Dhilebiwe ni Matewuji
2 Yesu nuubaliwa oBele murudda woJudeya, mudhidhi athonga mwene Erodi,* aliba ohudhera thendderi* yadhela Omadhelo Nduwa ofiya oJeruzale, 2 aliwa okohedha yegihina: “Mwaana abaliwe wihina akale mwene amaJudewu ali waani? Mwaha nihoona thendderi yaye nigaali Omadhelo Nduwa, nidhele wihina nimukokorele.” 3 Mwene Erodi nuwiwa muthenga ola, oliye vamodha naathu aatene oJeruzale obajha woova. 4 Vano Erodi wawithana anddimuwa aatene aanamakutha, anamaleba a nlogo ni wakoha mburo aabaliwewo Kiristu.* 5 Aliwa omwakula yegihina: “oBele murudda woJudeya, mwaha siyeyo alembe namavuhulela egihina: 6 ‘We Bele, elabo yooJuda, anamathonga ooJuda enuwoona ninga sidadi ehinna mabasa, mbwenye we ohukanna thima, mwaha onere ombala mwene* anaakukulege nlogo naaga, naamwaana Ezarayeli.’”
7 Nuwindo, Erodi wawithana moviteya aliba ohudhera* thendderi ni wakoha mudhidhi yoniliwa thendderi ele. 8 Vano, waruma oBele egihina: “Kadhowani, mwamusayele pamadhene mwaana oyo, mwanfwanya, mudhe mugaddele wihina nimiyoya gidhowe gamukokorele.” 9 Nuumala wakela dhoholela dha mwene, aliwa omaruwa ni woona wihina thendderi ele yoniliwa Omadhelo Nduwa yera wasogolela, ofiyedha wimela mburo vaali mwana ole. 10 Nuwoona thendderi ele egiimenle, aliwa ohagalala vanlubale. 11 Nuuvolowa mba, aliwa onfwanya mwaana ole ni amayeya Mariya, numoona mwaana ole, aliwa omukokorela ni omuthithimiha.* Nuumala othukula mukono yanniwana: oru, olibanu ni makura enithaniwa mira, onvaha. 12 Mbwenye woona wihina yahakela muthenga wa Mulugu muurohani wihina ehidhowe ogumana dila biili ni Erodi, aliwa othukula dila emodha, odhowaga owaniwa.
13 Aliba ohudhera* thendderi nudhowa, mungero a Yehova* owoga ni Juze muurohani egihina: “Kavenya, omuthukule mwaana ni amayeya, muthawele elabo Yowijipitu, mukale wengo ofiyedha miyo wuwaddelani muthenga mmodha, mwaha Erodi anafuna anvede mwaana ola wihina ampe.” 14 Vano, emahiyu yeele, Juze ovenya, omuthukula mwaana ni amayeya othawela Wijipitu. 15 Aliwa okalaga Wijipitu ofiyedha Erodi okwa. Mowindala, wakwanela madhu a Yehova* awonge namavuhulela aye egihina: “Gihimwithana mwanaga Wijipitu.”
16 Erodi nuwoona wihina aliba ohudhera thendderi yahimuleketha, oliye otakaleliwa, vano okumiha nlamulo wihina ahima aatene ooBele aanalobwana ni a sidadi dhowaddamela a yaka biili oyaga mundduli epiwe, mowiwanana ni mudhidhi yawogile aliba ohudhera thendderi. 17 Mowindala, wakwanela madhu anamavuhulela Jeremiya, enawoga yegihina: 18 “Ehiweya kutho oRama, Rakeli unlaga ni ikubanyedhaga awunlelaga anaaye, ni kaafuna omaalihiwa mwaha anaaye ehimala okwa.”
19 Erodi nuukwa, Juze agaali Wijipitu mungero a Yehova* owoga nuliye muurohani, 20 egihina: “Kavenya, omuthukule mwaana ni amayeya muhogolowele Wizarayeli, mwaha athu yafuna ompa mwaana ola ehimala okwa.” 21 Vano Juze ovenya, omuthukula mwaana ni amayeya, ohogolowela Wizarayeli. 22 Mbwenye nuwiwa wihina Arkelawu dathonga elabo yo Judeya vamburoni vaababe Erodi, Juze woovaga odhowawo. Vano nuwakela muthenga wa Mulugu muurohani, oliye odhowa elabo yoGalileya. 23 Ni okalaga sidadi yo Nazare,* wihina yakwanele madhu yawogile anamavuhulela enihina: “Oliye anithaniwege Munazarenu.”*