Dhowera Dhaarumiwi
23 Pawulo nuwavenyiha mento, wasugwa pamadhene athu aatene yaali muSinediriyu, ni owoga egihina: “Alobwana, addibila, Mulugu ohunona mubuwelo waaga wihina kagenrena ethu yabure ofiyedha peeno.” 2 Mwaha wa yeyo namakutha munlubale Ananiya oruma wihina ale yamwaddamele envade owanoni. 3 Pawulo omwaddela egihina: “Niweya Mulugu aneere wuvada, siri yowomela odeve.* We okaratile vala wihina ogitorihe mowiwanana ni Nlamulo mudhidhi mmodhave walupaga malamuloya ni orumaga wihina givadiwe?” 4 Athu yaali vavale omukoha yegihina: “Mulobwana, onoomuruwana namakutha munlubale a Mulugu?” 5 Pawulo wakula egihina: “Addibila, miyo kaganonne wihina oliye namakutha munlubale. Mwaha dholebela dhinawoga dheegi: ‘Kumuwoge obure namathonga a nlogo nawo.’”
6 Pawulo nunona wihina nikuru nimodha naali naSadusewu teto nimodha naali naFarizewu, owoga ni athu aatene yaali muSinediriyu mune ni ndhu nootama egihina: “Alobwana, addibila, miyo gili nFarizewu ni gibaliwe ni aFarizewu. Miyo ginatoriheliwa mwaha ovenyihiwa wanookwa.” 7 Nuwawoga madhu yaala, aFarizewu ni aSadusewu obajha okangana, athu aatene yatugumane mburo yoole, ogawanyeya. 8 Mwaha aSadusewu kinarumedha wihina ehikalawo ejhehedhelo yovenyihiwa anookwa, ehikalawo angero newene muzimu, mbwenye aFarizewu enorumedha* dhithu dhaatedhene dhendha. 9 Nuwindo, aliwa obajha okuwa vanlubale vano anamaleba amodha yaali a nikuru naFarizewu, ovenya ni wambela ovanyihana ootakaleliwene yegihina: “Iyo kannamonana muladdu mulobwana oyo, akala muzimu obe mungero ohuwoga nuliye . . .” 10 Vano okangana wule weraga othabwa, namasogolela aanyakoddo oovaga wihina Pawulo anadha agwaddanyiwe,* oruma wihina atoropa edhowe yamuthukule mburo yoole emudhowena okwarteli.
11 Mbwenye emahiyu yeele, Nabwiya onfiyedha ni omwaddela egihina: “Olibe murima! Mowindala ninga ovahiliwe onamoona waaga oJeruzale, onere ovaha onamoona mmodhave oRoma.”
12 Vati nuusa, maJudewu opangana wihina empe ni olibela othukula nibili wodhela ohujha newene ohung’wa ethu ofiyedha ompa Pawulo. 13 Alobwana yalibenle wihina empe, yahakwana 40. 14 Alobwana ala odhowa wanddimuwa aanamakutha ni waanamaholela, owoga yegihina: “Iyo nihimala olibela ni murima wehu watene othukula nibili, wihina kannajhe ethu nahimpile Pawulo. 15 Mowindala, nyu vamodha ni Sinediriyu yaatene mmwaddele namasogolela aanyakoddo amukitelena vati vala wihina adhe vamentoni veenyu, ekalege ninga munafuna nvuruwane pama muladdu waye. Mbwenye, oliye ahinuwaddameleni, iyo nnakala owiwegeredhene wihina nimpe.”
16 Vano, mwaana murogoliye Pawulo onona ethu yampanganeliwa; oliye ovolowa mukwarteli mune ni omwaddela Pawulo dhithu dhaatedhene. 17 Nuwindo, Pawulo omwithana munddimuwa mmodha aanyakoddo ni omwaddela egihina: “Omuthukulele muzombwe ola wa namasogolela aanyakoddo, ohukanna muselu anafuniye omwaddela.” 18 Oliye omuthukulela wa namasogolela aanyakoddo ni owoga egihina: “Munyakambura Pawulo ohugiloba wihina ginvelele muzombwe ola wa nyu nabwiya, mwaha oliye ohukanna muselu anafuniye wuwaddelani.” 19 Namasogolela aanyakoddo omparela nlada, omuthukulela okwibi ni omukoha egihina: “Onafuna ogaaddele ddi?” 20 Oliye omwakula egihina: “Majudewu ehipangana wihina yulobeni nyu nabwiya wi mangwaana, mmukitihedhe Pawulo oSinediriyu ekalege ninga munafuna nvuruwane pama muladdu waye. 21 Mbwenye kamwahiye wulekethani, mwaha ehikalawo alobwana owakwana 40 enafuna omwipitelela Pawulo, ohiya eyo aliwa ehilibela othukula nibili wodhela ohujha newene ohung’wa ethu ofiyedha ompa Pawulo. Vano aliwa ehimala wiwegeredha ejheehaga yowakula yenyu.” 22 Mowindala, namasogolela ole aanyakoddo, omwihiya muzombwe ole odhowaga, mbwenye ahinadhowe omukongomedha egihina: “Onaamwaddele muthu mmodhaya dhithu ogaaddeliwe.”
23 Nuwindo oliye wawithana anddimuwa abiili aanyakoddo ni wawaddela egihina: “Mwawegeredhe anyakoddo 200, aliba waweddiha akavalo 70 ni aliba ovoka mwaalago 200 wihina mudhidhi wanatharu wa mahiyu* edhowe oSezareya. 24 Ohiya eyo, mwawegeredhe akavalo wihina Pawulo aagwele, olenddo waye weedde pama ofiyedha ogumana ni musadoro Felikisi.” 25 Oliye oleba karta nawoga negihina:
26 “Oothithimihiwa dinyu Musadoro Felikisi, dimiyo Kalawudiyu Liziya. Mwawakele malojhelo! 27 Mulobwana oyo yamwihiddile bimaJudewu, ehalaga vang’ono wihina empe, miyo ofiya mowaguva ni anyakoddo aaga omwakihedha, mwaha giiwaale wihina oliyeya muRomanu. 28 Vano, gifunaga woonelamo muladduya yamwinkedhiwa, miyo omuthukulela muSinediriyu mwewa. 29 Nupendda, goonile wihina oliye inkedhiwa wodhela Malamulo ewa, mbwenye kifwannye newene ethu modha yabure yamuthukulele opiwa obe ofugeliwa mukambura. 30 Nuwindo, woona wi gihaddeliwa wihina ohupanganeliwa opiwa, miyo gihimuruma mowaguva wihina adhe mmadani mweenyu, teto gaarumaga wihina athu ala enamwinkedha edhe yaakulele vamentoni veenyu muladdu enniwana nuliye.”
31 Vano anyakoddo nuwawiwa madhu yaddeliwiwa, emahiyu yeele aliwa omuthukula Pawulo omudhowana wAntipatridi. 32 Labo noharela, wahiyedha aliba waweddiha akavalo ale emudhowagana, mbwenye aliwa ohogolowela okwarteli. 33 Aliba waweddiha akavalo ale nuufiya oSezareya, aliwa opeleka karta nne mmadani mwa musadoro ni Pawuloya. 34 Vano musadoro nuwileri karta nne, wakoha elabo adheeliye, oliye waddeliwa wihina deelabo yoSilisiya. 35 Nuwindo oliye omwaddela Pawulo egihina: “Miyo ginere ovuruwana muladdu onniwena, yafiya athu ayo enuwinkedha.” Numala oliye oruma wihina akale oomagiwene mba mwa Erodi wula asugweriwaga.