Dhilebiwe ni Lukaji
8 Nuuvira mudhidhi vang’ono, oliye wambela weedda olenddo aviraga sidadi ni sidadi, murudda dhohiyana-iyana, alaleyaga muthenga dhapama dha Omwene wa Mulugu. Ni anamahara aye Kumi nabiili yaali nuliye, 2 ohiya eyo, yahikalavo ahiyana amodha yaakumihiwe muzimu dhabure mmwiilini mwewa ni yavulumusiwe dhiredda dhewa: Mariya, ithaniwa Madalena, yoyo akumihiwe ademoniyu Atanu nabiili; 3 Jowana mwadhiye Kuza, namalaba a Erodi; Suzana ni ahiyana amodha owinjhiva yakaviheresa ni dhoreela dhewa.
4 Vano muthithi waathu wadhela sidadi dhohiyana-iyana nutugumana vamodha naale yaali nuliye, oliye owoga naliwa alabihedhaga yoladdaniha: 5 “Namaala bewu omaruwa wihina amidhe. Amidhaga,* thanga dhimodha omorela sere-sere ya dila athu onyingalela, vano balame odha oddoddelavo. 6 Thanga dhimodha omorela vamabweni vaali thaya vang’ono, omela, vohilegela wumma, mwaha thayaya kayinjhivalevo. 7 Dhimodha omorela vamwingani, vano mwinga ndhe nuwunnuwa ohoga. 8 Mbwenye dhimodha omorela vathayani yapama, ni wambela ovaha dhowimma, ovahamo okwaranya 100.” Numala wawaddela dhaatedhene ndha, owoga ni ndu nootaama egihina: “Ole anna mabaru owiwa, avuruwane.”
9 Vano anamahara aye omukoha yoladdaniha ela yatapuleliwa. 10 Oliye wawaddela egihina: “Nyu muhuvahiwa ofuru wowonelamo dhoviteya dhotaleleya dha Omwene wa Mulugu, mbwenye waathu amodha enaaddeliwa ni dholaddaniha, wihina yonege, mbwenye yonelege ebewene, yiwege, mbwenye yahonelegemo. 11 Yotapulela ya yoladdaniha ela siila: Bewu enatapulela madhu a Mulugu. 12 Mbwenye thanga ndhe dhimorele sere-sere ya dila enatapulela ale yiwale, Ddiyabo odha wavenyihamo madhu a Mulugu mmurimani mwewa, wihina yaharumedhe newene yahivulusiwe. 13 Ndhe dhaliwe vanibweni enatapulela ale yawiwale madhu a Mulugu enowarumedha nuuhagalala mbwenye kiyanna musisi. Enovilela mudhidhi vang’ono mbwenye yeehiwa kuhukanna nroromelo. 14 Ndhe dhaliwe vaari vamwinga enatapulela ale yawiwale madhu, mbwenye mwaha wofwanyiwa makathamiho, ojhiwa murima ni dhoreela ni dhofuna dhamwigumini, aliwa omala ohogiwa ni kinavaha dhowima dhowithwa. 15 Ndhe dhaliwe thaya yapama enatapulela ale yawiwale madhu ni murima wopwaseya ni wapama, wakoya mmurimani mwewa ni ovaha dhowima nuuvilela.
16 “Kaavo anamuhiddiha lampada, amukunela obe ampweha mukukutuni mwa kama, mbwenye anatomeyiwa vadhulu wihina ale enavolowa waara wule wamoneyege. 17 Bumwahaya, kayiwo ethu yowipiteya ehinooneye, newene kayiwo ethu yoviteya ehinadha enoniwa ni ekumelela vathaddo. 18 Bumwahaya, mpwasedhe pamadhene makalelo munavuruwaninyu; mwaha ole anna aneere ovahiwave, mbwenye ole ahinna, naarive nileya anubuweliye wihina ohukanna aneere waakiwa.”
19 Vano amaye ni addibile ofiya, mbwenye kiyandile waddamela mburo vaaliye mwaha wa muthithi waathu. 20 Nuwindo, oliye waddeliwa wihina: “Amaminyu vamodha naaddibilinyu eli ode wula, enafuna yuwooneni.” 21 Oliye wawakula egihina: “Ammaga naaddibilaga biyaale enawiwa madhu a Mulugu ni yavirihagamo.”
22 Labo dhaala, Yesu vamodha ni anamahara aye ogwela mmwanddeyani, oliye wawaddela egihina: “Kabeni naabuwele kobela emodha.” Nuwindo, aliwa wabuwela kobela emodha ya niya. 23 Mbwenye, egaali mmwanddeyani yabuwaga, Yesu ogonelavo. Vano, okumelelavo nipevo ninlubale muniya, manjhe wambela ovolowa mmwanddeyani, mwaha wa yeyo aliwa okala vangovini. 24 Bumwahaya, aliwa odhowa onvenyiha, yegihina: “Namahudhiha, Namahudhiha, nihanle neena nuukwa!” Nuwindo, oliye ovenya ni osumulula nipevo nne ninlubale, vano niya okurumuwa. 25 Nuwindo, oliye wakoha egihina: “Nroromelo nenyu nili wuuvi?” Mbwenye aliwa ofwanyiwa woova ni otikina, ni yowoga vikaleliwa yegihina: “Mulobwana yola baani? Anafiyedha owoga nnipevo ni manjhe, egamwiwelela.”
26 Vano, aliwa ofiya kobela emodha, murudda waaJerazenu, onakala kobela emodha yoGalileya. 27 Yesu nuwaabuwa, nufiya thaya yowumma, mulobwana dhaala akala sidadi yeele, oonihiwa goyi ni ademoniyu odhowa ogumana nuliye. Wahivira mudhidhi wowinjhivene eeddaga madave, oliye kaakala vaade mbwenye akala omahame.* 28 Oliye numoona Yesu, okokora vamentoni vaye ni okuwa ni ndhu nootaama egihina: “Yesu, mwaana a Mulugu Namadhuludhulu onafuna ddi ni miyo? Kuwerena ginowuloba onaagoonihe goyi.”* 29 (Mwaha Yesu ahiruma muzimu ole wabure wihina okumemo mmwiilini mwa mulobwana ole. Muzimu ole wabure wanna omooniha goyi muwari mwa yakadhene, ohiya eyo, malabo owinjhivene, oliye oomagiwa mada ni manyalo ni makurenti ni oosugwedhiwa, mbwenye oliye owaapadha makurenti ale teto muzimu ole wabure womuthukulela mburo wihinakala athu.) 30 Yesu omukoha egihina: “Ndina naawo oli aani?” Oliye omwakula egihina: “Ginithaniwa Lejiyawu,” mwaha ademoniyu owinjhiva yahivolowa mmwiilini mwaaye. 31 Ni yomuloba wihina anaavokedhe mu abismuni.* 32 Mbwenye nahikalawo nikuru ninlubale na guluwe naali omwangoni nijhaga; nuwindo, aliwa wambela ombebedha wihina aweenye ovolowa muguluweni, oliye orumedha. 33 Ademoniyu ale okumamo mmwiilini mwa mulobwana ole ni ovolowa muguluweni, vano nikuru naatenene na guluwe, olupela muniya ni oddaddela mwemmo. 34 Vano aliba yajhiha guluwe ndhe nuwoona ele yapadduwe, othawa ni ovolowa musidadi ni mmuruddani wawaddela athu dhithu dhaapadduwe.
35 Vano athu omaruwa odhowa woona ele yapadduwe. Numwaddamela Yesu omoona mulobwana ole avenyihiwemo ademoniyu ale mmwiilini mwaaye agawanre ni agaali apamene, agakaratile vaali Yesu, vano aliwa wambela woova. 36 Ale yonile dhithu ndhe dhereyaga odhowa wawaddela aliwa makalelo aavulumusiwe mulobwana ole oonihiwa goyi ni ademoniyu. 37 Nuwindo, athu owinjhiva a murudda dhooJerazenu ni dhowaddamela, omuloba Yesu wihina avenyewo murudda yoole, mwaha yera othabwa woova. Vano, Yesu ogwela mmwanddeyani, omaruwa odhowaga. 38 Mbwenye mulobwana ole oonihiwa goyi ni ademoniyu omuloba wihina amuharege, Yesu omuloba wihina ahogolowele mundduli, egihina: 39 “Odhowege vaade vawo ni onahiye owoga wodhela ele Mulugu uwereliye.” Nuwindo, oliye odhowaga, avuwihaga sidadi yaatene ele Yesu amwereliye.
40 Vano Yesu nuuhogolowela oGalileya, muthithi ole waathu omwaakela pamadhene, mwaha aatene yanna omujheha. 41 Ofiya mulobwana dhaala ithaniwa Jayiro; aali namaholela a musinagoga. Oliye okokora vamentoni va Yesu ni wambela omuloba wihina adhowe vaade vaye, 42 mwaha mwanaye mmodha baahi a mwanamuhiyana aanna yaka 12, aahanle neena nuukwa.
Yesu adhowaga, muthithi waathu wompinyaminya. 43 Ahikalavo muhiyana dhaala aamanle yaka 12 eraga ogonamo ni kaawo muthu andile onvulumusa. 44 Oliye omwaddamela mundduli mwaaye ni ohidda nipiyo na yowara ya Yesu, vano nikame nne omaalawo kuhukumaga. 45 Yesu okoha egihina: “Baani agipanre?” Woona wihina aatene yera oruna Peduru owoga egihina: “Namahudhiha, muthithi ola ohurijhani ni onowupinyaminyani.” 46 Mbwenye Yesu owoga egihina: “Ohukala agipanre, mwaha dhikumamo kopolo mmwiilini mwaaga.” 47 Muhiyana ole nuwoona wihina athu aatene yahimoona oliye okokora vamentoni va Yesu agurumelaga ni owoga vamentoni vaathu aatene mwahaya bwaddi adhe amuhiddege ni makalelo aavulumuwiye mowaguva. 48 Mbwenye Yesu omwaddela muhiyana ole egihina: “Mwanaga, nroromelo naawo nihuvulumusa. Kadhowa ni murenddele.”
49 Ahinamale owoga, ofiya mulobwana dhaala akuma vaade va Jayiro, owoga egihina: “Mwanawo ohukwa. Kumunyonye namahudhiha.” 50 Mbwenye Yesu nuwawiwa madhu yawogiwa, oliye omwaddela namaholela amusinagoga ole egihina: “Kuwoove, mbwenye okanne nroromelo, mwanawo aneere ovenya.” 51 Nufiya vaade vaye, kamuhiyile muthu ovolowa, ahili Peduru, Juwawu, Tiyago, vamodha ni ababe ni amaye a namwali ole. 52 Mbwenye athu aatene yowunla epigireyaga mwaha wa namwali ole akwile. Vano Yesu owoga egihina: “Kamunle, oliye kakwile; onogona.” 53 Mwaha wa yeyo, aliwa wambela oteya mwamakalelo oonyemula, mwaha yahinona wi ohukwa. 54 Vano oliye omparela nlada ni omwithana egihina: “Namwali, kavenya!” 55 Oliye ohogolowela okalawo ni ovenya mowaguva, vano Yesu waruma wihina envahe ethu yoojha. 56 Ababe otikina vanlubale, mbwenye Yesu wawaddela wihina ehimwaddele muthu ethu yapadduwe.