Dhowera Dhaarumiwi

8 Sawulo ahenya opiwa wa Estevawu.

Obajha labo nenne mulogo woJeruzale ni anamahara aatene, obajha oharahariwa vanlubale, aliwa othawela oJuda ni oSamariya, mbwenye arumiwi kiyathawile. 2 Alobwana yamuthithimiha Mulugu, othukula muruthu wa Estevawu wihina yavuhele wula emunlelaga vanlubale. 3 Mbwenye, Sawulo wambela woniha goyi mulogo. Oliye obajha oharahara nyumba ni nyumba, aatxetxereselaga ode alobwana ni ahiyana, amodha aavokedhaga mukambura.

4 Vano ale yaabalalesiwe, ovenyawo murudda yoole yalaleyaga madhu a muthenga dhapama. 5 Nuwindo, Filipi odhowa murudda woSamariya obajha walaleya wodhela Kiristu. 6 Muthithi yoole waathu wavuruwana ni murima watene madhu aawoga Filipi; ohiya onvuruwanave baahi, yowoona dhintelelo eriyena. 7 Mwaha athu owinjhiva yanna muzimu dhabure, dhookuwa ni dhokumamo. Ohiya eyo, athu owinjhiva ooragala ni ookwethenkwa yahivulumusiwa. 8 Vano, athu a sidadi yeele ohagalala vanlubale.

9 Sidadi yeele, ahikalawo mulobwana dhaala ithaniwa Simawu, vobajhavene aali muliba masenga;* oliye ahifiyedha watikiniha vanlubale akudda Samariya, awogaga wihina di munlubaleya. 10 Aatene, obajhana ahima ofiyedha ni anlubaleya, yonvuruwana pamadhene ni yowoga yegihina: “Mulobwana ola Kopolo dha Mulugu, onithaniwa Kopolo Dhinlubale.” 11 Yonvuruwana pamadhene mwaha ahimala mudhidhi wowinjhivene emutikinaga ni masenga aweresiyena. 12 Mbwenye Filipi nuwawaddela muthenga dhapama wodhela Omwene wa Mulugu ni ndina na Yesu Kiristu, yahirumedha, vano alobwana ni ahiyanaya ofiyedha obaddiziwa. 13 Ohiya eyo, ni Simawuya numala obaddiziwa, okala mukiristawu ni odidelave weedda ni Filipi. Oliye ootikina oonaga dhintelelo ni mabasa manlubale akopolo yereya.

14 Vano arumiwi oJeruzale, nuwiwa wihina athu ooSamariya yaharumedha madhu a Mulugu, aliwa omuruma Peduru ni Juwawu wihina edhowewo, 15 vano aliwa nufiyawo, walobelela aSamaritanu wihina yakele muzimu wotxena. 16 Mwaha muzimu wotxena waali wahinaakitele, mbwenye aliwa yabaddiziwe ni ndina na Nabwiya Yesu baahi. 17 Nuwindo, Peduru ni Juwawu, watapulela nlada vano aliwa obajha wakela muzimu wotxena.

18 Vano, Simawu nuwoona wihina athu yakela muzimu wotxena mwaha otapuleliwa nlada ni arumiwi, oliye okumiha korowa wavaha, 19 egihina: “Kagivaheni ni miyoya kopolo ndho wihina yoole ginaamutapulelimi nlada, aakele muzimu wotxena.” 20 Mbwenye Peduru omwaddela egihina: “Parata yawo enongiwe vamodha ni weya, onubuwela wihina ni korowawo were wanda okanna ele Mulugu anivahiliye? 21 We kunnavo yawo newene kunnavo epaddi ni mabasa yaala, mwaha Mulugu uhoona wihina kunna murima wowogowa vamentoni vaye. 22 Mowindala, othwaruwe dhithu dhabure oneriwena ni ompigireyele Yehova,* dhenyeya aneere wulevelela ekalelo yawo yabure onniwena mmurimani mwawo, 23 mwaha ginowuwoona wihina oli ndibwi* nowawa ni mudhaari oohogowa.”* 24 Simawu wawakula egihina: “Gilobeleleni wa Yehova* wihina dhithu dhendho muwogilinyu dhahigipadduwele.”

25 Nuumala ovaha onamoona wowakwana wodhela madhu a Yehova,* aliwa ohogolowela oJeruzale wula elaleyaga muthenga dhapama murudda dhowinjhiva dha aSamaritanu.

26 Nuwindo, mungero a Yehova* omwaddela Filipi egihina: “Wiwegeredhe odhowe omayelo nduwa, dila enakuma oJeruzale edhowaga oGaza.” (Ela dila yowiddeddereni.) 27 Vano oliye wiwegeredha odhowaga, onfwanya mulobwana dhaala oohuya mba, muEtiyopi, aali mudhaari athima a Kandasi,* musano aakudda Etiyope, namasogolela a dhoreela dhaye dhaatedhene. Oliye aadhowile oJeruzale wihina amwebedhe Mulugu, 28 mbwenye ahogolowaga, agakaratile mukaroni mwaaye, owileri ni ndhu nootama yovuhulela ya Izayiya. 29 Nuwindo, muzimu owoga ni Filipi wegihina: “Kaaddamela karo ele.” 30 Filipi othamaga ni waddamela karo ele, vano omwiwa mulobwana ole oohuya mba iilerigi ni ndhu nootama yovuhulela ya Izayiya. Oliye omukoha egihina: “Nabwiya, munowonelamo munilerinyu?” 31 Oliye wakula egihina: “Mwebaribarene, ginoonelemo aavi ahiliwo muthu oogonelihamo?” Vano omuloba wihina Filipi agwele ni akarati nuliye. 32 Epaddi ya yolebela iileriye ni ndhu nootama, yawoga yegihina: “Ninga nimbila, ohuthukuliwa wihina apiwe, teto ninga mwaana ngo’mbe anakala oomalene aasathiwaga,* oliye kanafugula mulomo. 33 Mudhidhi anyemuliwaga, yahikoodda omweddiha nuwogowa. Baani anawoge dhithu dhereye nnihimo naye? Mwaha egumi yaye ehipiwa elabo yavati.”

34 Mulobwana ole oohuya mba, omukoha Filipi egihina: “Kawerena, kagonelihemo pama: Namavuhulela ola anamwagana aani? Aniwagana yeka obe anamuwoga muthu mmodhene?” 35 Obajhana epaddi yeele ya yolebela, Filipi wambela owoga amulaleyaga muthenga dhapama wodhela Yesu. 36 Egaali mulenddoni yeeddaga, aliwa ofiya mburo dhaala vaali manjhe, nuwindo mulobwana ole owoga egihina: “Kasugwa! Vala ehikalavo manjhe! Enagihala ddi wihina gibaddiziwe?” 37*⁠ ——  38 Vano, oliye oruma wihina karo ele yimele, Filipi vamodha ni mulobwana ole oohuya mba okitela mmanjheni; oliye ombaddiza. 39 Nuutavuwa mwiiko mune, vohilegela muzimu wa Yehova* onvenyihavo Filipi mburo yoole, vano mulobwana ole oohuya mba kahogolowele omoona dila biili, mbwenye oliye omaruwa odhowaga oohagalalene. 40 Nuumala, Filipi omaruwa odhowa murudda wo Asdode, mbwenye aavira murudda yoole wula alaleyaga muthenga dhapama sidadi dhaatedhene ofiyedha oddemulela oSezareya.