Dhowera Dhaarumiwi
16 Nuwindo, Pawulo ofiya oDerbi ni oListra. Wewule ahikalawo namahara ithaniwa Timotiyu, amaye yaali maJudewu ni yahikanna nroromelo, mbwenye ababe yaali agerego, 2 teto addibila oListra ni oWikoniyu, yomuwoga pama Timotiyu. 3 Pawulo onvelela Timotiyu wihina iineliwe mwaha wa maJudewu yakala mburo yoole, woona wihina ababe yaali agerego. 4 Musidadi mwatemwene mwaviriwa, yowawaddela addibila dhothoma dha arumiwi ni dha anamaholela mulogo oJeruzale, wihina yiwelelege dhithu dhaathomiwe. 5 Mowindala, addibila ammulogoni yolibihiwa munroromeloni ni yowinjhivana kadda labo.
6 Aliwa ovira oFirijiya ni murudda woGalasiya, mwaha muzimu wotxena wahakoddiha walaleya madhu a Mulugu elabo yoAziya. 7 Ohiya eyo, nuuddemulela oMiziya ofunaga wihina edhowe oBitiniya, mbwenye muzimu wa Yesu* waakoddiha. 8 Nukuma oMiziya aliwa okitela oTorowadi. 9 Vaari va mahiyu, Pawulo oroha amoonaga mulobwana dhaala ooMasedoniya agimenle ni amulobaga egihina: “Kawerena, kafiya oMasedoniya wuno onikavihere.” 10 Vano, yoroha ele egavinre, iyo odhowa oMasedoniya, nihanganyedhaga wihina Mulugu dinithane wi nalaleye muthenga dhapama.
11 Nuwindo, iyo okuma oTorowadi wabuwela oSamotaraziya, mbwenye vati nuusa, iyo odhowa oNeyapoli; 12 Nuukuma wewule iyo odhowa oFilipu, sidadi yakudda Roma* ni sidadi yinlubale ya murudda woMasedoniya. Iyo okala sidadi yeele mwana malabo vang’ono. 13 Labo na Sabadu iyo okumela musiwo wa sidadi, odhowa sere-sere ya mwihinjhe, nubuwelaga wihina wahikalawo mburo wolobela. Vano iyo okarati walaleyaga ahiyana nafwannyihu egatugumane mburo yoole. 14 Muhiyana dhaala ithaniwa Lidiya a sidadi yoTiyatira, aguliha guwo dhohiyana-iyana ni amwebedha Mulugu eera onivuruwana. Yehova* onfugula pamadhene murima waye wihina aavuruwane madhu awoga Pawulo. 15 Nuwindo, oliye vamodha naathu a vaade vaye numala obaddiziwa, wambela waawadda egihina: “Nyu moona wihina gili oororomeleya wa Yehova,* mudhe mukale vaade vaaga.” Mwaha woniwadda iyo noonne omuhara.
16 Nlabo nimodha, ndowaga mburo wa malobelo, iyo omugumanana mudhaari a muhiyana onihiwa goyi ni demoniyu asoriha dhithu dhereye osogolo. Mwaha wa yeyo, annyaya yowakela korowa dhowinjhiva. 17 Namwali oyo, oomuhara Pawulo nihiyoya, akuwaga egihina: “Alobwana ala adhaari a Mulugu oodhulu enalaleya dila yovulusa.” 18 Yahivira malabo owinjhivene akuwaga ndale. Vano Pawulo otakaleliwa, orugunuwa ni owoga egihina: “Ginowuwaddela ni ndina na Yesu Kiristu wihina okumemo mmwiilini mwaaye.” Vano muzimu ole wabure okumamo mudhidhi yoole.
19 Alobwana aalabesiye nuwoona wihina dhithu eresiyena dhahigomawo, aliwa omwihidda Pawulo ni Silaji watxetxeresela vamerkadu manlubale ni wa anamathonga. 20 Numala aliwa wathukulela wa anlubale a sidadi ni owoga yegihina: “Alobwana ala enna ovunganyedha murenddele wa sidadi yehu, aliwaya egaali maJudewu 21 ni enna ovuwiha dhilemelelo nihinarumedhiwihu ohara, newene werana, woona wihina nili aRomanu.” 22 Vano muthithi waatene waathu omurugunuwela Pawulo ni Silaji; Teto anlubale a sidadi wawaka dhowara dhewa ni oruma wihina yuukuthiwe. 23 Numala wawukutha vanlubale, wavokedha mukambura ni oruma wihina namasugwera kambura, aasugwerege pamadhene. 24 Nuwakela nlamulo nenna, oliye wavokedha kambura ya muwari ni omagelela mweddo dhewa vakuguluni.
25 Mbwenye, vaari va mahiyu, Pawulo ni Silaji yeera olobela ni envuwihaga Mulugu ni jhibo, teto anyakambura amodha yowavuruwana. 26 Morurumusa, woneya oddiginyeya weelabo winlubale ofiyedha alisersi a kambura obwanyuwa. Mudhidhi yoole musiwo dhaatene ofuguwa teto makurenti yamagiwiwana opadheya. 27 Vano namasugwera a kambura nuvenya ni nuwoona wihina musiwodha dhaali dhofuguwadhene, oliye oweta supaddanaye ofunaga wiipa, ubuwelaga wihina anyakambura aatene yahimala othawa. 28 Mbwenye Pawulo okuwa egihina: “Kawerena kuwipe, mwaha iyo aatene nili mwemuna!” 29 Nuwindo, oliye oloba wihina emudhena lampada, vano oliye ovolowa athamagaga ni agurumelaga, okokora vamentoni va Pawulo ni Silaji. 30 Oliye waakumihedha ode ni wakoha egihina: “Nyu alobwana, gere ddi wihina givuluwe?” 31 Aliwa omwakula yegihina: “Omurumedhe Nabwiya Yesu windo onere ovuluwa we, vamodha ni athu a vaade vaawo.” 32 Aliwa omwaddela madhu a Yehova* oliye, vamodha ni athu a vaade vaye. 33 Oliye wathukula emahiyu yeele ni wasuwa makwadda ewa. Nuwindo, oliye vamodha ni athu a vaade vaye obaddiziwa moohilegela. 34 Vano, wathukulela vaade vaye ni waavaha yoojha, teto oliye vamodha ni athu aatene a vaade vaye ohagalala vanlubale mwaha omurumedha Mulugu.
35 Vati nuusa, anlubale a sidadi waruma anamasugwera wihina yamwaddele namasugwera kambura yegihina: “Watapule alobwana ayo.” 36 Namasugwera ole, omwaddela Pawulo madhu ala egihina: “Anlubale a sidadi ehiruma wihina mutapuliwe nyu abiili. Vano, kumani mudhowege ni murenddele.” 37 Mbwenye Pawulo wawaddela egihina: “Aliwa enukuthile vaari vaathu nahitorihiwe naarive nigaali aRomanu, ni onivokedha mukambura, vano enaniruma wihina ndhowege moviteya? Naari! Edhe annyene wihina enikumihe.” 38 Vano anamasugwera ale, odhowa wawaddela madhu ala anlubale a sidadi. Teto nuwiwa wihina alobwana ale yaali aRomanu aliwa obajha woova. 39 Nuwindo, aliwa omaruwa odhowa waloba nikurumuwelo, vano nuwakumihedha ode wawaddela wihina evenyemo musidadi mune. 40 Mbwenye Pawulo ni Silaji, nuukuma mukambura mune, odhowa vaade va Lidiya. Nuwawoona addibila, aliwa walibiha, nuwindo omaruwa odhowaga.