Karta na Tiyago
2 Addibilaga, dhinandeya addi okanna nroromelo nNabwiya ehu oothithimiheya Yesu Kiristu, mudhidhi mmodhave muganna nsakulo? 2 Obe mmutugumanoni mweenyu evolowamo athu abiili; mmodha agawanre aaneli ni dhowara dhathima, mbwenye mmodhaya oohawa ni agawanre dhowara dhotakala, 3 gerege munathabwa omusugwa muthu yoole anawara dhowara dhathima ni munowoga nuliye mwegihina: “Kakarati mburo ola wathima,” mbwenye munowoga nuule ali oohaawa mwegi: “Kiimela vala,” obe: “Kakarati vati, waddamela vala ginaapwehimivo manyalo aaga”? 4 Akala eyo enowereya, kamunoonelamo wihina muhukanna nsakulo ni muli anamatoriha enerana dhothoma dhabure?
5 Mvuruwane addibilaga ginathabwimi wudhivelani. Kahiyo ebaribari wi Mulugu ohasakula athu enooniwa ninga oohaawa mwilaboni wihina ekale ooreela munroromeloni ni yakele Omwene oliye aapaganyiliye ale enamudhivela? 6 Mbwenye nyu munowanyemula athu oohaawa. Kahiyo athu ooreela enuwonihesani goyi ni enuuthukulelesani mmatiribunale? 7 Kahiyo aliwene enanyemula ndina nothithimiheya nenno nvahiwinyu? 8 Mwavirihamo nlamulo nna ninlubale na Mwene, ninga epaddi dhaala ya yolebela enawoga yegihina: “Omudhivelege mwanddamani awo ninga onidhiveliwe,” munowerana pama. 9 Mbwenye akala nyu muhudidelave woniha nsakulo, munna werana yoothega ni munere otorihiwa ni nlamulo ninga aliba oothega.
10 Mowindala, akala muthu onowiwelela Nlamulo naatene, mbwenye onoothegela epaddi modha, muthu yoyo ohuthegela Nlamulo naatene. 11 Mwaha ole awogile egihina: “Kukume mba” teto ahiwoga egi: “Kumpe muthu.” Mowindala, akala nyu kamunakuma mba mbwenye munompa muthu, munna othegela Nlamulo. 12 Makalelo enyu owoga ni mweeddelo weenyu wonihege wi muli athu enaatorihiwe ni nlamulo na nlogo notapuwa. 13 Ole ahinaweddela thagaraga athu amodha, aneere otorihiwa aheddeliwe thagaraga. Bumwahaya sapama waweddela athu amodha thagaraga ohiya watoriha wahaweeddele thagaraga.
14 Addibilaga, muthu anapuravo ddi awoga egi gihikanna nroromelo wula mabasaya a nroromelo nno yahoneyaga? Nerege nroromelo ninga nenno podi onvulusa? 15 Kito akala ddibila obe murogola kanna yowara newene yoojha ya nlabo nimodha, 16 vano muthu mmodha wa nyu anomwaaddela egihina: “Weedde ni murenddele; ofwanye dhowara ni yoojha yowakwana labo nantero,” mbwenye kanvahile ethu anahoweliye wihina akalewo, apunrevo ddi? 17 Mowindala, okanna nroromelove baahi wula nahoneyagana mabasaya, nroromelo nno nihikwa.
18 Mbwenye muthu podi owoga egihina: “We ohukanna nroromelo, miyo gihikanna mabasaya. Ogitonyihedhe nroromelo naawo nahinna mabasa, miyo ginere wuwoniha nroromelo naaga vamodha ni mabasaya.” 19 We onorumedha wihina aliwo Mulugu mmodha baahi? Eyo sapama. Teto naademoniyuya enorumedha ni enoogurumela mwaha wowoova. 20 Taduwa we, onafuna woone wihina nroromelo nahikanna mabasa theebewene? 21 Yaamuthukulele baabihu Abaraawu wooniwa ninga muthu owoogowa, kayali wodhela mabasa aye mwaha ompeleka mwanaye Izaki ninga mukutho valtareni? 22 Kasugwa makalelo nroromelo naye niiwananiwa ni mabasa aye ni makalelo nroromelo naye naaliwa noologomana mwaha wa mabasa aye, 23 mwaha wa yeyo, wakwanela Yolebela enihina: “Vano Abaraawu omuroromela Yehova,* bumwahaya Mulugu adhe amoonege ninga muthu owogowa,” nuwindo oliye withaniwaga mukwaye Yehova.
24 Vinowooneya wihina muthu anooniwege ninga owogowa, mwaha wa mabasa aye ohiya mwaha wa nroromelo baahi. 25 Ni makalelo mamodhave, Rahabe aali namararuwa, kooniwe ninga muthu owogowa mwaha wa mabasa aye nuumala wawakela pama anameddelela vaade vaye ni wakavihera othawa eviraga dila emodheene? 26 Mwebaribarene, mowindala ninga mwiili wahikanna muuya onakaliwa wookweene, ni makalelo mamodhave nroromelo nahikanna mabasa nihikwa.