Dhilebiwe ni Matewuji
8 Nuukita omwangoni, muthithi waathu omuharaga. 2 Vano ofiya muliba maranya, okokora vamentoni va Yesu* egihina: “Nabwiya, akala munoofuna givulumuseni.” 3 Nuwindo oliye omutapulela nlada naye ni omudahinya egihina: “Miyo ginofuna! Vulumuwa.” Vohilegela maranya ale orimela. 4 Nuumala Yesu omwaddela egihina: “Pole-pole onaamwaddele muthu, mbwenye odhowe wagumane nnamakutha, ovelele nvaho wawo mowiwanana ni Malamulo a Moyizeji, wihina aliwa ekanne onamoona.”
5 Nufiya murudda wo Kafarnawu, namasogolela aanyakoddo omwaddamela Yesu ampigiriyelaga 6 ni egihina: “Nabwiyani, mudhaari aaga muredda vaade, kananda weedda teto anna woona goyi vanlubale.” 7 Oliye omwakula egihina: “Ginere onvulumusa.” 8 Komadanti ole aanyakoddo omwakula egihina: “Nabwiyani, kagifwanelele wuwakelani vaade vaaga, mwawoge madhuve baahi, mudharaaga aneere ovulumuwa. 9 Mwaha ni miyoya ginothongiwa ni gihikanna anyakoddo ginaathongimi ni gamwerela mmodha: ‘Kadhowa!’ ni gamwerela mmodhaya: ‘Kadha wuno!’ oliye onodha, teto gamwerela mudharaaga: ‘Keerana ela!’ oliye anowerana.” 10 Yesu nuwawiwa madhu ala otikina ni owoga naale yamuhara egihina: “Miyo ginowuwaddelani gegihina: Kaginfwannye muthu Wizarayeli anna nroromelo ninlubale nowindala. 11 Athu owinjhiva enerege okuma omadhelo nduwa ni omayelo nduwa wihina ekarati vameza vamodha ni Abaraawu, Izaki ni Jako, Mumweneni wodhulu,* 12 vano ahima Amumweneni enere ovokedhiwa ode ngo oyiihini. Wengo funakale wunla ni watakuna meeno.” 13 Nuwindo, Yesu omwaddela komadanti aanyakoddo ole egihina: “Kadhowa. Yereye mowiwanana ni nroromelo onniwena.” Mudhidhi mmodhave mudhaari ole ovulumuwa.
14 Vano Yesu afiyagawene vaade va Peduru, omoona mbogohaye Peduru agakinantile vakamani mwaha anna nipanddawe.* 15 Nuwindo Yesu omparela nlada, oliye ovulumuwa, nuumala ovenya odhowa wapiyela yoojha. 16 Vati nuuriba, odhiwana athu owinjhiva yonihiwa goyi naademoniyu, Yesu wawigara ademoniyu ale ni ndu nimodha baahi ni wavulumusa athu aatene yaali aredda, 17 wihina yakwanele madhu anamavuhulela Izayiya enawoga yegihina: “Oliye ohathukula mareddihu aatene ni goyi noonihu.”
18 Vano Yesu nuwoona wi ahirijhiwa ni muthithi waathu, waruma anamahara aye wihina yaabuwele kobela emodha. 19 Nuwindo, namaleba mmodhaya omwaddamela ni owoga egihina: “Namahudhiha,* mburo-bu-mburo munayeginyu miyo ginerege wuharani.” 20 Vano Yesu omwakula egihina: “Akwadde ehikanna mburo vokala teto balame dhihikanna dhithunjhi dhewa munakaliwa, mbwenye Mwaana Muthu kanna mburo voogona.” 21 Vano namahara mmodhaya owoga nuliye egihina: “Nabwiyani gijheheni gaabihe waavita ababa.” 22 Yesu omwakula egihina: “We onaselele ogihara, mbwenye wahiye anookwa evitanege anookwave.”
23 Nuwindo oliye ogwela mmwanddeyani, ni anamaharaye omuharaga. 24 Vano okumelela nipevo ninlubale muniya, manjhe wambela ovolowa mmwanddeyani mbwenye Yesu eera ogona. 25 Nuwindo, anamaharaye odhowa onvenyiha yegihina: “Nabwiya, nivuluseni, nihanle neena nuukwa!” 26 Vano Yesu waakoha egihina: “Alobwananyu oyeva nroromelo, munathabwela ddi woova?”* nuwindo oliye ovenya osumulula nipevo nne, vano niya okurumuwa. 27 Mwaha wa yeyo, aliwa otikina vanlubale ni owoga yegihina: “Mulobwana yola baani? Ofiyedha nipevo nniya omwiwelelaga.”
28 Nufiya kobela emodha murudda woGadareno, alobwana abiili yonihiwa goyi naademoniyu, okuma omahame* odhowa ogumana ni Yesu. Aliwa yaali owoopiha vanlubale, teto dila yakaliwa kaavo aanda ovirawo. 29 Ni wambela okuwa yegihina: “We Mwaana Mulugu onafuna ddi ni iyo? Wadhela ononiha goyi* mudhidhiya ohunafiye?” 30 Mbwenye wolapelawene nahikalawo nikuru na guluwe nijhaga. 31 Nuwindo ademoniyu ale wambela ombebedha Yesu yegihina: “Wafunaga oniigara, onigarele wule wili nikuru na guluwe.” 32 Vano oliye wawakula egihina: “Kadhowani!” Ademoniyu ale okumamo odhowa ovolowa muguluweni, nuwindo guluwe dhaatedhene olupela muniya ni okwela mwemmo. 33 Vano aliba yajhiha guluwe ndhe othawa, ovolowa musidadi wawaddela athu amodha dhithu dhaatedhene dhereye vamodha ni ndhedha dhapadduwele alobwana ale yonihiwa goyi naademoniyu. 34 Vano athu aatene yakala musidadi omaruwa odhowa ogumana ni Yesu, nuumona aliwa omuloba wihina avenyewo murudda yoole.