Karta na Tiyago
4 Koddo munawaniinyu vikalelinyu, dhinadha waani? Kadhinadha mwaha wa munigwa munawaniinyuna mmwiilini mweenyu? 2 Nyu munoofuna mbwenye kamunanda okanna. Munna waapave athu ni okalelana nrima mbwenye kamunanda okanna munafuninyu. Munna owanave koddo ni okangana. Nyu kamunna mwaha kamunamuloba Mulugu. 3 Mwaloba kamunavahiwa, mwaha munaloba ni efunelo yabure, wihina muhagalase efunelo yeenyu yomwiilini.
4 Athu nyu ohuroromeleya,* kamunonne wihina wandana ni elabo winatapulela wiiddana ni Mulugu? Bumwahaya, ole anafuna wandana ni elabo anna wiiddana ni Mulugu. 5 Obe nyu munubuwela wihina Dholebela dhinawogela ebeweene dhegihina: “Muzimu odidenle okalave ni iyo, ohudhaleliwa munigwa dha nrima”? 6 Mbwenye, opama wohinifwanelela Mulugu ananivahiye ohunnuwa. Bumwahaya Dholebela dhigawogaga dheegi: “Mulugu anowawidda athu owithukula, mbwenye onowavaha opama wohinifwanelela athu owiyeviha.”
7 Mowindala, mmwiwelelege Mulugu onawogiye; mbwenye, mmukake Saddana, oliye onere wuthawani. 8 Mmwaddamele Mulugu, oliye aneere wuwaddamelani. Mwaasuwe mada eenyu, nyu anamathega ni mutxenihe murima dheenyu, nyu aliba wanganyedha. 9 Mukuuwe, mwikubanyedhe ni munle. Oteya weenyu wisadduwe wikale wunla, ohagalala weenyu wisadduwe wikale wukuuwa. 10 Mwiiyevihe vamentoni va Yehova,* oliye aneere wuthithimihani.
11 Addibila, muhiye owogelana obure mmodha ni mukwaye. Ole anamuwoga obure obe anamutoriha ddibile, anna onyemula ni otoriha nlamulo. Vano, akala we onotoriha nlamulo kunavirihamo nlamulona, mbwenye oli namatoriha. 12 Ole anavaha nlamulo ni anatoriha ali mmodha baahi, ole ananda woobola ni ogujhula. Mbwenye we oli aani wihina omutorihege mwanddamani awo?
13 Vano kavuruwanani nyu munawogesa mwegihina: “Peeno obe mangwaana nnere omaga olenddo wihina ndhowe luwani yeele, nafiya wengo nnere omalawo yaka yantero naweeddihaga malonddihu ni nnere okanna korowa dhowinjhiva,” 14 naarive muhunonne makalelo enaakale eguminyu mangwaana mwaha nyu muli ninga funga enakalawo mudhidhi mung’onove yamala orimela. 15 Ohiya eyo, nyu mwawogege mwegihina: “Yehova* afuna nnere okalawo ni nnere waapara mabasa oohiyana-iyana.” 16 Mbwenye enapadduwa sowihina nyu munoothabwa wiithukula mwa makalelo abure. Wiithukula waatewene ngo fwabure. 17 Bumwahaya, akala muthu ohunona werana opama mbwenye naarive dhigaali ndo oliye kaneerana, anna otheega.