Уншигчдын асуулт

Левит 19:16-д байдаг бусдын «амийн эсрэг бүү үйлд» гэсэн тушаал ямар утгатай вэ? Эндээс ямар сургамж авах вэ?

Ехова ард түмэндээ ариун байхыг тушаасан. Мөн үүнтэй холбогдуулан «Ард олныхоо дунд хов зөөгч мэт бүү яв. Хөршийнхөө амийн эсрэг бүү үйлд. Би бол ЭЗЭН» гэсэн (Лев. 19:2, 16).

Энэ зүйлийн еврей эх бичигт байдаг хэлцийг «эсрэг бүү үйлд» гэж орчуулсан нь зөв юм. Гэхдээ яг юу гэсэн үг юм бол? «Левит» номыг тайлбарласан иудейчүүдийн нэг бүтээлд «Уг эшлэлийн энэ хэсгийг ... нарийн буулгахад хэцүү. [Энд гардаг] “дээр нь, хажууд нь, ойрхон бүү зогс” гэж үгчилж орчуулдаг еврей хэлцийн цаад санааг бүрэн ойлгох аргагүй учраас тэр юм» гэж бичжээ.

Зарим судлаач энэ хэлцийг өмнөх зүйлтэй нь холбож ойлгодог. Тэнд «Шүүх дээр шударга бусаар бүү үйлд. Ядуусыг өөгшүүлэлгүй, баячуудад долигонолгүй, харин хөршөө шударгаар шүү» гэж бий (Лев. 19:15). Тэднийхээр бол 16-р зүйлд гардаг уг тушаал нь Бурхны үйлчлэгч хүн шүүх дээр, худалдаа наймаа хийхдээ, мөн гэр бүлийнхэндээ шударга бус юм хийж болохгүй, өөрийнхөө ашиг хонжооны төлөө бусдыг хохироож болохгүй гэсэн утгатай байж болох ажээ. Бид ийм юм хийж болохгүй нь ойлгомжтой. Гэхдээ уг зүйлийг илүү уялдаатай тайлбарлаж болно.

16-р зүйлийн эхний хэсгийг анхааръя. Бурхан ард түмэндээ «хов зөөгч [«гүтгэгч», ШЕ] мэт бүү яв» гэж тушаасан. Хов ярих нь мөн адил муу ч, гүтгэх нь бүр илүү аюултай (Сур. 10:19; Ном. 10:12–14; 1 Тим. 5:11–15; Яак. 3:6). Гүтгэлэг гэдэг нь бусдын нэр хүндийг унагах гэж санаатайгаар хэлсэн худал үг юм. Гүтгэгч бусдын амь насанд аюул учруулах байсан ч гэсэн худал мэдүүлэг өгдөг. Набот гүтгүүлснээс болж чулуудуулан шударга бусаар амиа алдсаныг санаарай (Х.дээд 21:8–13). Тэгэхээр Левит 19:16-гийн сүүлийн хэсэгт бичсэнээр, бусдыг гүтгэх нь хүний амийн эсрэг үйлдэл буюу үхэлд ч хүргэж мэднэ.

Түүнчлэн гүтгэх нь тэр хүнийг тодорхой хэмжээгээр үзэн яддагийнх байж болох юм. 1 Ёохан 3:15-д «Ах дүүгээ үзэн яддаг хүн алуурчин. Алуурчин мөнх амьдрахгүйг та нар мэднэ» гэж бий. Бурхан 16-р зүйлд байгаа үгийг хэлснийхээ дараа «Нутгийнхаа залууг зүрхэндээ бүү үзэн яд» гэж хэлснийг анхаарууштай (Лев. 19:17).

Левит 19:16-д байдаг энэ өвөрмөц хэлц Христийн дагалдагчдад нэн чухал зүйлийг сануулдаг. Бид бусдын талаар таагүй юм бодож, гүтгэж огт болохгүй. Өөрөөр хэлбэл хүнд дургүйцэж, атаархаж улмаар гүтгэвэл түүний «эсрэг үйлдэж» байгаа хэрэг болно. Энэ нь үзэн яддагийн шинж байж болох юм. Христийн дагалдагчид хэнийг ч үзэн ядах ёсгүй (Мат. 12:36, 37).