Karta Noobajha Na Peduru
3 Nimakalelo mamodhave, nyu ahiyana ooteliwa mwawiwelelege amamuninyu, akala aliwa kinawiwelela madhu a Mulugu, dhowera dhenyu dhathukulele wawiwelela mwaha wa mweeddelo weenyu, 2 wodhela okala anamoona a dhowera dheenyu dhapama vamodha ni nriho na vati vamurima. 3 Wiwomihedha weenyu kawikale wa odeve baahi ninga waluwa mathithi, owara dhithu dha woru obe dhowara dhokwima, 4 mbwenye owoma weenyu okale wa mmurimani ni dhowiwomihedhana dhihinanongeya oli murima woopwaseya ni womaleya, owoma ngo fuli wathima vamentoni va Mulugu. 5 Mwaha ahiyana oororomeleya* akale yamujheha Mulugu, yiwomihedhesa ndala yawiwelelaga amamuniwa, 6 ninga Sara amwiwelelesa Abaraawu amwithanaga nabwiya. Ni weya onere okala mwanaye, wadidelave werana opama ni ohoovaga ethu.
7 Nimakalelo mamodhave, mulobwana we ootela, odidele okala ni mwariyo mowiwanana ni enonelo. Omuthithimihege ninga muno* ohunaliba opweseya, mwaha nuliyeya aneere wakela vamodha ni we opama wohinifwanelela wa egumi yohimala, wahera ndo, malobelo awo kinaakuliwege.
8 Vookuthula, mukanne mubuwelo mmodhave, mukanne nthebwa, mukanne odhivela ni addibilinyu a elabo yaatene, mweddelanege thagaraga ni mukale owiyeviha. 9 Kamuhogolose obure ni obure, teto mwaruwaniwaga ni nyuwa kamuruwanege. Mbwenye, mwawerelege opama athu amodha, mwaha Mulugu uwithanileni wihina muharege dila yeela, ndo oliye aneere wureelihani.
10 Bumwahaya “ole anadhivela egumaye ni anafuna okanna malabo oohagalala, arabelihe nlumi naye dhego dhabure ni mulomo waye owoga dhithu dhowoota. 11 Arabele werana obure eeregena opama; asayele murenddele ni eddelege. 12 Mwaha wi mento a Yehova,* enowasugwa athu owogowa, teto mabaru aye enowavuruwana malobelo ewa oobebedha, mbwenye kove ya Yehova enootakaleliwa naathu enerana dhithu dhabure.”
13 Mwebaribarene, anuwereleni obure baani mwaviheyagana dhithu dhapama? 14 Mowindo, naarive moonaga goyi mwaha werana dhithu dhowogowa, nyu munerege ohagalalave. Bumwahaya, kamoove dhithu aliwa enooviwa newene kamuthuwathuwe. 15 Mbwenye mmuthithimihege Kiristu mmurimani mweenyu, teto mukalege owiwegeredhene wihina mwawakule pama athu enukoheni wodhela ejhehedhelo yeenyu, mweragana ndo nuupwaseya vamodha ni nriho na vati vamurima.
16 Mukanne mubuwelo wapama wihina malabo aamatene athu yayo enuwogani obure, yawogaga ekannege manyazo mwaha wa mweeddelo weenyu wapama ninga anamahara a Kiristu. 17 Sapama nyu woona goyi mwaha werana opama akala sifunelo ya Mulugu wihina eyo yereye, ohiya woona goyi mwaha werana obure. 18 Mwaha Kiristu ohukwa dila modha baahi mwaha wa dhoothega dhehu, muthu owogowa waakwela athu oohogowa, wihina uthukuleleni wa Mulugu. Oliye akwile omwiilini, mbwenye ohakela egumi yomuzimuni. 19 Vano oliye odhowa walaleya* angero yaali mukambura, 20 yayo yahiwelenle mudhidhi Mulugu ajhehaga nuuvilela malabo a Nowe, wula osasanyiwaga mwanddeya yoyo wavulusile athu vang’onove obe neere athu* owakwana atanu natharu mutokora nufiya.
21 Obaddiziwa winiwanana ni yopadduwa ele, winere wuvulusani mohilegela (teto kawinasuwa dhootakala dha mmwiilini, mbwenye makalelo oomuloba Mulugu wihina uvaheni mubuwelo wapama), wodhela ovenyihiwa wa Yesu Kiristu. 22 Oliye ali moono woojha wa Mulugu, woona wi adhowile odhulu; teto angero, anamathonga ni ale enna owedha erumiwiwa wihina emwiwelelege oliye.