Dhilebiwe ni Juwawu
9 Yesu aviraga, omoona mulobwana dhaala aabaliwe ahoonaga. 2 Nuwindo, anamaharaye omukoha yegihina: “Rabi, mulobwana ola adhe abaliwege ndala ahoonaga, atheegile baani? Duliye obe bimakolo aye?” 3 Yesu wawakula egihina: “Mulobwana ola katheegile newene makolo aye, yereye ndo wihina yoneye mabasa a Mulugu wodhela oliye. 4 Naaparege mabasa a Ole agirumile vati vahinaribe, mwaha vati variba kawo muthu anandege olaba. 5 Vevala gilimi mwilaboni, gili waara wa elabo.” 6 Numala wawoga madhu ala, oliye waturela* maara vati, wawuba maddogu vano wadholiha mmwintoni mwa mulobwana ole; 7 ni omwaddela egihina: “Kadhowa wasusule nthiya noSilowe” (enatapulela “orumiwa”). Nuwindo, odhowa osusula vano wambela woona.
8 Vano, amwanddamani ni athu amodha yamonesa alobelaga dhithu yokoha yegihina: “Ola kahiyo mulobwana ole akalesa ookaratene alobaga dhithu?” 9 Athu amodha yowoga yegihina: “Duliyene.” Amodha yawoga yegi: “Kahiyo, enoligana.” Mbwenye, mwinnyaya owawakula egihina: “Dimiyene.” 10 Mwaha wa yeyo, yomukoha yegihina: “Mento awo efuguwe aavi?” 11 Oliye wawakula egihina: “Mulobwana dhaala anithaniwa Yesu, eere wawuba maddogu ni wadholiha mmentoni mwaaga ni ogaddela egihina: ‘Kadhowa oSilowe wasusule.’ Nuwindo, miyo odhowa osusula vano wambela woona.” 12 Vano, aliwa omukoha yegihina: “Mulobwana yoyo ali waani?” Oliye wawakula egi: “Kaginonne wigeleliye.”
13 Nuwindo, aliwa omuthukula mulobwana ole aabaliwe ahoonaga omudhowana wafarizewu. 14 Teto, labo Yesu aawubiliye maddogu ale ni aafuguliye mento a mulobwana ole vaaligi Sabadu. 15 Vano, aFarizewu amodha wambela omukoha mulobwana ole wodhela makalelo aambenliye woona. Oliye wawakula egihina: “Oliye eere wadholiha maddogu mmwintoni mwaaga, vano miyo osusula, bumwahaya ginowoona.” 16 Nuwindo, aFarizewu amodha owoga yegihina: “Mulobwana oyo kahiyo a Mulugu, mwaha kanamukoya Sabadu.” Amodha yowoga yegi: “Enandeya addi mulobwana oothega wawerana matikiniho ninga yaala?” Mwaha wa yeyo aliwa ogawanyeya vikaleliwa. 17 Ni omukoha dila biili mulobwana ole ohoona yegihina: “Ki we onavaha onamoona baani wodhela oliye, woona wi mento awo bifuguliwe?” Oliye wawakula egihina: “Oliye namavuhulela.”
18 Mbwenye, maJudewu kiyarumedhe wihina aabaliwe ahoonaga ni ahifuguliwa mento aye, ofiyedha aliwa wawithana makolo a mulobwana ole ohoona. 19 Aliwa wakoha makolo aye yegihina: “Ola di mwaninyu munerinyu abaliwe ahoonaga? Kito aambele aavi woona?” 20 Makolo aye wawakula yegihina: “Ola di mwanihu teto nihinona wihina nimbanle ndala ahoonaga. 21 Mbwenye, kannonne makalelo oliye aambenliye woona, newene kanimunonne muthu aafugule mento aye. Mmukohe mwinnya. Oliye pogo podi owoga yekaye.” 22 Makolo aye yaakunle nimakalelo yaala mwaha yawoova maJudewu, woona wi aliwa yahimala opangana wi muthu di muthu aamurumedhe Yesu wihina di Kiristu igariwe musinagoga. 23 Bumwahaya makolo aye edhe ewogege yegihina: “Oliye pogo. Mmukohe mwinnya.”
24 Nuwindo, aliwa omwithana dila biili mulobwana ole aabaliwe ahoonaga, omwaddela yegihina: “Omuthithimihe Mulugu! Iyo nihinona wi mulobwana oyo namathega.” 25 Oliye wawaddela egihina: “Akala oliye namathega miyo kaginonne, ginonnimi sowihina miyo kagoona mbwenye vano ginowoona.” 26 Nuwindo, aliwa omukoha oliye yegihina: “Oliye erilena ethu baani? Ki aafugule aavi mento awo?” 27 Oliye wawakula egihina: “Miyo gihuwaddelani mbwenye nyu kamwiwale. Mwahaya bwaddi mugagikoha dila biili? Ni nyuwa munafuna mukale anamahara aye?” 28 Aliwa omwaddela mwamakalelo oomunyemula yegihina: “We oli namahara a mulobwana ole mbwenye iyo nili anamahara a Moyizeji. 29 Iyo nihinona wihina Mulugu awogile ni Moyizeji, mbwenye kannonne winadhela mulobwana oyo.” 30 Mulobwana ole ohoona wawakula egihina: “Mwebaribarene ela sotikiniha! Nyu kamunonne winadheliye, mbwenye naarive dhigaali ndo, oliye ohafugula mento aaga. 31 Nihinona wi Mulugu kanaavuruwana athu oothega, mbwenye, akala muthu anomoova Mulugu ni anowerana efunelo yaye, oliye anonvuruwana muthu yoyo. 32 Obajha kale, kaginiwege wihina ohukalawo muthu aafugule mento a muthu abaliwe ndo ahoonaga. 33 Mulobwana oyo ahere ahikala a Mulugu, kaande werana ethu-siithu.” 34 Aliwa omwakula yegihina: “We obaliwe oothegene teto onafuna onihudhihe iyo?” Nuwindo, aliwa omwigara.
35 Yesu wiwa wihina maJudewu yahimwigara mulobwana ole ohoona, vano nuugumana, omukoha egihina: “We ohukanna nroromelo ni Mwaana Muthu?” 36 Oliye wakula egihina: “Nabwiya, oliyeya baani ofwanelelaga miyo omuroromela?” 37 Yesu omwakula egihina: “We ohumona teto mwebaribarene di yola anawoga ni we.” 38 Mulobwana ole omwaddela egihina: “Nabwiya, miyo ginomuroromela! Nuwindo, oliye omukokorela.* 39 Vano, Yesu owoga egihina: “Miyo gidhile wihina elabo etorihiwe, teto ale ehinoona yambele woona ale enoona yahonege.” 40 Afarizewu amodha yaali vevale nuliye yavuruwanaga madhu ala, omukoha yegihina: “Nerege ni iyoya kannoona?” 41 Yesu wawaddela egihina: “Nyu mwahere mukala aliba ohoona, kamwakanne nibili na yotheega. Mbwenye, nyu mwaannya dinawoga mwegihina: ‘Iyo nnowoona,’ bumwahaya yotheega yenyu kinadha eleveleliwa.”