Dhowera Dhaarumiwi
7 Mbwenye munddimuwa aanamakutha omukoha egihina: “Eyoya ebaribari?” 2 Estevawu wakula egihina: “Addibila ni nyu abaabi, nvuruwane! Mulugu, anthithimiho ahiwoga ni Abaraawu agaali oMezopotamiya ahinathi otamela oAra, 3 omwaddela egihina: ‘Ohiye elabo yawo, emudhi yawo vano odhowe elabo ginuutonyihedhimi.’ 4 Oliye otama elabo yaaKaldewu odhowa okalaga oAra. Vano ababe nuukwa, Mulugu omutamihedha elabo yeela munakalinyu peeno. 5 Mbwenye, kaanvahile mburo wihina okale waye, newene mburo wowapwehavo manyalo aye;* mbwenye ompaganya onvaha elabo yeela ninga yaye, indo odhuulu waye,* naarive oliyeya ahinna mwaana. 6 Ohiya eyo, Mulugu omwaddela wihina odhuulu waye* were okala anyawedda elabo ehili yewa, vano yeere okala adhaari ni yonihiwe goyi ni nlogo muwari mwa yaka 400. 7 ‘Vano miyo ginere otoriha nlogo nenno nnaalabihege ninga adhaari,’ awogile di Mulugu, ‘yindo aliwa enerege ogiparela mabasa ootaleleya mburo yola.’
8 “Ohiya eyo, onvaha nipangano nowineliwa* vano oliye ombala Izaki ni omwinela labo nanetanu natharu, teto Izaki ombala* Jako vano Jako aali baabi a mahimo 12. 9 Vano addibile Juze obajha omukalela nrima teto aliwa omuguliha ni akudda Ejipitu. Mbwenye Mulugu aalive nuliye 10 ni ahimobola muwari mwa makathamiho aye aamatene, omweddela thagaraga ni onvaha thotho vamentoni va Farawo mwene oWijipitu. Nuwindo oliye omuthoma wihina athongege Wijipitu ni vaade vaye. 11 Vano, oKanaa ni elabo yaatene yoWijipitu okalawo dala, hee, makathamiho manlubale, teto makolwihu kiyona newene ethu yoojha. 12 Mbwenye Jako wiiwa wihina Wijipitu wahikala dhoojha,* vobajhavene oliye warumawo makolwihu. 13 Olenddo wanabili, oliye wawaddela addibile wihina aali ddibiliwa Juze, vano Farawo onona emudhi ya Juze. 14 Nuwindo, Juze oruma wihina amudhaaye aatene ni ababe Jako edhiwena, athu owakwana 75. 15 Vano Jako odhowa Wijipitu okwela wengo ninga makolwihu. 16 Aliwa othukuleliwa murudda woSike ni opwehiwa mmahame Abaraawu aagunliye ni amwaana Hamori, oSike, ni mwanamuthengo wa korowa ya parata.
17 “Mudhidhi waddamelaga wihina wakwanele mpaganyo Mulugu eriliyena ni Abaraawu, nlogo othabwagave winjhiva elabo yoWijipitu. 18 Vano, Wijipitu okalawo mwene mmodhaya ahanonne ethu wodhela Juze. 19 Mwene yola olabihedha nimakalelo abure onamathonga waye wihina oonihe goyi nlogo nehu vamodha ni makolo ehu, aawaddihedhaga wasukuma aniwa wihina yahikalewo. 20 Mudhidhi yoole obaliwa Moyizeji, oliye aali owoma vanlubale.* Teto aaleliwe mweri miraru vaade vaababe. 21 Mbwenye, mwaha wowaddihedhiwa aliwa* omusukuma, vano mwaana Farawo omuthukula ni omulelaga ninga mwanaye. 22 Nuwindo, Moyizeji oxagihiwa ni enonelo yaatene yakudda Ejipitu. Mwebaribarene madhu aye ni dhowera dhaye dhahikanna kopolo.
23 “Vano oliye aganna yaka 40, othoma odhowa wawona addibile, amwaana Ezarayeli. 24 Numoona mukudda Ejipisiyu mmodha amonihaga goyi mukwaye oliye odhowa omwakihedha ole onihiwa goyi, nuwindo oliye ompa mukudda Ejipitu. 25 Oliye ubuwela wihina addibile yeere wonelamo wihina Mulugu, eera wavulusa wodhela nlada naye, mbwenye aliwa kiyonelemo. 26 Nlabo noharela, wafwanya amodha ewanaga, vano oliye osayela makalelo owawakihedha egihina: ‘Nyu alobwana, munawanela ddi mugaali oddibilave?’ 27 Mbwenye ole athabwa omoniha goyi mukwaye omutukuma ni owoga egihina: ‘Uthomme baani ninga mwene wihina onithongege iyo? 28 Onafuna ogipe ninga ompiliwe mukudda Ejipitu ndilo?’ 29 Moyizeji nuwawiwa madhu yaala, othawela oMidiya, wabalawo ahima abiili ni okalaga wengo ninga munyawedda.
30 “Nuuvira yaka 40, mungero onfiyedha mwiddeddereni mwango woSinayi vaari vanikupu nahidda mootho. 31 Moyizeji nuwona, oliye otikina vanlubale. Mbwenye nuuxixa waddamela wihina oone pama, oliye wiwa ndhu na Yehova* negihina: 32 ‘Miyo gili Mulugu a makolwinyu, Mulugu a Abaraawu a Izaki ni a Jako. Vano Moyizeji wambela ogurumela newene kaaxixile osugwa dila biili. 33 Yehova* omwaddela egihina: ‘Karula sandaliya dhawo mwaha mburo onanyingaliwe, mburo woweela. 34 Mwebaribarene ginowoona goyi enna nlogo naaga nili Wijipitu, gihiwa wunla* wewa ni ginere okita wihina gawobole. Vano kadha wuno: ginere wuruma Wijipitu.’ 35 Di Moyizeji yoyo emukooddiliwa yegihina: ‘Uthomme baani ninga namathonga obe namatoriha?’ diyole Mulugu amurumiliye ninga namathonga ni namoobola wodhela mungero anfiyedhile vanikupuni. 36 Mulobwana oyo ohuthukulelani ode, aweragana matikiniho ni dhintelelo elabo yoWijipitu, niya Yoofila ni mwiddeddereni, muwari mwa yaka 40.
37 “Oyo di Moyizeji awogile ni amwaana Ezarayeli egihina: ‘Mulugu enyu, aneere omukumeleliha vaari va addibilinyu, namavuhulela ooligana ni miyo.’ 38 Duliye eeddiha nlogo mwiddeddereni; oliye aali ni mungero aamwaddele agaali omwangoni Sinayi vamodha ni makolo ehu. Oliye ohaddeliwa madhu ootaleleya ni eegumi wihina anaddele iyo. 39 Makolo ehu yahikoodda omwiwelela, mmurimani mwewa yunlela ohogolowela Wijipitu, 40 ewogaga ni Arawu yegihina: ‘Onuubele mulugu ehu wihina anisogolelege. Mwaha kannonile ethu empadduwele Moyizeji yoyo anthukule Wijipitu.’ 41 Nuwindo, aliwa wuuba ekwamuthu ya mwana ng’ombe ni opahela mukutho ekwamuthu ele, Vano aliwa wambela ohagalala mwaha wa mabasa yapanriwa ni madiwa. 42 Nuwindo, Mulugu waanyanyala ni wahiya wihina yebedhege nduwa, mweri ni thendderi dhodhulu, mowindala ninga mulebiwe mulivuruni nanamavuhulela yegihina: ‘Nyu amwaana Ezarayeli, mukutho ndhe mwakuthinyu mugaali mwiddeddereni muwari mwa yaka 40, mwagikuthela miyo? 43 Naari, nyu muhummaga ddammwa a Moloki ni thendderi dha mulugu Refa, dhikwamuthu muubilinyu wihina mwebedhege. Bumwahaya gidhe guhiyegeni wihina muthukuleliwe oBabiloniya.’
44 “Makolo ehu yahikanna ddammwa oonamoona mwiddeddereni, mowiwanana ni ele Mulugu aamurumiliye Moyizeji wihina ammage ninga makalelo ooniliye. 45 Teto, makolo ehu yahimwaakela ni makolo ewa vano aliwa omudhana ni Jozuwe elabo ya malogo Mulugu aawigariye vamentoni va makolo ehu. Oliye okalave ni iyo ofiyedha malabo a Davidi. 46 Oliye orumedhiwa vamentoni va Mulugu ni oloba wihina avahiwe oneeti wommagela nyumba Mulugu a Jako. 47 Mbwenye di Salomawu ammagele nyumbaya. 48 Teto, Namadhuludhulu kanakala nyumba dhomagiwa naathu, ninga anawoga namavuhulela egihina: 49 ‘Elabo yodhulu bumpaddo waaga mbwenye elabo yavati mburo ginaapwehimivo manyalo aaga. Munagimagele nyumba baani? anawoga di Yehova.* Mburo waaga wowithuwa winaakale wuuvi? 50 Kahi madaaga epadduse dhithu dhaatedhene ndha?’
51 “Athu nyu owumma mmurima ni oohineliwa murima ni mabaru enyu, malabo aamatene munoovanya muzimu wotxena. Mowindo, ninga makolo enyu yeriliwana ni nyunwa munerana emodhave. 52 Namavuhulela baani makolo eenyu ehimuharahariwa? Hee, muthu owoogowa ahinafiye athu yahilaleya odha waye, mbwenye nyu waapa, bumwahaya peeno nyu muli amwiddani ni anamapa, 53 nyu muhakela nlamulo mwaddeliwinyu ni angero mbwenye kamwiwelele.”
54 Numala wawiwa madhu yaala, aliwa otakaleliwa* vanlubale ni wambela omulumela meeno.* 55 Mbwenye oliye odhaaleliwa muzimu wotxena, osugwa pamadhene odhulu, woona nthithimiho na Mulugu, Yesu agimenle moono woojha wa Mulugu, 56 ni owoga egihina: “Ginowoona odhulu wigafuguwe, Mwaana Muthu agimenle moono woojha wa Mulugu.” 57 Vano, aliwa okuwa ni ndhu nootama ni waathiya mabaru ewa, aatene ommaruwela. 58 Numala omutxetxeresela ode wa sidadi ele, aliwa wambela ompwesa ni mabwe. Anamoonaya yamuhiyedha malayiwa muzombwe dhaala ithaniwa Sawulo. 59 Wula empwesaga ni mabwe, Estevawu olobela egihina: “Nabwiya Yesu, mwakele muzimu* waaga.” 60 Nuwindo, oliye okokora, ni okuwa ni ndhu nootama egihina: “Yehova,* kamwaatorihe mwaha yotheega ela.” Nuwoga ndo, oliye okwa.*