Dhilebiwe ni Matewuji
3 Malabo yaale Juwawu Namabaddiza odhowa olaleya mwiddeddereni oJuda, 2 egihina: “Muthwaruwe, mwaha Omwene wodhulu ohaddamela.” 3 Mwebaribarene ola diyole awogiwe nnamavuhulela Izayiya egihina: “Nihikala ndhu nnithana mwiddeddereni negihina: ‘Mmwegeredhele Yehova* dila! Moogolele dila dhaye.’” 4 Dhowara dha Juwawu dhaali dha mooya a kamelu teto sintunayena naali na thebe noovadda. Dhoojha dhaye dhaali kwaakwa ni enwi yamukokolani. 5 Vano athu aatene ooJeruzale, ooJuda ni amurudda woJordawu yoodha ogumana nuliye, 6 aliwa yobaddiziwa* ni Juwawu mwihinjhe woJordawu, ni yowoga dhoothega dhewa.
7 Vano Juwawu nuwawoona Afarizewu ni Asadusewu owinjhiva yaddamelaga mburo ole wabaddiziwa athu, oliye owoga naliwa egihina: “Nyu odhuulu weevili, baani uwaddenleni wihina munere wanda othawa owali wa Mulugu onafuna odha? 8 Mowindo, mweregena dhithu dhinoniha wihina muhuthwaruwa. 9 Kamwilekethege mwaannya mwegihina: ‘Iyo nili ahima Aabaraawu.’ Mwebaribarene miyo ginowuwaddelani wihina Mulugu afuna podi wasaddula mabwe ala ekale ahima Aabaraawu. 10 Maxadu ohumala opanihiwa wihina agwadde musisi dha muthanko. Mwebaribarene, muthanko ohunavaha dhowima dhapama onere ogwaddiwa ovokedhiwe vamoothoni. 11 Miyo ginubaddizani ni manjhe, mwaha othwaruwa weenyu, mbwenye ole anadha mundduli mwaaga dakopolo ogikwaranya miyo, newene kaginafwanelela orula sandaliya dhaye. Oliye aneere wubaddizani ni muzimu wotxena vamodha ni mootho. 12 Oliye ohukanna paya* mmadani oonvethana tirigu ni aneere oxela mburoya amuugeliyevo tirigu,* amala omuugele veringwini* mbwenye malulaya* aneere wapaha vamoothoni ohunadha othima.”
13 Vano Yesu okuma oGalileya odhowa mwihinjhe Jordawu, wihina abaddiziwe ni Juwawu. 14 Mbwenye Juwawu okoodda egihina: “Miyo ni nyu aafwanelele ombaddiza mukwaye baani, kahi nyu Nabwiya?” 15 Yesu omwakula egihina: “Peeno ohiye wihina dhithudha dhereye ndala, mwaha nimakalelo yaala, nnere wakwaneliha dhithu dhaatedhene dhili dhowogowa.” Vano Juwawu orumedha ombaddiza. 16 Yesu agamanle obaddiziwa, atavuwagawene mmanjheni, odhulu wahifuguwa, vano Juwawu woona muzimu wa Mulugu omukitelaga ninga kangayiwa. 17 Ohiya eyo, nahikuma ndhu odhulu negihina: “Oyo di Mwanaga ginamudhivelimi, ni ginamurumedhimi.”