Dhowera Dhaarumiwi
14 Pawulo ni Barnabe nuufiya wIkoniyu, ovolowa musinagoga maJudewu vano aliwa obajha owoga mwamakalelo yathukulele muthithi waathu wa maJudewu ni aGerego ororomela. 2 Mbwenye maJudewu yaharumedhe watujela athu* amalogo wihina yarugunuwele addibila. 3 Mowindo, Pawulo ni Barnabe omala mudhidhi wowinjhivene ewogaga nuuliba murima ni kopolo dha Yehova.* Vano Oliye owoniha wi oorumedha muthenga wa opama wohinifwanelela wodhela wakavihera aliwa wawerana matikiniho ni dhintelelo. 4 Mbwenye, muthithi waathu wa sidadi yaatene wahigawanyeya: amodha yaali epaddi ya maJudewu, vano amodhaya epaddi ya arumiwi. 5 Nuwindo, athu a malogo, maJudewu vamodha ni anamaholela ewa, opangana wawoniha goyi ni wapwesa ni mabwe. 6 Aliwa nuwaddeliwa muselu yola, othawela oListara ni oDerbi dhaali sidadi dhoLikawoniya ni murudda dhimodha dhowaddamela. 7 Egaali wengo, aliwa odidelave olaleya muthenga dhapama.
8 Olistra, ahikalawo mulobwana dhaala aaraganle manyalo; oliye aabaliwe ndo ni aali ahineddege. Teto aali ookaratene, 9 anvuruwanaga Pawulo awogaga. Pawulo nuumusugwa pamadhene ni numoona wi ahikanna nroromelo wihina avulumuwe, 10 owoga ni ndhu nootama egihina: “Kavenya wimele.” Vano mulobwana ole olupa pamadhene ni obajha weedda. 11 Vano muthithi waathu nuwona ndhe Pawulo eriliyena, okuwa ni ewogelo yeLikawonika yegihina: “Vano amulugu ehiwara mwiili waathu onikitela!” 12 Aliwa obajha omwithana Barnabe ni ndina na Zewuji vano Pawulo, Ermeji, mwaha duliye awoga naaliwa. 13 Vano namakutha Zewuji, yoyo tempulu yaye yakala waddamela musiwo wa sidadi, othukula ng’ombe ni kara dha folori odhowana vamusiwo wa sidadi, wihina oliye vamodha ni muthithi waathu yapahe mukutho.
14 Vano Barnabe ni Pawulo nuunona muselu yoyo, otala dhoowara dhewa othamagela vaari va muthithi yoole waathu ni okuwa yegihina: 15 “Nyu alobwana, munerela ddi ndhodha? Nihiyoya nili athu ooligana ni nyu, teto ninna mwiili mmodhave wokwerebeya ninga nyu. Iyo ninna wulaleyani muthenga dhapama wihina musukume dhithu dhihinna mabasa ni mmwebedhege Mulugu ookalawo, apadduse elabo yodhulu, elabo yavati, niya ni dhaatedhene dhilimo. 16 Mudhidhi wakale oliye ahenya wihina malogo aamatene eharege dila dhewa, 17 naarive dhigaali ndo, oliye kahile wiwerela onamoona, mwaha woniha opama waye, wodhela wavaha muzongwe ni mudhidhi wohadda, aavahaga dhoojha dhowinjhiva ni adhaalihaga murima dhewa nuuhagalala.” 18 Naarive Pawulo ni Barnabe ewogaga dhithu ndha, kayali yokweya okoddiha muthithi ole waathu wakuthela mukutho.
19 Vano ofiya maJudewu owAntiyokiya ni owIkoniyu, otujela muthithi ole waathu nuwindo aliwa ompwesa Pawulo ni mabwe nuumala omburulela ode wa sidadi yubuwelaga wihina ohukwa. 20 Mbwenye anamahara* nuutugumana vaaliye, oliye ovenya ovolowa musidadi. Vano labo noharela omaruwa ni Barnabe odhowa oDerbi. 21 Nuumala olaleya muthenga dhapama sidadi yeele ni wahudhiha athu owinjhiva ofiyedha okala anamahara, aliwa ohogolowela oListra, wIkoniyu ni wAntiyokiya. 22 Egaali wewule aliwa walibiha anamahara ni wakongomedha odidela okala txithi munroromeloni yegihina: “Nnere ofwanyiwa makathamiho owinjhiva, negi nivolowe mumweneni mwa Mulugu.” 23 Ohiya eyo, wathoma anamaholela kadda mulogo, wula elobelaga ni ethugaga, nuwindo wavahedha mmadani mwa Yehova,* ole yafiyendhiwa okanna nroromelo.
24 Nuwindo, aliwa ovira oPisidiya odhowa oPanfiliya, 25 nuumala olaleya oPerji aliwa okitela wAtaaliya. 26 Nuukuma wewule, aliwa ohogolowela wAntiyokiya wathomiwiwa ni addibila wodhela nikavihero ni opama wohinifwanelela wa Mulugu wihina yande wapara mabasa yakuthuliwa.
27 Aliwa nuufiya, otugumana mulogo ni owoga dhithu dhaatedhene yeriliwana nnikavihero na Mulugu ni makalelo oliye aafuguleliye malogo musiwo wanroromelo. 28 Nuwindo, aliwa okala wewule ni anamahara, mudhidhi wowinjhivene.