Dhilebiwe ni Matewuji

5 Yesu nuwoona muthithi waathu ogwela vamwangoni okarati, vano anamaharaye omususedha. 2 Oliye wambela wahudhiha* egihina:

3 “Oohagalala baathu enamurabulela Mulugu,* mwaha Omwene wodhulu bwewa.

4 “Oohagalala baathu enunla, mwaha enere otodoliwa.

5 “Oohagalala baathu oopwaseya,* mwaha enere wakela elabo yavati.

6 “Oohagalala baathu enunlela wereliwa opama,* mwaha enere wakwanelihedhiwa.

7 “Oohagalala baathu athagaraga, mwaha enere weddeliwa thagaraga.

8 “Oohagalala baathu oweela murima, mwaha enere omoona Mulugu.

9 “Oohagalala baathu enasayela murenddele, mwaha enere withaniwa ahima a Mulugu.

10 “Oohagalala baathu enaharahariwa mwaha werana opama, mwaha Omwene wodhulu bwewa.

11 “Oohagalala di nyu munaruwaniwa, munaharahariwa ni muninkedhiwa dhithu dhaatedhene dhabure, mwaha wa ndina naaga. 12 Muhagalale ni muthabe nuuhagalala, mwaha mareeliho enyu odhulu ehinjhiva, teto oobajha oharahariwa banamavuhulela.

13 “Nyu muli mwinnyu weelabo. Mbwenye mwinnyu wahidhivaga, podi ohogolowela odhiva? Kunakanna mabasa, onorahiliwa athu onyingalelaga.

14 “Nyu muli waara weelabo. Nimakalelo mamodhave, kaavo ahinona sidadi emagiwe vamwangoni. 15 Athu yamwihiddiha lampada kinampweha mukukutuni mwa kama, mbwenye enomutomeya wamoneyelaga athu aatene. 16 Nimakalelo mamodhave, muhiye waara weenyu wamoneyelege athu aatene wi yawone mabasa apama munaparinyu ni emuthithimihe Baabinyu oodhulu.

17 “Miyo kagidhele omariha Nlamulo obe dhiwogile Anamavuhulela. Mbwenye gidhele wakwaneliha ohiya omariha. 18 Mwebaribarene podi wandeya elabo yavati ni yodhulu ovira, mbwenye kinandeya ovira Nlamulo nimodha nihinathi wakwanela. 19 Muthu yoole anaaviriganihe nlamulo nimodha ni anahudhihe* athu amodha werana emodhave kanafwanelela Mumweneni wodhulu.* Mbwenye muthu yoole anavirihemo ni anahudhihe athu amodha werana emodhave anofwanelela Mumweneni wodhulu.* 20 Ginuwaddelani ebaribari, opama* weenyu wahikumaga vati vamurima munoligana ni anamaleba vamodha ni afarizewu, teto kamunaavolowe Mumweneni wodhulu.

21 “Nyu muhunona Nlamulo yaddeliwe makolwinyu, nawoga negihina: ‘Kumpe muthu, yoole anampe mukwaye aneere owogiwa muladdu otiribunale.’* 22 Mbwenye miyo ginowuwaddelani wihina, muthu yoole anamukoyele ntxiga ddibile aneere owogiwa muladdu otiribunale; ni muthu yoole anamuwogele ddibile madhu abure, aneere owogiwa muladdu Tiribunale Enlubale. Teto muthu yoole anaamwithane mukwaye: ‘Taduwawe!’ aneere ovokedhiwa oJhehena* winahidda mootho.

23 “Vano, wathukula nvaho wawo odhowana waltareni, nuwindo onowubuwela wihina ohukanna muladdu nddibilo, 24 ohiye nvaho wawo vevale ohogolowele mundduli. Odhowe watxokotxele muladdu onniwena* nddibilo, wamala podi odhowa wakuthe mukutho wawo.

25 “Kulegele otxokotxela muladdu onniwena ni mwiddanaawo mugaali mudila mudhowaga otiribunale, wihina ahupeleke mmadani mwanamatoriha, vano anamatoriha yupeleke mmadani mwasupayi windo ovokedhiwe mukambura. 26 Ginowuwaddela ebaribari: Kunaatapuliwe ohulinve korowa* yaatene onniwena.

27 “Nyu muhunona Nlamulo nnihina: ‘Kukume mba.’* 28 Mbwenye ginafuna guwaddeleni wihina, muthu yoole anadidela omusugwa muhiyana ofiyedha omukalela munigwa mmurimani ohumukumiha mba. 29 Mowindo, akala ninto nawo na moono woojha nnowukwakwathusa, okumihemo orahile. Yaakale yapama oyelela yaano modha ya mwiili wawo ohiya mwiili watene ovokedhiwa oJhehena.* 30 Emodhave, akala nlada nawo na moono woojha nnowukwakwathusa, ogwaddewo orahile. Yaakale yapama oyelela yaano modha ya mwiili wawo ohiya mwiili watene ovokedhiwa oJhehena.*

31 “Ohiya yeyove, dholebela dhinihina: ‘Akala muthu anafuna amwalane ni mwariye anvahe pethe.’* 32 Mbwenye ginafuna guwaddeleni wihina muthu yoole anafuna omwalana ni mwariye, ehili mwaha wa mararuwo* anamutotela mwariye okuma mba,* teto muthu yoole anamutela muhiyana amwalane ni mamune ohukuma mba.

33 “Ohiya eyo, Nlamulo yaddeliwe makolwinyu nawoga negihina: ‘Kulibele ebewene sewakwaneliha, mbwenye wakwanelihe dholibela dhawo weriliwena vamentoni va Yehova.’* 34 Mowindala, ginowuwaddelani: Kamulibelelege ethu-siithu, newene kamulibelelege odhulu, mwaha mpaddo wa Mulugu; 35 newene kamulibelelege elabo yavati, mwaha mburo Mulugu anapwehiye manyalwaye, newene kamulibelelege elabo yoJeruzale, mwaha sidadi ya Mwene munlubale. 36 Newene kamulibelelege vamuru veenyu, mwaha nyu kamunanda otxeniha obe oribiha nthithi nenyu. 37 Mwaahiye madhu enyu owi “hee” ekale hee, “naari,” akale naari; dhaatedhene dhinakwaranye madhu yaala dhinadhela wa Mbure.

38 “Nyu muhunona nlamulo nnihina: ‘Ninto nninto, niino nniino.’ 39 Mowindala, ginowuwaddelani: Kuwane ni muthu abure,* mbwenye anuuvade nthama nna, omulevele nthama nimodha. 40 Akala muthu ohuusumela otiribunale mwaha anafuna uwake malayaawo, omwihiyedhe naleya onaawariwe ode. 41 Akala namathonga eere wuwaddihedha opwathela dhoobo wihina weddena kilometuru modha,* weddena kilometuru biili. 42 Muthu uloba ethu onvahe teto muthu afunaga wufiyari* kumukoddihe.

43 “Nyu muhunona nlamulo nnihina: ‘Omudhivelege mwanddamanaawo mbwenye omwiidde mwiddani awo.’ 44 Mowindala ginowuwaddelani: Mwadhivelege amwiddani enyu ni mwalobelelege ale enuharaharani, 45 mwerana ndo munooniwege ninga ahima a Baabinyu ali odhulu, mwaha oliye anowavaha nduwa athu apama ni athu abure ni anowavaha muzongwe athu owogowa naathu ohogowa. 46 Ki vano mwadhivelaga baahi ale enudhivelani mpunrevo ddi? Kamunerana emodhave enerana anamakukusa musoko? 47 Mwaalojhelaga baahi addibilinyuve, sapama? Kamunerana emodhave enerana athu amalogo oode?* 48 Mowindala, mukale oologomana* ninga Baabinyu ali odhulu.