Alebeliye Akudda Romanu
9 Ginawoga ebaribari mwa Kiristu, kaginowoota, woona wi mubuwelo waaga onogivaha onamoona wodhela muzimu wotxena: 2 gihukuwa vanlubale ni ginowoona widdela mmurimani mwaaga mudhidhi wamutene. 3 Ginorumedha wulumeliwa vamburoni va addibilaga ehinamuhara Kiristu akala eyo eneere wakavihera 4 mwaha aliwa bi amwaana Ezarayeli. Aliwa ehisakuliwa ninga ahima a Mulugu, ehithithimihiwa, ehivahiwa nipangano, ehivahiwa Malamulo, ehihudhihiwa wapara mabasa ootaleleya ni enere wakela mpaganyo. 5 Aliwa ebaliwe ni makolo ehu teto Kiristu adheele wa aliwa epaddi yomwiilini. Mulugu ali mwinnya a dhaatedhene athithimihiwe ni mukalakala. Amem.
6 Mowindala, kahiyo wihina madhu a Mulugu ehivirigana. Teto kahi wi aatene eli odhuulu wa amwaana Ezarayeli, mwebaribarene “Ezarayeli”. 7 Teto kahi wihina mwaha okala odhuulu* wa Abaraawu eyo enatapulela wi aatene baanaye, ohiya eyo: “Onithaniwege odhuulu wawo onaadhe wa Izaki.” 8 Eyo enaatapulela wi ahima oomwiilini, mwebaribarene kahiyo ahima a Mulugu, mbwenye baale ebaliwe wodhela mpaganyo wa Mulugu, yayo bili odhuulu* wa Abaraawu. 9 Mwaha Mulugu ahinvaha mpaganyo ola egihina: “Ginere ohogolowa yakeeyo mudhidhi ninga yoola, teto mwariyo Sara aganna mwaana mwanamulobwana.” 10 Eyo kipadduwile mudhidhi yoole baahi, mbwenye mudhidhi Rebeka aabanliye ahima* a mulobwana mmodha, Izaki nikolo nehu; 11 mwaha ahimaya ehinabaliwe teto ehinathi werana ethu yapama obe yabure, Mulugu ahoniha wihina efunelo yaye yeere wereya. Ohiya mwaha wa mabasa enaapara athu mbwenye mwaha wa ole amwithanniye ni 12 amwaddela egihina: “Mwaana oomusuzaya, aneere okala mudhaari a mwaana mung’onoya.” 13 Mowindo ninga dholebela dhinawogiwa dheegi: “Gihimudhivela Jako, mbwenye gihimwidda Ezawu.”
14 Kivano nnaawoge ddi? Nerege Mulugu kahiyo owogowa? Mwebaribarene naari! 15 Mwaha oliye ohuwoga ni Moyizeji egihina: “Ginere omweddela thagaraga muthu yoyo ginamweddelimi thagaraga ni ginere omukalela nthebwa muthu yoole ginaamukalelimi nthebwa.” 16 Mwaha eyo kinadhela wa efunelo ya muthu obe wilibihedha waye, mbwenye wodhela efunelo ya Mulugu anna thagaraga. 17 Mwaha epaddi modha ya Yolebela enawoga wodhela Farawo enihina: “Bumwahaya gidhe guhiyege okalawo, wihina wodhela we miyo goonihe kopolo dhaaga teto wihina ndina naaga nivuwihiwe elabo yaatene.” 18 Mowindo, oliye onomweddela thagaraga ole ananfuniye, mbwenye onomummiha murima ole anafuniye omummiha.
19 We onere ogikoha wegihina: “Mwahaya bwaddi Mulugu agaatoriha athu? Baani ananda ovanya efunelo yaye?” 20 We oli aani oofunaga okangana ni Mulugu? Nerege ethu yowubiwa enomukoha muliba uubile yegihina: “Ogubele ddi ndala?” 21 Muliba wuuba biya afuna, kanubana ologo mmodhave biya yowaparana mabasa athima obe ehinapariwana mabasa athima? 22 Kivano nnaawoge ddi wodhela Mulugu, naarive afunaga woniha owali waye ni wooniha kopolo dhaye, ohujheha nuuvilela biya dhikaleliwe owali ni dhegeredhiwe wihina dhitolosiwe? 23 Ki akala oliye erilena ndo wihina athu aatene enone dhoreela dhaye dha nthithimiho wodhela biya dhikaleliwe dhathagaraga egerendhiye kale wihina dhaakele nthithimiho, 24 athu ayo di iyo ithaniwe wahiya maJudewuve baahi, mbwenye ni athuya amalogo mamodha. 25 Eyo enowiwanana ni ele awogiliye mulivuruni na Ozeya egihina: “Wa athu yaale ehili nlogo naaga ginere withana ‘nlogo naaga’ teto ale gahadhivelimi gineerege ‘wadhivela.’ 26 Teto mburo vaddeliwiwavo wihina: ‘Nyu kamuli nlogo naaga,’ mburo yoyo miyo ginere wawithana ‘ahima a Mulugu ookalawo.’”
27 Ohiya eyo, Izayiya onookuwa wodhela Ezarayeli egihina: “Naarive amwaana Ezarayeli ethabwe winjhiva ninga mutxesa wa muniya, enaavulusiwe kayinjhivile. 28 Mwaha Yehova* aneere wawoga muladdu athu aatene a veelaboni yavati ni kanalegelihe otorihiwa wewa.” 29 Ohiya eyo, ninga Izayiya awogiliye egihina: “Yehova* aanyakoddo ahere ahinihiyedha odhuulu,* iyo nakale ninga Sodoma ni naaliganege ninga Gomora.”
30 Kivano nnaawoge ddi? Athu a malogo mamodha naarive ehilibihedhaga wihina ekale athu owogowa, ehifwanya wogowa onadha mwaha nroromelo; 31 mbwenye naarive Ezarayeli agilibihedhe vanlubale wiwelela nlamulo nowogowa, kandile wiwelela nlamulo nno. 32 Mwahaya bwaddi? Mwaha aliwa yahilibihedha wiwelela nlamulo nno mbwenye kayanna nroromelo, yubuwelaga wihina yera wiwelela mwaha wa mabasa yapariwa. Bumwahaya edhe ekwakwathuwege “vanibweni nookwakwathusa,” 33 Ninga dholebela dhinawogiwa dhegihina: “Kasugwani! Miyo ginopweha Osiyawu nibwe nookwakwathusa, nnibwe nnaamothiha athu, mbwenye muthu yoole anaaroromele nibwe nno kanadha aathukulaga manyazo.”*