Dhowera Dhaarumiwi
25 Vano, nuuvira malabo mararu, agaafiyile sidadi yeele ni nubajha othonga, Festu odhowa oSezareya waali murudda woJeruzale. 2 Nuwindo, anddimuwa aanamakutha ni alobwana athima amaJudewu odhowa omusumela Pawulo. Obajha omuloba Festu ni ntidi 3 wihina aweenye odhiwana Pawulo oJeruzale. Mbwenye aliwa yera wiwegeredha wihina emwipitelele yamala empe mudila ahinafiye. 4 Mbwenye, Festu wakula wihina Pawulo eere okalave mukambura oSezareya mwaha oliye eere ohogolowelawo mohilegela. 5 “Mowindo”, oliye owoga egi, “edhowe vamodha ni miyo anamaholela enyu amodha wihina yawoge muladdu anniyena, akala mulobwana oyo oherana ethu-sithu yabure.”
6 Nuwindala, egavinre malabo matanu namararu obe malabo kumi, agaali vamodha naaliwa oliye odhowa oSezareya, labo noharela, okarati otiribunale oruma wihina adhiwena Pawulo. 7 Vano Pawulo nuuvolowa, maJudewu yadhile oJeruzale omurijha, emwinkedhaga dhithu dhabure, aliwa yahanniwana ebaribari.
8 Mbwenye Pawulo ibarelaga owoga egihina: “Miyo kagenrena yotheega enaalupa malamulo amaJudewu, newene wodhela tempulu,* newene wodhela Sezare.” 9 Festu, asayelaga wahagalasa maJudewu, omukoha Pawulo egihina: “We onafuna odhowe oJeruzale watorihiwe wengo, wodhela dhithu ndha?” 10 Mbwenye Pawulo omwakula egihina: “Miyo gili mmadani* mwa Sezare, ginafunimi otorihiwamo. Kagathegele maJudewu, ninga nyu munonilinyu pama. 11 Akala miyo gili mpanga ni giherana ethu ginafwanelemi opiwa, kaginakodda okwa, mbwenye akala dhithu enaginkedha alobwana ala kahiyo ebaribari, kaavo anna ofuru wogipeleka waaliwa. Ginaloba mugidhowena wa Sezare!” 12 Nuumala owoga nnikuru naanamalaga, Festu wakula egihina: “We olobile odhowiwana wa Sezare, Sezare anere wutoriha.”
13 Nuuvira mwana malabo vang’ono, mwene Agiripa ni Berenisi ofiya oSezareya wihina yamulojhele Festu. 14 Woona wihina yeere okala malabo owinjhivene vamodha nuliye, Festu omwaddela mwene muladdu wa Pawulo egihina:
“Ohukala mulobwana dhaala Felikisi anfugeliye mukambura; 15 mudhidhi ngali oJeruzale, anddimuwa aanamakutha ni anamaholela maJudewu odha ogaddela dhithu dhereye wodhela oliye ni ogiloba wihina oliye avokedhiwe mukambura. 16 Mbwenye, miyo omwakula wihina kinenyeya aRomanu ompeleka muliba muladdu wula ahinagumane ni athuya enamwinkedha teto muthuya ahinakane ofuru wowogamo dhithudha emwinkedhiwa. 17 Aliwa nuufiya wuno, mohilegela labo noharela miyo okarati otiribunale ni oruma wihina adhiwena mulobwana oyo. 18 Vano athuya yamwinkedha nuvenya wihina ewoge, kiwogile ethu yabure ninga gubuwelimi. 19 Aliwa yawoga baahi muselu wodhela gerejaye* ni wodhela mulobwana dhaala anithaniwa Yesu akwile, mbwenye Pawulo adidenliye owoga wihina ohukalawo. 20 Gihonagavo muladduya yakanganeliwa, miyo omukoha akala ofuna odhowa oJeruzale wihina atorihiwe wengo wodhela muladdu waye. 21 Mbwenye, Pawulo oloba wihina akaleve oomagiwene ajhehedhaga yothoma ya Agustu,* miyo weenya wihina akaleve oomagiwene ofiyedha miyo omuruma wa Sezare.”
22 Nuwindo Agiripa owoga ni Festu egihina: “Nimiyowa ginofuna gimwiwe mulobwana yoyo.” oliye omwakula egi: “Mangwaana onere omwiwa.” 23 Vano labo noharela, Agiripa ni Berenisi ofiya yithithimihaga vanlubale ni ovolowa mburo wawogiwa muladdu, vamodha ni anamasogolela aanyakoddo ni alobwana othithimihiwa a sidadi. Nuwindo Festu waruma wihina emudhena Pawulo. 24 Festu owoga egihina: “Mwene ni nyuwa aatene muli vala, munowona wihina mulobwana ola yoyo nlogo naatene na maJudewu egilobiliwa, okuma oJeruzale ofiyedha wuno, ekuwaga wihina oliye kafwanelele okalawo. 25 Mbwenye miyo wonelamo wihina oliye kenrena ethu yabure yamuthukulele opiwa. Oliye nuuloba wihina adhowe wa Agustu, miyo weenya. 26 Egerihe sowi kaginna ethu yowulebelani nyu nabwiya wodhela oliye. Bumwahaya gihimudhana vamentoni veenyu thabwa-thabwa nyu mwene Agiripa, wihina mwamala omukoha, gikanne ethu yoleba. 27 Mwaha ginoona wi kayakale yapama omuruma munyakambura mmadani mweenyu gihiwogile dhithudha emwinkedhiwa.”