү аюултай, хор хөнөөлтэй болоод байна (2 Тимот 3:1–5, 13). Эцэг эхчүүд хүүхдийг сурган хүмүүжүүлж, сэрэмжлүүлж, хамгаалахгүй бол «эдүгээ дуулгаваргүй хөвгүүд дотор ажиллаж буй сүнсний» нөлөөнд амархан автана (Ефес 2:2). Бас үе тэнгийнхэн нь дарамт шахалт үзүүлдэг. «Мунхаг хүмүүстэй нөхөрлөгч нь хохирол амсана» гэж Библид байдаг (Сургаалт үгс 13:20). Ертөнцийн сүнсийг илэрхийлдэг хүмүүстэй нөхөрлөдөг хүүхэд тэр сүнсний нөлөөнд автах аюултайг дээрх үгнээс мэдэж болно. Бурхны тогтоосон зарчмыг баримталж амьдрах нь хамгийн зөв зам гэдгийг хүүхдэд ойлгуулъя гэвэл байнга туслах шаардлагатай (Исаиа 48:17, 18).
8. Зарим хүүхэд яагаад тэрсэлдэг вэ?
8 Хүүхдийг тэрсүү болоход нөлөөлдөг өөр нэг зүйл бол гэрийнхнийх нь харьцаа, хандлага юм. Жишээ нь, эцэг эхийн нэг нь архи хэтрүүлж уух юм уу мансууруулах бодис хэрэглэдэг, эсвэл нөгөөдөө харгис хэрцгий ханддаг бол амьдралыг үзэх хүүхдийн үзэл гажуудах аюултай. Эцэг эх нь анхаарч халамжилдаггүй юм шиг санагддаг бол тайван амгалан айлын хүүхэд ч тэрсэлж мэднэ. Гэхдээ дан ганц гадны нөлөөгөөр тэрсэлдэг юм биш. Эцэг эх нь Библийн зарчмын дагуу амьдарч, ертөнцийн нөлөөнөөс аль чадахаараа хамгаалдаг ч хүүхэд үг авдаггүй, тэрсүү болох нь бий. Яагаад? Хүн төрөлхтөнд тулгардаг бэрхшээлийн бас нэг шалтгаан болох төгс бус байдлаас үүддэг бололтой. Элч Паул: «Нэг хүнээр [Адамаар] ертөнцөд нүгэл нь ирсний адил нүглээр үхэл нь ирсэн. Тиймээс, бүгд нүгэл үйлдсэн тул үхэл нь бүх хүнд иржээ» гэж бичсэн (Ром 5:12). Адам хар амиа бодон Бурханд тэрсэлсэн бөгөөд энэ муухай хандлага бүх үр удамд нь дамжсан. Зарим хүүхэд элэнц эцэг шигээ тэрсэлдэг.
ХҮЛЦЭНГҮЙ ЕЛИ, ХАТУУ ЧАНД РЕХОБОАМ
9. Эцэг эх яавал хүүхэд тэрслэх аюултай вэ?
9 Хүүхэд хүмүүжүүлэхдээ эцэг эх нэг талыг барьж туйлшрах нь муу нөлөөтэй (Колоссай 3:21). Зарим эцэг эх хэтэрхий их болгоомжлоод бүх юмыг хориглодог, хатуу шийтгэдэг байхад зарим нь дэндүү хүлцэнгүй хандаж, заах ёстой юмыг ч заадаггүй. Алтан дундачийг нь олж, хүүхэд хүмүүжүүлэх тийм ч хялбар биш. Хүүхэд бүр ялгаатай, хэрэгцээ шаардлага нь адилгүй. Зарим хүүхэд бусдыгаа бодвол илүү их анхаарал шаарддаг. Хэтэрхий хүлцэнгүй, хэтэрхий хатуу чанд байхын аль аль нь аюултайг Библийн хоёр түүхээс мэдэж авъя.
10. Елиг үнэнч тахилч гэж хэлж болох ч сайн аав гэж хэлэх аргагүйн учир юу вэ?
10 Эртний Израилийн тэргүүн тахилч Ели хүүхэдтэй хүн байв. 40 жил тахилчаар үйлчилсэн тэрбээр Бурхны хуулийг сайн мэддэг байсан байж таарна. Ели тахилчийн үүргээ чин үнэнчээр биелүүлдэг байсан биз ээ. Бас өөрийн хөвгүүд Хофни Финехас хоёрт Бурхны хуулийг хичээнгүйлэн заадаг байсан байх. Гэхдээ хэтэрхий зөөлөн ханддаг байв. Хофни Финехас хоёр тахилчийн үүрэг хүлээдэг ч махан биеийн хэрэгцээ, бузар хүсэл тачаалаа хангахыг л боддог «үл бүтэх хүмүүс байсан» ажээ. Уг нь, ариун газарт ёс бусыг үйлдсэн тэдэнтэй хариуцлага тооцон, тахилч байхыг нь болиулах ёстой байсан ч эцэг нь ердөө л зэмлэсэн болоод өнгөрдөг. Ийн хүлцэнгүй хандсан нь хөвгүүдээ Бурхнаас дээгүүр тавьсан хэрэг байв. Улмаар хөвгүүд нь Еховагийн эсрэг тэрсэлж, Елийнх гэдэг айл гай зовлонд унасан (1 Самуел 2:12–17, 22–25, 29; 3:13, 14; 4:11–22).
11. Елийн гаргасан алдаанаас эцэг эхчүүд ямар сургамж авах вэ?
11 Елийн хөвгүүд насанд хүрсэн хойноо ийм хэрэг тарьсан. Гэхдээ энэ явдлаас сахилгажуулахгүй байхын хор уршгийг ойлгож болно (Сургаалт үгс 29:21-тэй харьцуулна уу). Зарим эцэг эх хүлцэнгүй байхыг хайрлаж байгаа хэрэг гэж үзээд хүүхдэд тохирсон, тодорхой дүрэм гаргадаггүй, дүрэм гаргасан ч сахиулах гэж шахаж шаарддаггүй. Бурхны тогтоосон хэм хэмжээг зөрчихөд нь ч хайрын үүднээс сахилгажуулдаггүй. Хүүхдийг ингэж зоргоор нь тавивал эцэг эхийгээ ч, эрх мэдэлтэй бусад хүнийг ч хүндэлж сурахгүй байж мэднэ (Номлогчийн үгс 8:11-тэй харьцуулна уу).
12. Рехобоам хаан ямар алдаа гаргасан бэ?
12 Эрх мэдлээрээ далайлган хэтэрхий хатуу хандсан Рехобоамын жишээг бас үзье. Тэрбээр Израилийн хаант улсыг хуваагдахаас өмнө захирч байсан сүүлчийн бөгөөд муу хаан байв. Рехобоамыг хаан болох үед ард олон эцэг Соломоных нь үүрүүлсэн хүнд хүчир дарамтад зовж байжээ. Хаан харьяат албатынхаа зовлонг ойлгосон болов уу? Харамсалтай нь үгүй. Ард түмнийг төлөөлөн ирсэн хүмүүс зовлон зүдүүрээ нимгэлүүлэхийг хүсжээ. Гэтэл тэрбээр ахмад зөвлөхүүдийн үгийг үл тоон, харин ч ард түмний нуруун дээрх ачааг нэмсэн. Ингэж хатуу ширүүн хандахад нь арван овгийн хүмүүс тэрслэн босож, хаант улс хоёр хуваагджээ (Хаадын дээд 12:1–21; Шастирын дэд 10:19).
13. Эцэг эхчүүд яавал Рехобоамын алдааг давтахгүй байх вэ?
13 Рехобоамын талаар Библид бичсэнээс эцэг эхчүүд ихийг ойлгож болно. Эцэг эхчүүд «ЭЗЭНийг ... эрэлхийлэн» залбирч байгаад хүүхдээ Библийн зарчмын дагуу сургадаг эсэхээ магадлах хэрэгтэй (Дуулал 105:4). Номлогчийн үгс 7:7-д «Хавчлага дарамт нь мэргэдийг солиоруулдаг» гэж байдаг. Сайн бодож байгаад зөвлөгөө өгдөг бол хүүхэд ухаардаг, муу муухай юмнаас хол явдаг. Харин эрх чөлөөг нь хааж боогоод, хэтэрхий хатуу чанд байдаг бол хүүхэд бие даах чадваргүй, өөртөө итгэлгүй хүн болдог. Тиймээс, эцэг эх тодорхой хэмжээ хязгаар тогтоохын зэрэгцээ зохих эрх чөлөө олгон дүн нуруутай байдаг бол өсвөр насны хүүхэд тэр бүр тэрслээд байдаггүй.
САНАА ТАВЬДАГ БОЛ ТЭРСЛЭХЭЭС СЭРГИЙЛНЭ
Шилжилтийн насны бэрхшээлийг давахад эцэг эх нь тусалбал хүүхэд туйлбартай хүн болох биз ээ
14, 15. Хүүхэд өсөж томрохын хэрээр эцэг эх юу анхаарах хэрэгтэй вэ?
14 Хүүхэд өсөж өндийх сайхан ч бие даагаад эхлэхэд нь эцэг эх санаа зовж болох юм. Шилжилтийн насны хүүхдийг заримдаа зөрүүдлэх юм уу үгэнд орохгүй бол бүү гайхаарай. Христиан эцэг эхийн үүрэг бол хүүхдээ төлөвшсөн, дүн нуруутай, хариуцлагатай христиан болгон хүмүүжүүлэх явдал гэдгийг санаарай (1 Коринт 13:11; Ефес 4:13, 14-тэй харьцуулна уу).
15 Өсвөр насны хүүхэд илүү их эрх чөлөө эдлүүлэхийг хүсэх бүрд дургүйцсэн хариу өгдгөө болих нь зүйтэй. Сурсан зангаа өөрчлөх амаргүй л дээ. Гэхдээ бие хүн болж төлөвших нь хүүхдэд хэрэгтэй шүү дээ. Зарим хүүхэд харьцангуй багаасаа хэрсүүждэг. Тухайлбал, Иосиа хаан «залуухан байхдаа [15 орчим настайдаа] ... өвөг эцэг Давидынхаа Бурханыг эрэлхийлж эхлэв» гэж Библид байдаг. Хэдий нас залуу боловч аливаад хариуцлагатай ханддаг хүн болсон байжээ (Шастирын дэд 34:1–3).
16. Хүүхдэд эрх чөлөө олгож болох ч юунаас хаацайлах учиргүй вэ?
16 Эрх чөлөөг үүрэг хариуцлага дагалддаг. Тиймээс шилжилтийн насны хүүхдэд гаргасан шийдвэр болон хийсэн хэргийнх нь үр дагаврыг амсуулах нь зүйтэй. «Хүн юу тарьснаа л хурааж авдаг» гэсэн зарчим томчуудад ч, хүүхэд залууст ч хамаатай (Галат 6:7). Хүүхдийг юм бүхнээс хамгаалаад байх аргагүй шүү дээ. Нөгөө талаар, хүүхэд огт боломжгүй юм хүсээд байвал яах вэ? Эцэг эхийн хувьд «Үгүй» гэж хэлэх ёстой. Бас зөвшөөрөхгүй байгаагийнхаа учрыг тайлбарлаж болох ч «үгүй» бол «үгүй» л байх учиртай (Матай 5:37-той харьцуулна уу). Гэхдээ «үгүй» гэдгээ уурлаж уцаарлахгүй хэлж, эелдэг байгаарай. «Эелдэг хариулт уур хилэнг зайлуулна» (Сургаалт үгс 15:1).
17. Өсвөр насны хүүхэдтэй харьцахдаа юу анхаарах ёстой вэ?
17 Эцэг эх нь дүрэм журам гаргаж, хэмжээ хязгаар тогтооход хүүхэд тэр бүр дуртай байдаггүй ч сахилга батын арга хэмжээ авна гэснээрээ л авдаг бол хамгаалж байгаа хэрэг. Харин гаргасан дүрмээ санааны зоргоор байнга өөрчилдөг бол хүүхдийн урам хугардаг. Түүнээс гадна, бүрэг ичимхий зан, өөртөө итгэлгүй байдлаа ялахад нь тусалж, урмаар тэтгэдэг бол хүүхэд өөртөө итгэлтэй хүн болдог. Бас аливаад хариуцлагатай ханддагийг нь үнэлж, итгэл хүлээлгэхэд өсвөр насныхан дуртай байдаг (Исаиа 35:3, 4; Лук 16:10; 19:17-той харьцуулна уу).
18. Өсвөр насны хүүхэдтэй эцэг эх юу мэдэхлээр тайвширдаг вэ?
18 Эвсэг, бат бэх, хайр бялхсан гэр бүлд өссөн хүүхэд, их төлөв, зөв хүмүүждэгийг мэдэхлээр эцэг эхчүүд тайвширдаг (Ефес 4:31, 32; Иаков 3:17, 18). Архидалт, хүчирхийлэл юм уу өөр ямар нэг таагүй юм болдог гэр бүлд өссөн ч сайн хүн болж хүмүүжсэн хүүхэд олон. Тиймээс та хүүхдээ хайрлан халамжилж, анхаарал тавихын зэрэгцээ Библийн зарчмын дагуу сахилгажуулж, хэмжээ хязгаар тогтоохдоо ухаалаг байдаг бол үр хүүхэд тань хожим бахархмаар сайн хүн болох биз ээ (Сургаалт үгс 27:11-тэй харьцуулна уу).
ХҮҮХЭД АЛДАЖ ЭНДЭЭД ШАНАЛЖ ЯВАА БОЛ
19. Эцэг эх нь хүүхдээ сургах үүрэгтэй бол хүүхэд ямар үүрэгтэй вэ?
19 Хүүхдийг хүмүүжүүлж байсан цагт үр дүн гардаг. Сургаалт үгс 22:6-д «Явах ёстой замаар нь замнуулахын тулд хүүхдийг сурга. Тэрээр өтөлсөн ч тэр замыг орхихгүй» гэж байдаг. Гэхдээ эцэг эх нь сайн хүмүүжүүлсээр атал хүүхэд нь буруу замаар орох нь бий. Яагаад ингэдэг юм бол? Дээрх зүйлийг өөр нэг зарчимтай уялдуулан ойлгох нь зүйтэй. Хүүхэд эцэг эхээ «сонсож», дуулгавартай байх ёстой гэсэн зарчим бий (Сургаалт үгс 1:8). Гэр бүлээрээ жаргалтай амьдаръя гэвэл эцэг эх ч, хүүхэд ч Библийн зарчмыг баримтлах ёстой. Эс бөгөөс эцэг эх, хүүхдийн хэн хэн нь зовно.
20. Хүүхэд бодлогогүй загнаж алдлаа гэхэд эцэг эх хэрхэн ухаалаг хандах вэ?
20 Өсвөр насны хүүхэд алдаж эндээд шаналж яваа бол эцэг эх яах нь зүйтэй вэ? Хүүхдэд туслах хэрэгтэйг ойлгоорой. Гэнэн томоогүйг нь санавал хэтэрхий их уурлахгүй байж болно. Паул: «Хэрэв хүн ямар нэгэн буруу юманд эзэмдүүлсэн бол, сүнслэг та нар түүнийг дөлгөөн байдлын сүнс дотор шинэчлэн засагтун» хэмээн төлөвшсөн христиануудад зөвлөсөн байдаг (Галат 6:1). Бодлогогүй загнаж, алдаж эндсэн хүүхэдтэй харьцахдаа эцэг эх энэ зарчмыг баримтлах нь зүйтэй. Хийсэн хэрэг нь яагаад буруу байсныг, алдаагаа давтахгүй байхын тулд яах ёстойг тодорхой тайлбарлах хэрэгтэй. Харин өөрийг нь муу хүүхэд гэж үздэггүйгээ сайн ойлгуулах учиртай (Иуда 22, 23-тай харьцуулна уу).
21. Хүүхэд ноцтой нүгэл үйлдсэн бол христиан хуралд баримталдаг зарчмын дагуу эцэг эх яах ёстой вэ?
21 Хүүхэд ноцтой хэрэг хийсэн бол яах хэрэгтэй вэ? Тийм хүүхдийг онцгой анхаарч тусламж дэмжлэг үзүүлэн, ухаалгаар удирдан залах хэрэгтэй. Христиан хүн ноцтой нүгэл үйлдвэл гэмшиж, ахлагчдад хандан тусламж авах учиртай (Иаков 5:14–16). Нүгэл үйлдсэн хүнийг гэмшвэл ахлагчид Бурхантай тогтоосон харьцаагаа сэргээхэд нь тусалдаг. Алдаа гаргасан өсвөр насны хүүхдэд, гол нь, эцэг эх туслах үүрэгтэй ч хэрэг явдлын талаар ахлагчидтай зөвлөлдөх хэрэгтэй байж болох юм. Хүүхэд нь ноцтой нүгэл үйлдсэнийг ахлагчдын зөвлөлөөс нуух учиргүй.
22. Хүүхэд ноцтой хэрэг таривал эцэг эх Еховаг хэрхэн дууриах хэрэгтэй вэ?
22 Хүүхэд ноцтой хэрэг таривал эцэг эхэд үнэхээр хэцүү байх нь ойлгомжтой. Сэтгэл нь хямарснаас хүүхдээ аашилж загнамаар санагдаж мэднэ. Ингэвэл хүүхдээ уурлуулахаас цаашгүй. Ийм эгзэгтэй үед эцэг эх хэрхэн хандахаас хүүхдийн ирээдүй шалтгаалж болохыг битгий мартаарай. Зөв замаас хазайсан ард түмнээ гэмших л юм бол уучлахад бэлэн байсан Еховаг бас санаарай. «„Нааш ир. Хамт хэлэлцье“ гэж ЭЗЭН айлдаж байна. „Та нарын нүглүүд час улаан мэт боловч цас шиг цагаан болно. Тэдгээр нь хүрэн улаан боловч ноос шиг болох болно“» гэж хайрын сэтгэлээр хэлсэн Еховаг дууриахыг хичээгээрэй (Исаиа 1:18). Ехова эцэг эхчүүдэд ямар сайхан жишээ үлдээгээ вэ!
23. Хүүхэд нь ноцтой нүгэл үйлдсэн бол эцэг эх яах ёстой вэ? Яах ёсгүй вэ?
23 Тиймээс, буруу замаас гарахыг хүүхдэдээ уриалаарай. Туршлагатай эцэг эхчүүдээс, хурлын ахлагчдаас зөвлөгөө аваарай (Сургаалт үгс 11:14). Сэтгэлийн хөдөлгөөнд бүү автаарай. Хүүхдэд тус болохгүй үг хэлэх, үйлдэл хийхээс зайлсхийгээрэй. Ухаан жолоогүй битгий уурлаарай (Колоссай 3:8). Итгэл найдвараа бүү алдаарай (1 Коринт 13:4, 7). Үр хүүхдээ биш, хорон мууг үзэн ядаарай. Хүүхдэдээ хатуу ширүүн ханддаг болохоос зайлсхийгээрэй. Хамгийн гол нь, эцэг эхчүүд өөрсдөө үлгэр дууриал болж, Бурханд итгэх итгэлээ сулруулахгүй байхыг хичээх ёстой.
ЗОРИУД ТЭРСЭЛДЭГ ХҮҮХДИЙГ ЯАХ ВЭ?
24. Христиан айлд ямар харамсалтай юм тохиолдож болох вэ? Эцэг эх яах нь зүйтэй вэ?
24 Зарим хүүхэд зориуд тэрсэлж, христиан хүний баримталбал зохих хэм хэмжээг сахихаас эрс татгалздаг. Ингэвэл бусад хүүхдийнхээ сайн сайхныг бодож, тэднийгээ анхаарч хамгаалах хэрэгтэй. Тэрсүү хүүхдэд хамаг бүхнээ зориулаад бусдыг нь зөнд нь орхихоос болгоомжлоорой. Болсон явдлыг гэрийнхэндээ нэгд нэгэнгүй тоочихгүй ч тодорхой хэмжээгээр, эвтэйхэн хэлэх нь зүйтэй (Сургаалт үгс 20:18-тай харьцуулна уу).
25. а) Хүүхэд нь зориуд тэрсэлбэл эцэг эх христиан хуралд хамаатай ямар зарчмыг баримтлах шаардлага гарч мэдэх вэ? б) Нэг хүүхэд нь тэрсэлбэл эцэг эх яах ёстой вэ?
25 Засарч өөрчлөгдөхгүй байгаа тэрсүү хүнийг «гэртээ бүү оруул. Түүнтэй мэндэлж болохгүй» гэж элч Иохан христиануудад бичсэн байдаг (2 Иохан 10). Насанд хүрсэн хүүхэд зориуд тэрсэлсэн бол эцэг эх дээрх зарчмыг дагах шаардлага гарах байх. Хэдий амаргүй, элэг эмтрэм байсан ч бусад хүүхдийнхээ сайн сайхны төлөө ингэх шаардлага заримдаа гардаг. Гэрийнхнээ анхааран халамжилж, хараа хяналт тавьж байгаарай. Эцэг эхчүүд биеэ хэрхэн авч явах тухай тодорхой хэм хэмжээг ухаалгаар тогтоож, тууштай баримталж байх хэрэгтэй. Бусад хүүхэдтэйгээ илэн далангүй ярилцаж, хичээл сургууль, хурлын үйл ажиллагаанд хэрхэн ханддагийг нь сонирхож яваарай. Бас тэрсэлсэн хүүхдийн хийсэн хэргийг нь жигшиж байгаа болохоос өөрийг нь жигшдэггүйгээ бусад хүүхдэдээ ойлгуулаарай. Хоёр хүү нь харгис хэрцгий авирлаж гэрийнхэндээ аюул учруулахад Иаков хөвгүүдээ бус, уур хилэнд автсаныг нь буруушаасан билээ (Эхлэл 34:1–31; 49:5–7).
26. Зовж шаналж байгаа эцэг эх юу бодвол тайвшрах вэ?
26 Хүүхэд тэрсэлсний бурууг та өөртөө тохож байж болох юм. Хүүхэд хүмүүжүүлэхдээ Еховагаас тусламж гуйн залбирдаг, зөвлөгөөг нь аль чадахаараа дагадаг байсан хүн өөрийгөө хэтэрхий их буруутгах хэрэггүй. Төгс эцэг эх гэж байдаггүй. Та сайн эцэг эх байх гэж хамаг чадлаараа л хичээсэн байж таарна (Үйлс 20:26-тай харьцуулна уу). Хүүхэд тэрслэхэд сэтгэл өвддөг. Ийм зовлон амсаж байгаа таныг Бурхан ойлгоно, үнэнч үйлчлэгчээ орхихгүй гэдэгт итгэлтэй байгаарай (Дуулал 27:10). Тиймээс бусад хүүхдийнхээ сайн сайхныг бодож, гэр орноо сүнслэгээр аюулгүй газар болгохыг хичээгээрэй.
27. Эцэг эхчүүд самуун хүүгийн тухай ёгт үлгэрийг санан юунд найдаж болох вэ?
27 Түүнээс гадна, найдвар бүү алдаарай. Өөрийнх нь төлөө гаргасан хичээл зүтгэлийг хожим хүүхэд тань ухаарч магадгүй (Номлогчийн үгс 11:6). Танайд тохиолдсон зовлонг зарим айл үздэг. Есүсийн ярьсан ёгт үлгэрийн самуун хүү эцэгтээ буцаж ирдгийн адил зарим хүүхэд эргээд ирдэг (Лук 15:11–32). Танай хүүхэд ч ухаараад буцаад ирэх юм бил үү.