Ovuhulela wa Juwawu

10 Miyo omoona mungero mmodha a kopolo agawarile* murabo; muruya wahapeliwa ni muzirilimbo, kovayeya yakala ninga nduwa, moddodha dhakala ninga matxikwa* enahidda mootho, 2 teto oliye ahipareela mmadani rolu eng’ono yootapuwene. Moddo wa moono woojha onyingaliha muniya mbwenye moddo wa moono weemara onyingaliha vathayani, 3 oliye okuwa ni ndhu nootaama ni makalelo mamodhave ninga anakuwa poddogoma. Oliye nuukuwa, madhu a dari 7 obajha owoga.

4 Dari ndhe 7 nuwoga, miyo gahanle vang’ono wihina gilebe, mbwenye miyo wiwa ndhu nakuma odhulu negihina: “Waakoye madhu ayo ewogiwe ni dari 7, kuwalebe.” 5 Mungero ole gamonilimi aganyingalihe moddo mmodha muniya mmodhaya vathayani, ovenyihedha nlada naye na moono woojha odhulu 6 nuwindo oliye olibela mwa ndina na Mulugu anakalawo ni mukalakala, apaddusile elabo yodhulu ni dhithudha dhiliwo, elabo yavati ni dhithudha dhilimo, niya ni dhithu dhinakalamo: “Mulugu kanaalegele. 7 Mbwenye malabo mungero anetanu nabiili anadhiye ooba palaza yaye, mwebaribarene enere wakwanela yoviteya yotaleleya Mulugu awaddeliye ninga muthenga dhapama adhaari aye, anamavuhulela.”

8 Vano miyo wiwa ndhu nakuma odhulu niwogaga dila biili ni miyo negihina: “Kadhowa wathukule rolu ele etapuliwe eli mmadani mwa mungero anyingalihe moddo mmodha muniya mmodhaya vathayani.” 9 Miyo odhowa vaali mungero ole ni omuloba wihina aginkelele rolu eng’ono aahiddeliye.* Oliye owoga egihina: “Kathukula otakune, wamidha nipu nawo nnerege owawa mbwenye muwano mwawo munerege othapila ninga enwi.” 10 Miyo nuthukula rolu ele eng’ono mmadani mwa mungero ole wihina gitakune, muwano mwaaga moothapila ninga enwi, mbwenye nuumidha nipu naaga wambela owawa. 11 Miyo wawiwa madhu yawoga yegihina: “We onofwanelela ovuhulela dila biili wodhela malogo, mahimo, dhiwogelo ni mamwene owinjhiva.”