Aamulebeliye Timotiyu

2 Mowindala, vobajhavene ginafuna gukongomedheni wihina mwalobelelege athu aatene, mulobaga ni murima waatene nikavihero na Mulugu ni mmutamaalelaga, 2 wodhela mamwene ni athu aatene evahiwe owedha winlubale, wihina ndidele okanna egumi yopwaseya ni yamurenddele, nimulabelaga Mulugu ni murima waatene. 3 Eyo sapama ni sohagalasa vamentoni va Nvulusi ehu, Mulugu, 4 onafuna wi athu aatene evuluwe ni enone ebaribari yowakwanela. 5 Mwaha aliwo Mulugu mmodha, ni aliwo muthu mmodha baahi anawandaniha athu ni Mulugu: Kiristu Yesu, 6 yoyo iipelekile ninga yowobola yofwanelela wa athu aatene. Dhithu dhendha dhinaalaleyiwe wafiya mudhidhi wofwanelela. 7 Bumwahaya Mulugu ohugisakula wihina gilaleye ni gikale murumiwi, wi gahudhihe* athu ehili maJudewu wodhela nroromelo ni ebaribari. Kaginowoota mbwenye ginawoga ebaribari.

8 Mowindo, ginofuna wihina mburo dhaatedhene alobwana aatene edidele olobela, yaavenyihaga mada emuroromelaga Mulugu, ohiya nuuwali ni ovanyihana. 9 Nimakalelo mamodhave, ahiyana ewarege dhowara dhofwanelela, yisamalelege mohukaliha manyazo nimakalelo enooniha thotho, ohiya ni muluwelo wohifwanelela, ni woru obe ni peerola, newene owara guwo dhokwima, 10 mbwenye yiwomihedhege ni makalelo apama ninga ahiyana enamwebedha Mulugu, ni dhowera dhapama.

11 Ahiyana yahudheraga ekalege oomaaleyene ni yawiwelelege alobwana. 12 Kaginenya wihina muhiyana ahudhihege newene amuthongege mulobwana, mbwenye oliye akalege oomaaleyene. 13 Mwaha Adawu dambele opaddusiwa vano oharelaga Eva. 14 Ohiya yeyove, Adawu kaalekethiwe, mbwenye muhiyana daalekethiwe, bumwahaya adhe atheegege. 15 Mowindala, ahiyana enere okala oobareleya yaabala ahima. Mbwenye eyo enereye aliwa yadidela okala munroromeloni, yakanna odhivela ni yakala oweela eganna ekalelo yapama.