Dhilebiwe ni Juwawu

14 “Kamuthuwathuwe mmurimani mweenyu. Mmuroromele Mulugu; ni mugiroromele miyo. 2 Vaade va Ababa kaviramile mburo. Wahere ohukalavo, gere wuwaddelani, woona wi ginadhowa wengo wihina guwajeleni mburo. 3 Ohiya eyo, miyo gadhowa ginere wuwegeredhelani mburo, gamala gineere ohogolowa gidhe guuthukuleni, wihina mburo ginakalimivo ni nyunwa mukale venvo. 4 Teto, nyu muhunona dila ginayelimiwo.”

5 Tome omukoha egihina: “Nabwiya, iyo kannonne munadhowinyuwo. Nnaanone aavi dilaya?”

6 Yesu omwakula egihina: “Miyo gili dila, ebaribari ni egumi. Kaawo muthu anadhowa wa Ababa ahivinre wa miyo. 7 Nyu mwahaginone ni Ababaya mugahaanona. Obajha peeno odhowa osogolo nyu muhaanona ni munna wawona.”

8 Filipi owoga egihina: “Nabwiya, mwanooniha Ababaya, yeyo ehakwana.”

9 Yesu omwakula egihina: “Gili ni nyu mudhidhi wowinjhivene, Filipi, ofiyedha peeno kuginonne? Ole onagoona miyo, onawoona Ababa. Onagikohela ddi wegi: ‘Noonihe Ababa’? 10 We kunarumedha wihina gili mwimodhani ni Ababa teto Ababa eli mwimodhani ni miyo? Ndhe ginuwaddelimini kadhinadhela mmuruni mwaga, mbwenye dhinadhela wa Ababa eli mwimodhani ni miyo ni enaaparave mabasiwa. 11 Murumedhe ginawogimi wihina gili mwimodhani ni Ababa teto Ababa eli mwimodhani ni miyo; obe, mugirumedhe mwaha wa mabasa ginaaparimi. 12 Ginowuwaddelani ebaribari: Muthu anaagiroromele aneere wapara mabasa mamodhave ginaparimi. Teto oliye aneere wapara mabasa manlubale wapitha ala ginaparimi, mwaha ginoodhowa wa Ababa. 13 Ohiya eyo, dhaatedhene munaalobinyu ni ndina naaga, miyo ginere werana, wihina Ababa ethithimihiwe mwaha wa Mwaniwa. 14 Ethu-siithu munaalobinyu ni ndina naaga, miyo ginere werana.

15 “Akala nyu munogidhivela, munere wawiwelela malamulo aaga. 16 Miyo ginere waloba Ababa yuvaheni namakavihera* mmodhaya wihina akale ni nyu malabo aamatene 17 oli muzimu weebaribari, elabo wahinandiwa wakela, mwaha kinoona newene kinonne. Mbwenye nyu muhunona, mwaha oli ni nyu teto oli vaari veenyu. 18 Kaginunyanyaleni.* Ginere ohogolowa. 19 Vohilegela, elabo kinadha egoona, mbwenye nyu munere ogoona, mwaha miyo gihikalawo ni nyuwa munere okalawo. 20 Labo nenno munere onona wihina gili mwimodhani ni Ababa teto nyu mwimodhani ni miyo vano miyo mwimodhani ni nyu. 21 Muthu yoole anaarumedha malamulo aaga ni anawiwelela diyoyo anagidhivela. Ohiya eyo, ole anagidhivela, Ababa enerege omudhivela teto miyo ginere wiwoniha pamadhene wa muthu yoyo.”

22 Judasi, ohiya Iskariyoti, omukoha Nabwiya egihina: “Epadduwe ddi Nabwiya mugafuna wiwoniha pamadhene wa iyo ohiya waathu amwilaboni?”

23 Yesu omwakula egihina: “Muthu yoole anagidhivele, aneere wawiwelela madhu aaga teto Ababa enere omooniha odhivela wewa, vano iyo abiili nnere odhowa wa muthu yoyo. 24 Muthu yoole ahinna odhivela ni miyo kanawiwelela madhu aaga. Madhu onavuruwaniwe kahiyo aaga, mbwenye enadhela wa Ababa egirumile.

25 “Miyo ginowuwaddelani dhithu ndha wula ngaali vamodha ni nyu. 26 Mbwenye, namakavihera, muzimu wotxena, onarumiwe ni Ababa ni ndina naaga, onere wuhudhihani dhithu dhaatedhene ni onere wuwubusedhani dhithu dhaatedhene guwaddenlimini. 27 Ginowuhiyedhani murenddele; ni ginowuvahani murenddele waaga. Kaginuvahani ninga onavaha elabo. Kamusimwele mmurimani mweenyu, newene kamoove. 28 Muhiwa giwogilimi: ‘Miyo ginodhowa ni ginere ohogolowa.’ Mwahakanne odhivela ni miyo mweere ohagalala mwaha wi ginadhowa wa Ababa mwaha Ababa bi anlubaleya ogikwaranya miyo. 29 Miyo guwaddeleni dhithu ndha dhihinathi opadduwa, wihina dhapadduwa, nyu murumedhe. 30 Kaginawoge dhithu dhowinjhiva ni nyu, mwaha namathonga eelabo ela anna ofiya, mbwenye oliye kanna kopolo ogikwaranya miyo. 31 Mbwenye, wihina athu a mwilaboni enone wi ginowadhivela Ababa, ginerana ndhe Ababa egirumiliwa. Kavenyani ndowege.