ХИЧЭЭЛ 14

Гол санаануудыг онцлох

Еврей 8:1

ТОВЧ АГУУЛГА: Илтгэлээ ойлгоход хялбар болгож, зорилгодоо хүрэхийн тулд гол санаа бүрийг сэдэвтэйгээ холбож тайлбарлаарай.

ЯАЖ ХЭРЭГЖҮҮЛЭХ ВЭ?

Зорилго тавих. Таны илтгэлийн зорилго мэдээлэл өгөх, итгэл төрүүлэх, эсвэл үйл хэрэгт уриалахын аль нь вэ? Илтгэлийнхээ зорилгыг бодоод түүндээ үндэслэн бэлдээрэй. Зорилгодоо нийцсэн гол санаануудыг л илтгэлдээ оруулаарай.

Өөрөөсөө «Сонсогчдод ямар асуулт төрж, юун дээр санал зөрөх бол? Нэг асуултад хариу авлаа ч өөр ямар асуулт урган гарах бол?» гэж асуугаарай. Үүнийг тооцож үзээд илтгэлээ бэлдвэл сонсогчид сайн ойлгож, санал нийлэх болно.
Сэдвийг онцлох. Сэдвийг илтгэлийнхээ туршид сануулахын тулд гол үгээ давтах юм уу ойролцоо утгатай өөр үгээр орлуулж хэлээрэй.
Гол санааг энгийн, тодорхой болгох. Цагтаа багтааж үр дүнтэй заахын тулд зөвхөн сэдэвтээ тохирох гол санаануудыг сонгоорой. Хэтэрхий олон гол санаа оруулж болохгүй. Гол санаа бүрийг тодорхой тайлбарлаарай. Дараагийн санаа руу орохдоо зогсоц хийж, эвтэйхэн шилжээрэй.

Сонсоход амар болгохын тулд гол санаануудаа оршил үгэндээ дурдаж болно. Мөн илтгэлээ дүгнэхдээ давтвал тогтооход тустай.