Dhilebiwe ni Matewuji
16 Afarizewu ni Asadusewu omwaddamela Yesu wihina emwehe. Aliwa omuloba wihina awonihe yintelelo yodhulu. 2 Vano Yesu wawakula egihina: “Vaaribaga munowoga mwegihina, ‘odhulu kawo murabo podi wera mangwaana nduwa nnere wooba,’ 3 mbwenye vakala membesi nyu munowoga mwegi, ‘peeno winere oridha ni winere okala muzongwe, mwaha odhulu wihikala murabo.’ Nyu munosugwa pamadhene makalelo wili odhulu, mbwenye kamunanda woona yintelelo ya mudhidhi. 4 Nlogo nabure ni nohuroromeleya, munaveda wonihiwa yintelelo, kamunonihiwe yintelelo ehili yintelelo ya Jonasi.” Nuwindo osusavo, wahiya mundduli.
5 Vano anamaharaye wabuwela kobela emodha, mbwenye oddiwala othukula pawu. 6 Yesu wawaddela egihina: “Mukale mento ni mukale pasope ni emela* ya Afarizewu ni ya Asadusewu.” 7 Nuwindo aliwa wambela onong’ona vaakaleliwa yegihina: “Nihidduwala othukula pawu.” 8 Yesu nuwiwa yawogiwa, owoga egihina: “Alobwana nyu oyeva nroromelo, mwahaya bwaddi muganong’ona vikalelinyu mwegi kanthukunle pawu? 9 Kamunonelemo enatapuleliwa, kamunubuwela pawu ndhe tanu yajhile athu owakwana 5000, ni muddanga mingasi mwadhalihinyu? 10 Obe pawu ndhe tanu nabiili yajhile athu 4000, ni muddanga* mingasi dhinlubale mwadhalihinyu? 11 Mwahaya bwaddi muhonelagamo wihina kaginawoga muselu wa pawu? Miyo gere mukale pasope ni emela yaafarizewu ni yaasadusewu.” 12 Nuwindo aliwa wonelamo wihina oliye kawoga wodhela emela* ya pawu mbwenye afuna wi ekale pasope ni dhohudhiha dhaafarizewu ni dhaasadusewu.
13 Nufiya murudda woSezareya wa Filipi, Yesu wakoha anamaharaye egihina: “Athu amodha enubuwela wi Mwaana Muthu baani?” 14 Aliwa omwakula yegihina: “Athu amodha eni muli Juwawu Namabaddiza, amodha Eliyaji teto amodhaya eni muli Jeremiya obe namavuhulela.” 15 Oliye wakoha egihina: “Ki nyu munihina miyo gili aani?” 16 Simawu Peduru wakula egihina: “Nyu muli Kiristu Mwaana a Mulugu ookalawo.” 17 Vano Yesu omwakula egihina: “Oohagalala diwe Simawu mwaana Jonasi mwaha kuwonelihiwemo naathu,* mbwenye wonelihiwemo ni Ababa eli odhulu. 18 Ohiya eyo, ginowuwaddela wihina: We oli Peduru okwa* kunadha ogonjhiha mulogo waaga, mwaha ginere omaga vanibweni. 19 Miyo ginere wuvaha xavi dha Omwene wodhulu, dhaatedhene onamagiwe elabo yavati dhinere omagiwa odhulu, teto dhaatedhene onatapuliwe elabo yavati dhinere otapuliwa odhulu.” 20 Nuwindo wakongomedha anamaharaye wi ehimwaddele muthu wihina oliye di Kiristu.
21 Obajha mudhidhi yoole odhowa osogolo, Yesu wambela wawaddela anamaharaye wihina oohowela odhowa oJeruzale oonihiwe goyi enlubale ni anamaholela, anddimuwa aanamakutha ni anamaleba, eera ndo apiwe vano labo nanatharu avenyihiwe muukwani. 22 Mwaha wa yeyo Peduru omuthukulela okwibi, wambela omusumulula egihina: “Nabwiyani, kiweddeleni thagaraga! Ethu ninga yeyo kidha yupadduwelani.” 23 Mbwenye Yesu omureya dduli Peduru ni owoga nuliye egihina: “Kasusedha ngo Saddanawe! Mwaha oli nibwe nookwakwathusa, mubuwelo onniwena kahiyo wa Mulugu, mbwenye bwaathu.”
24 Nuwindo Yesu wawaddela anamaharaye egihina: “Ole anafuna okala namahara aaga iikodde ni athukule ntxikwa* naye na goyi ni agiharege. 25 Mwaha ole anafuna ovulusa egumaye* aneere oyelela, mbwenye ole anayelele egumaye* mwaha wa miyo, aneere ofwanya. 26 Mwebaribarene muthu anapuravo ddi ayelela egumaye* mwaha wojhavo elabo? Obe muthu anaalive ddi wihina avuluse egumaye?* 27 Mwaana Muthu aneere odha munthithimihoni na Ababe vamodha ni angero aye ni aneere omutoriha kadda muthu mowiwanana ni dhowera dhaye. 28 Ginowuwaddelani ebaribari, ehikalawo amodha eli vevala ehinaalawihe okwa ehinathi omoona Mwaana Muthu adhaaga Mumweneni mwaaye.”