Ovuhulela wa Juwawu
11 Nuwindo, miyo ovahedhiwa mutati wakala ninga mwiri* vano oliye ogaaddela egihina: “Kavenya opime mburo wotaleleya mutempulu ya Mulugu, altare ni aleya enamwebedha mwemmo. 2 Mbwenye nthaddo noode na mburo wotaleleya wa tempulu, ohiye ndo, kupime mwaha athu amalogo bivahiwe teto aliwa enere onyingalela luwani yoweela muwari mwa mweeri 42. 3 Ginere waweriha wi anamoona aaga abiili evuhulele muwari mwa malabo owakwana 1260, egawanre masakwi.” 4 Aliwa enaladdanihiwa ni muthanko minli dha olivera ni panti biili ni eli owimelene vamentoni va Nabwiya a elabo yaatene yavati.
5 Muthu yoole anaaxixe wawerela obure, oneere okuma mootho muwano mwewa wihina wapahe amwiiddani ewa. Muthu yoole anaaxixe wawerela obure anaakwe nimakalelo yaala. 6 Aliwa ehikanna owedha wofuga odhulu, ofiyedha muzongwe ohurubwa muwari mwa mudhidhi enavuhuleliwa, ohiya eyo, ehikanna owedha wowasaddula manjhe ofiyedha okala nikame ni enowanda oporosa elabo yavati ni mulili dhoohiyana-iyana dila ngasi munafuneliwa.
7 Aliwa yamala ovaha onamoona wewa, mwanenyama owoopiha anakuma muliddi wooddiha aneere owana naaliwa afiyedha wagonjhiha ni waapa. 8 Muruthu dhewa dhinaakale mudila yinlubale ya luwani enlubale yeyo mwamakalelo ooladdaniha enithaniwa Sodoma ni Ejipitu, mburo mmodhave wipiwe Nabwiya ewa. 9 Malogo, mahimo, dhiwogelo ni athu a elabo yaatene enerege osugwa muruthu dhewa muwari mwa malabo mararu ni meya. Teto kinenye wihina muruthu dhewa dhivuheliwe mmahame. 10 Athu enakala elabo yavati eneere ohagalala mwaha okwa wewa, eneere waajha mathanga, eneere ovahana mukono mmodha ni mukwaye mwaha anamavuhulela ale abiili yowawoniha goyi athu eelabo yavati.
11 Malabo mararu ale nuuvira, Mulugu wavaha muya wegumi vano aliwa ohogolowela okalawo, aliwa ovenya wiimela, athu yawonile wambela woova vanlubale. 12 Nuwindo, aliwa wiwa ndhu nootama nakuma odhulu negihina: “Kagwelani wuno.” Vano aliwa ogwela odhulu mmuraboni amwiddani ewa yawonaga. 13 Mudhidhi yoole okalawo oddiginyeya weelabo winlubale vano epaddi yanekumi ya luwani obwanyuwa, athu owakwana 7000 okwa mbwenye athu yahanle wambela woova ni aliwa omuthithimiha Mulugu oodhulu.
14 Yokubanyiha yaNabiili ehivira. Pasope! Mwaha yookubanyiha yanatharu eneere ofiya mohulegela.
15 Mungero anetanu nabiili wooba palazaye. Vano wiweya madhu yadhela odhulu ekuwaga ni ndhu nootama yegihina: “Omwene wa Mulugu ehu ni wa Kiristu onna wathonga athu, teto Oliye dinathongege ni mukalakala.”
16 Anamaholela ale 24 yakaratile kadda muthu vampaddoni vaye voomwene vamentoni va Mulugu, aliwa okokora oworomela vati vano omweebedha Mulugu 17 yegihina: “Nnowutamalelani Yehova* Mulugu a Kopolo Dhaatedhene, ole ali ni ole aali mwaha muhuthukula kopolo dhenyu dhinlubale ni muhubajha othonga ninga Mwene. 18 Nuwindo, malogo otakaleliwa teto nyu onyanyuwa, mwaha ohufiya mudhidhi wajhehiwesa wihina anookwa etorihiwe, vano adhaarinyu, anamavuhulelinyu, apogo, ahima, ale eli oweela naaleya enathithimiha ndina nenyu yawakele mareeliho teto wihina mwatolose aatene yaale enanonga elabo yavati.”
19 Vano mburo wotaleleya wa mutempulu ya Mulugu yaali odhulu ofuguliwa, nuwindo nikasa na nipangano naye naali mburo wotaleleya wa mutempulu woneyaga. Teto wahikala ojerima, wowiweya madhu, wahikala dari, oddiginyeya weelabo ni maralala manlubale.